ಪೇಶಾವರ: 17 ತಾಸು ಶೂಟೌಟ್‌; ಪೊಲೀಸ್‌ ಅಧಿಕಾರಿ, ಐವರು ಉಗ್ರರ ಸಾವು

Team Udayavani, Apr 16, 2019, 7:04 PM IST

ಪೇಶಾವರ : ಪಾಕಿಸ್ಥಾನದ ನೈಋತ್ಯ ನಗರವಾಗಿರುವ ಪೇಶಾವರದಲ್ಲಿಂದು ಉಗ್ರರ ವಸತಿ ಅಡುದಾಣವೊಂದರ ಮೇಲೆ 17 ತಾಸುಗಳ ಕಾಲ ನಡೆಸಿದ ಎನ್‌ಕೌಂಟರ್‌ ಕಾರ್ಯಾಚರಣೆಯಲ್ಲಿ ಓರ್ವ ಪೊಲೀಸ್‌ ಅಧಿಕಾರಿ ಮತ್ತು ಐವರು ಉಗ್ರರು ಹತರಾಗಿರುವುದಾಗಿ ವರದಿಯಾಗಿದೆ.

ಮೂರು ಮಹಡಿಯ ಕಟ್ಟಡವೊಂದರಲ್ಲಿ ಉಗ್ರರು ಅಡಗಿಕೊಂಡಿದ್ದಾರೆ ಎಂಬ ಖಚಿತ ಗುಪ್ತಚರ ಮಾಹಿತಿಯನ್ನು ಆಧರಿಸಿ ಪೊಲೀಸ್‌ ಮತ್ತು ಭದ್ರತಾ ಪಡೆಗಳು ಜಂಟಿ ಕಾರ್ಯಾಚರಣೆ ನಡೆಸಿದವು. ಉಗ್ರರು ಭದ್ರತಾ ಪಡೆಗಳ ವಿರುದ್ಧ ಹಲವು ತಾಸುಗಳ ಗುಂಡಿನ ಚಕಮಕಿ ನಡೆಸಿದರು.

ಮೃತ ಪೊಲೀಸ್‌ ಅಧಿಕಾರಿಯನ್ನು ಎಎಸ್‌ಐ ಕಮರ್‌ ಆಲಂ ಎಂದು ಗುರುತಿಸಲಾಗಿದೆ. ಒಬ್ಬರು ನ್ಯಾಯಾಧೀಶರು ಮತ್ತು ಓರ್ವ ಹೆಚ್ಚುವರಿ ಐಜಿಪಿ ಅವರ ಮೇಲಿನ ದಾಳಿ ನಡೆಸಿದ್ದ ಈ ಉಗ್ರರಿಗಾಗಿ ಭದ್ರತಾ ಪಡೆಗಳು ಈ ಕಾರ್ಯಾಚರಣೆ ನಡೆಸಿದ್ದವು.