ಟ್ರಂಪ್‌ ನಿರ್ಧಾರಕ್ಕೆ ಪಾಕ್‌ ಗಲಿಬಿಲಿ

Team Udayavani, Jan 3, 2018, 8:35 AM IST

ಇಸ್ಲಾಮಾಬಾದ್‌: ಉಗ್ರ ನಿಗ್ರಹದಲ್ಲಿ ವಿಫ‌ಲವಾಗಿದ್ದನ್ನು ಗಂಭೀರವಾಗಿ ಪರಿಗಣಿಸಿ ಪಾಕ್‌ಗೆ ನೀಡಬೇಕಾಗಿದ್ದ 255 ದಶಲಕ್ಷ ಡಾಲರ್‌ ನೆರವನ್ನು ಅಮೆರಿಕ ಸ್ಥಗಿತಗೊಳಿಸಿರುವುದು ಪಾಕಿಸ್ತಾನದ ನಿದ್ದೆಗೆಡಿಸಿದೆ. ಈ ಬೆಳವಣಿಗೆಯಿಂದ ವಿಲವಿಲನೆ ಒದ್ದಾಡುತ್ತಿರುವ ಪಾಕ್‌, ನಮ್ಮ ವಿರುದ್ಧ ಏಕೆ ಇಂತಹ ಕ್ರಮ ಕೈಗೊಂಡಿದ್ದೀರಿ ಎಂದು ಅಮೆರಿಕವನ್ನು ಪ್ರಶ್ನಿಸತೊಡಗಿದೆ. ಇನ್ನೊಂದೆಡೆ, ಚೀನಾ ಕೂಡ ಪಾಕ್‌ ಬೆನ್ನಿಗೆ ನಿಂತಿದ್ದು, ಉಗ್ರರ ನಿರ್ಮೂಲನೆಗಾಗಿ ಪಾಕಿಸ್ತಾನವು ಕಠಿಣ ಕ್ರಮಗಳನ್ನು ಕೈಗೊಂಡಿದ್ದು, ಅದನ್ನು ವಿಶ್ವ ಸಮುದಾಯ ಪರಿಗಣಿಸಬೇಕು ಎಂದು ಹೇಳಿದೆ.

ಪಾಕಿಸ್ತಾನವೊಂದು ಸುಳ್ಳುಗಳನ್ನೇ ಹೇಳುವ ರಾಷ್ಟ್ರ ಎಂದು ಅಮೆರಿಕ ಅಧ್ಯಕ್ಷ ಟ್ರಂಪ್‌ ಅವರು ಘೋಷಿಸಿದ್ದು, ಅದರ ನಂತರ ಆರ್ಥಿಕ ನೆರವನ್ನು ತಡೆಹಿಡಿದಿದ್ದು ಪಾಕಿಸ್ತಾನಕ್ಕೆ ದೊಡ್ಡ ಆಘಾತವನ್ನೇ ನೀಡಿದೆ. ಹೀಗಾಗಿ, ಈ ಬೆಳವಣಿಗೆಯ ಬೆನ್ನಲ್ಲೇ ಪಾಕ್‌ನಲ್ಲಿರುವ ಅಮೆರಿಕ ರಾಯಭಾರಿ ಡೇವಿಂಡ್‌ ಹೇಲ್‌ ಅವರನ್ನು ಕರೆಸಿಕೊಂಡು, ಅಮೆರಿಕದ ನಿರ್ಧಾರ ಕುರಿತು ವಿವರಣೆಯನ್ನು ಕೇಳಿದೆ. ಆದರೆ, ಇದಕ್ಕೆ ಅಮೆರಿಕದ ರಾಯಭಾರಿ ಯಾವ ರೀತಿ ಪ್ರತಿಕ್ರಿಯಿಸಿದ್ದಾರೆ ಎಂಬ ಮಾಹಿತಿ ಬಹಿರಂಗವಾಗಿಲ್ಲ. ಆದರೆ, ಮಾತುಕತೆ ನಡೆದಿರುವುದನ್ನು ಸ್ವತಃ ಅಮೆರಿಕವೇ ಸ್ಪಷ್ಟಪಡಿಸಿದೆ.

ಇನ್ನೊಂದೆಡೆ, ಪಾಕಿಸ್ತಾನದ ಮಿತ್ರರಾಷ್ಟ್ರವಾಗಿರುವ ಚೀನಾ ಕೂಡ ಈ ಬೆಳವಣಿಗೆಯಿಂದ ಗಲಿಬಿಲಿಗೊಂಡಿದೆ. ಮಂಗಳವಾರ ಪಾಕ್‌ ಅನ್ನು ಸಮರ್ಥಿಸಿಕೊಂಡ ಚೀನಾ, ಭಯೋತ್ಪಾದನೆಯನ್ನು ನಿರ್ಮೂಲನೆ ಮಾಡುವ ನಿಟ್ಟಿನಲ್ಲಿ ಪಾಕಿಸ್ತಾನವು ಕಠಿಣ ಕ್ರಮಗಳನ್ನು ಕೈಗೊಳ್ಳುತ್ತಿದೆ. ಜತೆಗೆ, ಹಲವು ತ್ಯಾಗಗಳನ್ನೂ ಮಾಡಿದೆ. ಇದನ್ನು ವಿಶ್ವ ಸಮುದಾಯವನ್ನು ಪರಿಗಣಿಸಬೇಕು ಎಂದು ಹೇಳಿದೆ.