ಯುಎಇ ನೂತನ ಅಧ್ಯಕ್ಷರಾಗಿ ಶೇಖ್ ಮೊಹಮ್ಮದ್ ಬಿನ್ ಜಾಯೆದ್ ಅಲ್ ನಹ್ಯಾನ್

Team Udayavani, May 14, 2022, 3:43 PM IST

ದುಬೈ:ಆನುವಂಶಿಕವಾಗಿ ಆಳ್ವಿಕೆ ನಡೆಸುತ್ತಿರುವ ಅರೇಬಿಯನ್ ರಾಷ್ಟ್ರ ಯುನೈಟೆಡ್ ಅರಬ್ ಎಮಿರೇಟ್ಸ್ ನ ನೂತನ ಅಧ್ಯಕ್ಷರಾಗಿ ಶೇಖ್ ಮೊಹಮ್ಮದ್ ಬಿನ್ ಜಾಯೆದ್ ಅಲ್ ನಹ್ಯಾನ್ ಅವರನ್ನು ನೇಮಿಸಲಾಗಿದೆ ಎಂದು ಆಡಳಿತಗಾರರು ಶನಿವಾರ ಘೋಷಿಸಿದ್ದಾರೆ.

ದೇಶದ ಏಳು ಶೇಖ್‌ಗಳ ಆಡಳಿತಗಾರರು ಸಭೆಯಲ್ಲಿ ಈ ನಿರ್ಧಾರವನ್ನು ತೆಗೆದುಕೊಂಡಿದ್ದಾರೆ ಎಂದು ಸರ್ಕಾರಿ ವಾಮ್ ಸುದ್ದಿ ಸಂಸ್ಥೆ ಹೇಳಿದೆ.

ಅಧ್ಯಕ್ಷ ಖಲೀಫಾ ಬಿನ್ ಜಾಯೆದ್ ಅಲ್ ನಹ್ಯಾನ್ ಶುಕ್ರವಾರ ನಿಧನ ಹೊಂದಿದ ನಂತರ ಈ ಬೆಳವಣಿಗೆ ನಡೆದಿದೆ.

ನವೆಂಬರ್ 2004 ರಿಂದ, ಶೇಖ್ ಮೊಹಮ್ಮದ್ ಅಬುಧಾಬಿಯ ಕ್ರೌನ್ ಪ್ರಿನ್ಸ್ ಆಗಿದ್ದರು. ಜನವರಿ 2005 ರಲ್ಲಿ, ಅವರನ್ನು ಯುಎಇ ಸಶಸ್ತ್ರ ಪಡೆಗಳ ಸಹ ಸುಪ್ರೀಂ ಕಮಾಂಡರ್ ಆಗಿ ನೇಮಿಸಲಾಗಿತ್ತು.

ಶೇಖ್ ಮೊಹಮ್ಮದ್ ಮಾರ್ಚ್ 11, 1961 ರಂದು ಅಲ್ ಐನ್‌ನಲ್ಲಿ ಜನಿಸಿದರು. ಅವರು ರಾಷ್ಟ್ರದ ಸ್ಥಾಪಕ ಪಿತಾಮಹ ಮತ್ತು ಯುಎಇಯ ಮೊದಲ ಅಧ್ಯಕ್ಷ ದಿವಂಗತ ಶೇಖ್ ಜಾಯೆದ್ ಬಿನ್ ಸುಲ್ತಾನ್ ಅಲ್ ನಹ್ಯಾನ್ ಅವರ ಮೂರನೇ ಮಗ.