ಸಿಂಗಾಪುರದಲ್ಲಿ ಆರ್ಥಿಕ ಕುಸಿತ, ಭಾರತೀಯರಿಗೆ ಆತಂಕ

Team Udayavani, Jun 20, 2023, 7:00 AM IST

ಸಿಂಗಾಪುರ: ಜಗತ್ತಿನ ಎಲ್ಲ ಕಡೆ ಆರ್ಥಿಕ ಕುಸಿತದ ಸ್ಥಿತಿಯಿದೆ. ಜಗತ್ತಿನ ಶ್ರೀಮಂತ ದೇಶಗಳಲ್ಲೊಂದಾದ ಸಿಂಗಾಪುರದಲ್ಲೂ ಆರ್ಥಿಕ ಕುಸಿತದ ಲಕ್ಷಣಗಳು ಕಾಣಿಸಿವೆ. ಪರಿಣಾಮ ಅಲ್ಲಿನ ಅನಿವಾಸಿ ಭಾರತೀಯರು ಆತಂಕಕ್ಕೊಳಗಾಗಿದ್ದಾರೆ. ಒಟ್ಟಾರೆ ಸಿಂಗಾಪುರದ ಹತ್ತು ಪ್ರಮುಖ ಕ್ಷೇತ್ರಗಳಲ್ಲಿ ರಫ್ತು ಪ್ರಮಾಣ ಕುಸಿದಿದೆ. ಮಲೇಷ್ಯಾ, ಹಾಂಕಾಂಗ್‌, ತೈವಾನ್‌ ಮಾರುಕಟ್ಟೆಯಲ್ಲಿ ಪ್ರಗತಿಯಿಲ್ಲದಿರುವುದು ಸಿಂಗಾಪುರದಲ್ಲೂ ಸಮಸ್ಯೆ ಸೃಷ್ಟಿಸಿದೆ. ಉದ್ಯೋಗಾವಕಾಶಗಳ ಪ್ರಮಾಣದಲ್ಲಿ ಕುಸಿತವಾಗಿದೆ, ವೆಚ್ಚ ಕಡಿತ ಹೆಚ್ಚಾಗಿದೆ, ಒಟ್ಟು ಉದ್ಯೋಗಿಗಳ ಸಂಖ್ಯೆಯಲ್ಲಿ ಅತಿ ಸಣ್ಣ ಪ್ರಮಾಣದಲ್ಲಿ ಏರಿಕೆಯಾಗುತ್ತಿದೆ.

ಸಿಂಗಾಪುರದ ವ್ಯಾಪಾರ ಮತ್ತು ಉದ್ಯಮ ಸಚಿವಾಲಯದ ಮಾಹಿತಿ ಪ್ರಕಾರ, ತೈಲೇತರ ರಫ್ತು ಪ್ರಮಾಣ ಮೇ ತಿಂಗಳಲ್ಲಿ ಶೇ.14.7ರಷ್ಟು ಕುಸಿದಿದೆ. ಏಪ್ರಿಲ್‌ನಲ್ಲಿ ಶೇ.9.8ರಷ್ಟು ಕುಸಿತವಾಗಿತ್ತು. ಇದಕ್ಕೆ ಮುಖ್ಯ ಕಾರಣ ವಿದ್ಯುನ್ಮಾನ ಮತ್ತು ವಿದ್ಯುನ್ಮಾನೇತರ ಉತ್ಪನ್ನಗಳ ರಫ್ತು ಕುಸಿತವಾಗಿದ್ದು. ಒಂದು ತ್ತೈಮಾಸಿಕದಿಂದ ಇನ್ನೊಂದು ತ್ತೈಮಾಸಿಕಕ್ಕೆ ಶೇ.0.4ರಷ್ಟು ಆರ್ಥಿಕತೆ ಕುಸಿಯುತ್ತಿದೆ. ಕಳೆದ ವರ್ಷ 1,26,000 ಹುದ್ದೆಗಳು ಖಾಲಿ ಇದ್ದವು, ಈ ವರ್ಷ ಅದರ ಪ್ರಮಾಣ 99,600ಕ್ಕೆ ಕುಸಿದಿದೆ. ಈ ವರ್ಷ ಮೊದಲ ತ್ತೈಮಾಸಿಕದಲ್ಲಿ 3,820 ಮಂದಿಯನ್ನು ಕೆಲಸದಿಂದ ತೆಗೆಯಲಾಗಿದೆ. ಒಟ್ಟಾರೆ ಅನಿವಾಸಿ ಭಾರತೀಯರು ಈ ಎಲ್ಲ ಬೆಳವಣಿಗೆಗಳಿಂದ ಗೊಂದಲದಲ್ಲಿದ್ದಾರೆ.