ಮುಂದಿನ ವರ್ಷ ಸಿರಿಂಜ್‌ ಕೊರತೆ?

Team Udayavani, Nov 12, 2021, 7:00 AM IST

ಜಿನೇವಾ: ಮುಂದಿನ ವರ್ಷದ ವೇಳೆಗೆ ಜಾಗತಿಕವಾಗಿ 200 ಕೋಟಿಗಳಷ್ಟು ಇಂಜೆಕ್ಷನ್‌ ಸಿರಿಂಜ್‌ಗಳ ಕೊರತೆ ತಲೆದೋರುವ ಸಾಧ್ಯತೆಯಿದ್ದು, ವಿವಿಧ ಲಸಿಕೆಗಳನ್ನು ನೀಡುವ ಪ್ರಕ್ರಿಯೆಗೆ ತಡೆಯಾಗುವ ಗಂಭೀರ ಅಪಾಯವಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಎಚ್ಚರಿಸಿದೆ.

ಕೋವಿಡ್‌ -19 ಲಸಿಕೆ ಅಭಿಯಾನಕ್ಕಾಗಿ ವಾಡಿಕೆಗಿಂತ ಹಲವು ಪಟ್ಟು ಹೆಚ್ಚು ಸಿರಿಂಜ್‌ ಬಳಕೆಯಾಗಿರುವುದೇ ಇದಕ್ಕೆ ಕಾರಣ. ಸಿರಿಂಜ್‌ ಉತ್ಪಾದನೆ ಹೆಚ್ಚದಿದ್ದರೆ ಕೊರತೆ ಉಂಟಾಗುವುದು ಖಚಿತ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಹೇಳಿದೆ.

ಕೋವಿಡ್‌-19 ಲಸಿಕೆ ಡೋಸ್‌ಗಳು ಹೆಚ್ಚುತ್ತಿರುವ ಪ್ರಮಾಣಕ್ಕೆ ಸರಿಯಾಗಿ ಸಿರಿಂಜ್‌ ಉತ್ಪಾದನೆ ಕೂಡ ಹೆಚ್ಚಬೇಕು ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಹಿರಿಯ ಸಲಹೆಗಾರ್ತಿ ಲಿಸಾ ಹೆಡ್‌ಮನ್‌ ಅಭಿಪ್ರಾಯಪಟ್ಟಿದ್ದಾರೆ.

ಇದನ್ನೂ ಓದಿ:ನ.18ರಂದು ಈ ಶತಮಾನದ ಅತಿದೀರ್ಘಾವಧಿಯ ಭಾಗಶಃ ಚಂದ್ರಗ್ರಹಣ

ಸಿರಿಂಜ್‌ ಕೊರತೆಯಿಂದಾಗಿ ಅವುಗಳ ಮರುಬಳಕೆಯಂಥ ಅಪಾಯಕಾರಿ ಪ್ರಯೋಗವೂ ನಡೆಯುವ ಸಾಧ್ಯತೆ ಇದೆ ಎಂದು ಅವರು ಎಚ್ಚರಿಸಿದ್ದಾರೆ.