ವಿಶ್ವದ ಅತಿ ಎತ್ತರದ ಮಹಿಳೆಗೆ ಮತ್ತೆ 3 ದಾಖಲೆಯ ಗರಿ

Team Udayavani, Apr 21, 2022, 7:45 AM IST

ಅಂಕಾರಾ: ವಿಶ್ವದ ಅತಿ ಎತ್ತರದ ಮಹಿಳೆ ಎನ್ನುವ ರೆಕಾರ್ಡ್‌ ಹೊಂದಿರುವ 25ರ ಯುವತಿ ರುಮೆಯ್ಸಾ ಗೆಲ್ಗಿಗೆ ಇದೀಗ ಮತ್ತೆ ಹೊಸದಾಗಿ ಮೂರು ರೆಕಾರ್ಡ್‌ಗಳು ಸಿಕ್ಕಿವೆ. ಈ ಮೂಲಕ ಗೆಲ್ಗಿಯ ಗಿನ್ನೆಸ್‌ ರೆಕಾರ್ಡ್‌ಗಳ ಸಂಖ್ಯೆ 5ಕ್ಕೆ ಏರಿದೆ.

ವಿಶ್ವದಲ್ಲಿ ಅತಿ ಉದ್ದದ ಬೆರಳು ಹೊಂದಿರುವ ಮಹಿಳೆ, ಅತಿ ಉದ್ದದ ಕೈಗಳು (ಬಲಗೈ ಉದ್ದ- 24.93 ಸೆಂ.ಮೀ. ಎಡಗೈ ಉದ್ದ- 24.26 ಸೆಂ.ಮೀ.) ಹಾಗೂ ಅತಿ ಉದ್ದದ ಬೆನ್ನು (59.9ಸೆಂ.ಮೀ) ಹೊಂದಿರುವ ಮಹಿಳೆ ಎನ್ನುವ ರೆಕಾರ್ಡ್‌ಗಳನ್ನು ಗೆಲ್ಗಿಗೆ ಗಿನ್ನೆಸ್‌ ರೆಕಾರ್ಡ್ಸ್‌ ಸಂಸ್ಥೆ ಕೊಟ್ಟಿದೆ.

ಸದ್ಯ 7 ಅಡಿ 0.7 ಇಂಚು ಉದ್ದ ಇರುವ ಗೆಲ್ಗಿಯನ್ನು 2014ರಲ್ಲಿ ಅಳತೆ ಮಾಡಿದ್ದ ಗಿನ್ನೆಸ್‌ ರೆಕಾರ್ಡ್ಸ್‌ ಸಂಸ್ಥೆ, ಅತಿ ಉದ್ದದ ಯುವತಿ ಎನ್ನುವ ರೆಕಾರ್ಡ್‌ ಕೊಟ್ಟಿತ್ತು. ನಂತರ 2021ರಲ್ಲಿ ಮತ್ತೆ ಅಳತೆ ಮಾಡಿ ವಿಶ್ವದ ಅತಿ ಉದ್ದದ ಮಹಿಳೆ ಎನ್ನುವ ರೆಕಾರ್ಡ್‌ ಕೊಟ್ಟಿದೆ. ವೀವರ್‌ ಸಿಂಡ್ರೋಮ್‌ ಹೆಸರಿನ ಕಾಯಿಲೆಯಿಂದಾಗಿ ಗೆಲ್ಗಿ ಹೆಚ್ಚು ಎತ್ತರಕ್ಕೆ ಬೆಳೆದಿದ್ದಾರೆ.