ಶಟ್‌ಡೌನ್‌:ಮನೇಲಿ ಉಳಿದ ನೌಕರರು

Team Udayavani, Jan 23, 2018, 6:30 AM IST

ವಾಷಿಂಗ್ಟನ್‌: ಅಲ್ಪಾವಧಿ ಹಣಕಾಸು ವಿಧೇಯಕ ಅಂಗೀಕಾರವಾಗದೇ ಇರುವುದರಿಂದ ಅಮೆರಿಕದಲ್ಲಿ ಸರಕಾರಿ ವ್ಯವಸ್ಥೆ  ಹೆಚ್ಚಾ ಕಡಿಮೆ ಸ್ಥಗಿತ(ಶಟ್‌ಡೌನ್‌)ಗೊಂಡಿದೆ. ತುರ್ತು ಸೇವಾ ವ್ಯವಸ್ಥೆಗಳನ್ನು ಹೊರತು ಪಡಿಸಿ ಉಳಿದಂತೆ ಇತರ ಸರ್ಕಾರಿ ವ್ಯವಸ್ಥೆಯ ಸುಮಾರು ಎಂಟು ಲಕ್ಷ ಮಂದಿ ನೌಕರರು ಸಂಬಳವಿಲ್ಲದೆ ಮನೆಯಲ್ಲಿಯೇ ಉಳಿದಿದ್ದಾರೆ. ಇದೇ ವೇಳೆ ಕೋಲ್ಕತಾದಲ್ಲಿರುವ “ಅಮೆರಿಕನ್‌ ಸೆಂಟರ್‌’ ಮತ್ತು ಲೈಬ್ರರಿಯನ್ನು ಅನಿರ್ದಿಷ್ಟಾವಧಿಗೆ ಮುಚ್ಚಲು ನಿರ್ಧರಿಸಲಾಗಿದೆ.

ಈ ನಡುವೆ ರಿಪಬ್ಲಿಕನ್‌ ಮತ್ತು ಡೆಮಾಕ್ರಾಟ್‌ ಪಕ್ಷಗಳ ನಡುವೆ ಬಿಕ್ಕಟ್ಟು ಇತ್ಯರ್ಥಪಡಿಸಲು ನಡೆಸಿದ ಪ್ರಯತ್ನಗಳು ಯಶಸ್ಸು ಕಂಡಿದೆ ಎಂದು ಹೇಳಲಾಗುತ್ತಿದೆ. ಇನ್ನೊಂದೆಡೆ, ಬಿಕ್ಕಟ್ಟಿಗೆ ರಿಪಬ್ಲಿಕನ್‌ ಸಂಸದರೇ ಕಾರಣ ಎಂದು ಆನ್‌ಲೈನ್‌ ಸಮೀಕ್ಷೆಯೊಂದು ಹೇಳಿದೆ. ಶೇ.41 ಮಂದಿ ಮತದಾರರು ಅಮೆರಿಕದ ಕಾಂಗ್ರೆಸ್‌ನಲ್ಲಿರುವ ರಿಪಬ್ಲಿಕನ್‌ ಸಂಸದರೇ ಸರ್ಕಾರಿ ವ್ಯವಸ್ಥೆ ಬಂದ್‌ ಆಗಲು ಕಾರಣ ಎಂದು ಪ್ರತಿಪಾದಿಸಿದ್ದಾರೆ. ಶೇ.31 ಮಂದಿ ಡೆಮಾಕ್ರಾಟ್‌ ಪಕ್ಷದವರೇ ಬಿಕ್ಕಟ್ಟಿಗೆ ಕಾರಣ ಎಂದಿದ್ದಾರೆ. ಇನ್ನು “ವಾಷಿಂಗ್ಟನ್‌ ಪೋಸ್ಟ್‌’ ಮತ್ತು “ಎಬಿಸಿ ನ್ಯೂಸ್‌’ ನಡೆಸಿದ ಸಮೀಕ್ಷೆಯಲ್ಲಿ ಶೇ.48 ಮಂದಿ ರಿಪಬ್ಲಿಕನ್‌ ಪಕ್ಷದವರೇ ಸಮಸ್ಯೆಗೆ ಕಾರಣ ಎಂದು ಪ್ರತಿಪಾದಿಸಿದ್ದಾರೆ.