ಸುಟ್ಟುಹೋದ ಸ್ಥಿತಿಯಲ್ಲಿ ಪತ್ತೆಯಾಯ್ತು ನಾಪತ್ತೆಯಾಗಿದ್ದ ಹೆಲಿಕಾಪ್ಟರ್! 7 ಮಂದಿ ಸಾವು

Team Udayavani, Jun 12, 2022, 9:48 AM IST

ರೋಮ್: ಕಳೆದ ಎರಡು ದಿನಗಳಿಂದ ನಾಪತ್ತೆಯಾಗಿದ್ದ ಇಟಲಿಯ ಹೆಲಿಕಾಪ್ಟರ್ ಸುಟ್ಟುಹೋದ ಸ್ಥಿತಿಯಲ್ಲಿ ಪತ್ತೆಯಾಗಿದೆ. ಹೆಲಿಕಾಪ್ಟರ್ ನಲ್ಲಿದ್ದ ಏಳು ಮಂದಿ ಸಾವನ್ನಪ್ಪಿದ್ದಾರೆ.

ಟಸ್ಕನಿ ಮತ್ತು ಎಮಿಲಿಯಾ ರೊಮ್ಯಾಗ್ನಾ ಪ್ರದೇಶದ ಗಡಿಯಲ್ಲಿರುವ ಪರ್ವತ ಪ್ರದೇಶದಲ್ಲಿ ಹೆಲಿಕಾಪ್ಟರ್ ಪತ್ತೆಯಾಗಿದೆ ಎಂದು ವರದಿಯಾಗಿದೆ.

ಇಟಲಿಯಲ್ಲಿ ಹೆಲಿಕಾಪ್ಟರ್ ಅಪಘಾತದಲ್ಲಿ ಸತ್ತ ಏಳು ಜನರ ಶವಗಳನ್ನು ಪತ್ತೆ ಹಚ್ಚಲಾಗಿದೆ ಎಂದು ಸ್ಥಳೀಯ ಅಧಿಕಾರಿಗಳು ಶನಿವಾರ ಹೇಳಿದ್ದಾರೆ.

ಹೆಲಿಕಾಪ್ಟರ್ ಗುರುವಾರ ಟಸ್ಕನಿಯ ಲುಕ್ಕಾದಿಂದ ಟೇಕ್ ಆಫ್ ಆಗಿದ್ದು, ಉತ್ತರದ ನಗರವಾದ ಟ್ರೆವಿಸೊ ಕಡೆಗೆ ಹೋಗುತ್ತಿದ್ದಾಗ ಪ್ರತಿಕೂಲ ಹವಾಮಾನದ ಕಾರಣದಿಂದ ರೇಡಾರ್ ಸಿಗ್ನಲ್ ನಿಂದ ತಪ್ಪಿಸಿಕೊಂಡಿತ್ತು. ನಾಪತ್ತೆಯಾಗಿದ್ದ ವಿಮಾನದ ಶೋಧ ಕಾರ್ಯಾಚರಣೆ ನಡೆಯುತ್ತಿತ್ತು.

ಇದನ್ನೂ ಓದಿ:ಮೂವರು ಲಷ್ಕರ್ ಉಗ್ರರನ್ನು ಗುಂಡಿಕ್ಕಿ ಕೊಂದ ಜಮ್ಮು ಕಾಶ್ಮೀರ ಪೊಲೀಸರು

ನಾಲ್ವರು ಟರ್ಕಿಶ್ ಮತ್ತು ಇಬ್ಬರು ಲೆಬನಾನಿನ ಪ್ರಜೆಗಳಿದ್ದರು. ಇವರು ವ್ಯಾಪಾರ ಸಂಬಂಧವಾಗಿ ಇಟಲಿಗೆ ಹೋಗುತ್ತಿದ್ದರು. ಉಳಿದಂತೆ ಇಟಾಲಿಯನ್ ಪೈಲಟ್ ಹೆಲಿಕಾಪ್ಟರ್ ನಲ್ಲಿದ್ದರು ಎಂದು ಮೊಡೆನಾ ನಗರದ ಪ್ರಿಫೆಕ್ಟ್ ಕಚೇರಿ ತಿಳಿಸಿದೆ.

ಸುದ್ದಿ ಸಂಸ್ಥೆಯೊಂದರ ಪ್ರಕಾರ ಉತ್ತರ ಇಟಲಿಯ ಥಿಯೆನ್ ಮೂಲದ ಸಾರಿಗೆ ಮತ್ತು ಏರೋನಾಟಿಕ್ ನಿರ್ವಹಣಾ ಕಂಪನಿ ಏವಿಯೊ ಹೆಲಿಕಾಪ್ಟರ್‌ ಗಳ ಒಡೆತನದಲ್ಲಿದೆ ಎಂದು ವರದಿ ಮಾಡಿದೆ.