ಕೊರಿಯಾ ದ್ವೀಪದಲ್ಲಿ ಉದ್ವಿಗ್ನ ಸ್ಥಿತಿ: ಸಂಪರ್ಕ ಕಚೇರಿ ಸ್ಫೋಟಿಸಿದ ಉತ್ತರ ಕೊರಿಯಾ

Team Udayavani, Jun 17, 2020, 11:16 AM IST

ಸಿಯೋಲ್‌: ದಕ್ಷಿಣ ಕೊರಿಯಾದೊಂ­ದಿಗೆ ಮತ್ತೆ ಸಂಘರ್ಷಕ್ಕೆ ಮುಂದಾಗಿ­ರುವ ಉತ್ತರ ಕೊರಿಯಾ, ಮಂಗಳವಾರ ಗಡಿಭಾಗದಲ್ಲಿರುವ ಅಂತರ್‌ಕೊರಿಯಾ ಸಂಪರ್ಕ ಕಚೇರಿಯ ಕಟ್ಟಡವನ್ನು ಸ್ಫೋಟಿಸಿದೆ. ಇದರಿಂದಾಗಿ ಕೊರಿಯಾ ಪರ್ಯಾಯ ದ್ವೀಪ ಪ್ರದೇಶದಲ್ಲಿ ಉದ್ವಿಘ್ನ ವಾತಾವರಣ ಸೃಷ್ಟಿಯಾಗಿದೆ. ಕಳೆದ ವರ್ಷ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಹಾಗೂ ಉ.ಕೊರಿಯಾ ಸರ್ವಾಧಿಕಾರಿ ಕಿಮ್‌ ಜಾಂಗ್‌ ಊನ್‌ ನಡುವಿನ ಅಣು ಒಪ್ಪಂದ ಕುರಿತಾದ ಮಾತುಕತೆ ವಿಫ‌ಲಗೊಂಡ ಅನಂತರ ಉ.ಕೊರಿಯಾ ಮತ್ತು ದ.ಕೊರಿಯಾ ನಡುವಿನ ಸಂಬಂಧ ಹದಗೆಡುತ್ತಾ ಬಂದಿದೆ.

ಉ.ಕೊರಿಯಾದ ಗಡಿಪಟ್ಟಣವಾದ ಕೈಸೊಂಗ್‌ನಲ್ಲಿರುವ ಕಚೇರಿಯ ಕಟ್ಟಡವನ್ನು ಮಧ್ಯಾಹ್ನ 2.49ರ ವೇಳೆಗೆ ಧ್ವಂಸಗೊಳಿಸಲಾಗಿದೆ ಎಂದು ಸಿಯೋಲ್‌ನ ಏಕೀಕರಣ ಸಚಿವಾಲಯ ತಿಳಿಸಿದೆ. ಈ ಮಧ್ಯೆ, ಕಚೇರಿ ಇರುವ ಕಟ್ಟಡ ಸಂಕೀರ್ಣ­ದಿಂದ ಹೊಗೆ ಬರುತ್ತಿರುವ ಫೋಟೊಗಳನ್ನು ಯೋನ್ಹಾಪ್‌ ನ್ಯೂಸ್‌ ಏಜೆನ್ಸಿ ಪ್ರಕಟಿಸಿದೆ. ಇದೇ ವೇಳೆ, 2018ರಲ್ಲಿ ದ.ಕೊರಿಯಾ ಜತೆಗೆ ಮಾಡಿಕೊಂಡಿದ್ದ ದ್ವಿಪಕ್ಷೀಯ ಮಿಲಿಟರಿ ಒಪ್ಪಂದವನ್ನು ಕೈಬಿಟ್ಟು, ಸೈನ್ಯವನ್ನು ವಾಪಸ್‌ ಕರೆಸಿಕೊಂಡಿದ್ದ ಪ್ರದೇಶಗಳಲ್ಲಿ ಮತ್ತೆ ಸೇನಾ­ಪಡೆಯನ್ನು ನಿಯೋಜಿಸಲು ಮುಂದಾಗುವಂತೆ ಆಡಳಿತಾರೂಢ ಪಕ್ಷ ನೀಡಿರುವ ಶಿಫಾರಸ್ಸನ್ನು ಪರಿಶೀಲಿಸುವುದಾಗಿ ಕೊರಿಯಾದ ಪೀಪಲ್ಸ್‌ ಆರ್ಮಿಯ ಸೇನಾಧಿಕಾರಿ ತಿಳಿಸಿದ್ದಾರೆ.