ಭಾರತ-ಅಮೆರಿಕ ನಡುವಿನ ವ್ಯಾಪಾರ ಒಪ್ಪಂದ ವೇಗವಾಗಿ ನಡೆಯುತ್ತಿದೆ : ಸೀತಾರಾಮನ್‌

Team Udayavani, Oct 20, 2019, 6:32 PM IST

ವಾಷಿಂಗ್ಟನ್ : ಭಾರತ ಮತ್ತು ಅಮೆರಿಕದ ನಡುವಿನ ವ್ಯಾಪಾರ ಸಂಬಂಧ ಉತ್ತಮವಾಗಿದ್ದು, ವ್ಯಾಪಾರ ಒಪ್ಪಂದದ ಆಧಾರಿತ ಪ್ರಕ್ರಿಯೆಯ ಮಾತುಕತೆ ತೀವ್ರಗತಿಯಲ್ಲಿ ನಡೆಯುತ್ತಿದೆ ಎಂದು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್‌ ಹೇಳಿದ್ದಾರೆ.

ಭಾನುವಾರ ಸುದ್ದಿಗಾರರೊಂದಿಗೆ ಮಾತನಾಡಿರುವ ಅವರು ಭಾರತ ಹಾಗೂ ಅಮೆರಿಕಾ ನಡುವೆ ನಡೆಯುತ್ತಿರುವ ವ್ಯಾಪಾರ- ವಹಿವಾಟಿನ ಕುರಿತು ನಡೆಯುತ್ತಿರುವ ಮಾತುಕತೆ ವೇಗವಾಗಿ ಸಾಗುತ್ತಿದ್ದು, ಯಶಸ್ವಿಯಾಗಿ ಶೀಘ್ರದಲ್ಲೇ ಮುಕ್ತಾಯಗೊಳ್ಳಲಿದೆ ಎಂಬ ಭರವಸೆ ವ್ಯಕ್ತಪಡಿಸಿದ್ದಾರೆ.

ಐಎಂಎಫ್ ಕೇಂದ್ರ ಕಚೇರಿಯಲ್ಲಿ ಸೀತಾರಾಮನ್‌ ಮತ್ತು ಯುಎಸ್‌ ಖಜಾನೆ ಕಾರ್ಯದರ್ಶಿ ಸ್ಟೀವನ್‌ ಮ್ಯೂಚಿನ್‌ ನಡುವೆ ಮಾತುಕತೆ ನಡೆದಿದ್ದು, ವ್ಯಾಪಾರ ಒಪ್ಪಂದದಲ್ಲಿನ ಅಂಶಗಳನ್ನು ಸಂಕ್ಷಿಪ್ತವಾಗಿ ಚರ್ಚಿಸಲಾಯಿತು.

ಇನ್ನು ಒಪ್ಪಂದದ ಸಲುವಾಗಿ ಮ್ಯೂಚಿನ್‌ ಮುಂದಿನ ತಿಂಗಳ ಆರಂಭದಲ್ಲಿ ಭಾರತಕ್ಕೆ ಭೇಟಿ ನೀಡಲಿದ್ದು, ಈ ಕುರಿತು ಮತ್ತಷ್ಟು ವಿಶಾಲವಾಗಿ ಮಾತುಕತೆ ನಡೆಯಲಿದೆ ಎಂದು ಅವರು ತಿಳಿಸಿದರು.