ಮಾಜಿ ಪತ್ನಿ ಜತೆ ಮರು ವಿವಾಹ…88ನೇ ಬಾರಿ ಮದುವೆಯಾಗಲು ಹೊರಟ 61ರ ವೃದ್ಧ!

ಇಂಡೋನೇಷ್ಯಾದ 61 ವರ್ಷದ ರೈತನೊಬ್ಬ ಮದುವೆಯಾಗಲು ಹೊರಟಿದ್ದಾರೆ.

Team Udayavani, Nov 2, 2022, 6:37 PM IST

88ನೇ ಮದುವೆಯಾಗಲು ಹೊರಟ 61 ರ ವೃದ್ಧ: 86ನೇ ಹೆಂಡತಿಯೇ ಈ ಬಾರಿಯ ಪತ್ನಿ.!

ಇಂಡೋನೇಷ್ಯಾ: ನಿಯಮದ ಪ್ರಕಾರ ಒಂದು ಮದುವೆಯಾಗುವುದು ರೂಢಿ. ಆದರೆ ಕೆಲವರು ಮೂರು, ನಾಲ್ಕು ವಿವಾಹವಾಗಿರುವುದು ಓದಿರುತ್ತೀರಿ. ಆದರೆ ಇಲ್ಲೊಬ್ಬ ವ್ಯಕ್ತಿ ಎಷ್ಟು ಬಾರಿ ಮದುವೆಯಾಗಿದ್ದಾನೆ ಎನ್ನುವುದನ್ನು ಕೇಳಿದರೆ ಒಮ್ಮೆ ದಂಗಾಗಿ ಬಿಡುತ್ತೀರಿ.

ಇಂಡೋನೇಷ್ಯಾದ 61 ವರ್ಷದ ರೈತನೊಬ್ಬ ಮದುವೆಯಾಗಲು ಹೊರಟಿದ್ದಾರೆ. ಮೊಮ್ಮಕ್ಕಳೊಂದಿಗೆ ಆಟವಾಡುತ್ತಿರಬೇಕಾದ ಕಾನ್ ಎಂಬ ವ್ಯಕ್ತಿ 88ನೇ ಮದುವೆಯಾಗಲು ಹೊರಟಿದ್ದಾರೆ.!

ಅಚ್ಚರಿಯಾದರು ಇದು ಸತ್ಯ. ಇಂಡೋನೇಷ್ಯಾದ ಪಶ್ಚಿಮ ಜಾವಾದಲ್ಲಿ ಮಜಲೆಂಗ್ಕಾದ ಕಾನ್‌ 88ನೇ ಮದುವೆಯಾಗಲು ಸಿದ್ದರಾಗಿದ್ದಾರೆ. ವಿಶೇಷವೆಂದರೆ ಈ ಬಾರಿ ಮದುವೆಯಾಗಲಿರುವುದು ಹೊಸ ಹುಡುಗಿಯನ್ನಲ್ಲ. ಈ ಹಿಂದೆ 86ನೇ ಮದುವೆಯಾಗಿ ವಿಚ್ಚೇದನ ನೀಡಿದ ಅದೇ ಮಾಜಿ ಪತ್ನಿಯನ್ನು ಮತ್ತೊಮ್ಮೆ 88ನೇ ಪತ್ನಿಯಾಗಿ ವರಿಸಲಿದ್ದಾರೆ.

ಈ ಬಗ್ಗೆ ಮಾತನಾಡಿದ ಕಾನ್‌ ನಾನು ಮೊದಲ ಬಾರಿ ಮದುವೆ ಆದದ್ದು ನನ್ನ 14ನೇ ವರ್ಷದಲ್ಲಿ. ನನ್ನ ಹೆಂಡತಿ ನನಗಿಂತ ಎರಡು ವರ್ಷ ದೊಡ್ಡವಳಿದ್ದಳು. ನನ್ನ ವರ್ತನೆ ಅವಳಿಗೆ ಇಷ್ಟವಾಗಲಿಲ್ಲ. ಆ ಕಾರಣದಿಂದ ಅವಳು ನನ್ನಿಂದ ವಿಚ್ಚೇದನ ಪಡೆದುಕೊಂಡಳು” ಎಂದು ತಿಳಿಸಿದ್ದಾರೆ.

ಇದಾದ ಬಳಿಕ ನಾನು ಮಹಿಳೆಯರು ತನ್ನೆಡೆಗೆ ಬರಲು, ಪ್ರೀತಿಸುವಂತೆ ಮಾಡಲು ನಾನು ‘ಆಧ್ಯಾತ್ಮಿಕ’ ಜ್ಞಾನʼವನ್ನು ಪಡೆದುಕೊಂಡೆ. ಯಾವ ಹೆಂಗಸು ನನ್ನನು ನೋಡಿದರೆ ಪ್ರೀತಿಸುವಂತೆ ಆಯಿತು. ಆದರೆ ನಾನು ಮಹಿಳೆಯರಿಗೆ ಕೆಟ್ಟದ್ದನ್ನು ಬಯಸಿಲ್ಲ. ಅವರ ಭಾವನೆಯೊಂದಿಗೆ ಆಡಲು ಇಷ್ಟಪಡಲಿಲ್ಲ. ಅವರೊಂದಿಗೆ ಅನೈತಿಕತೆ ಮಾಡುವ ಬದಲು ಅವರನ್ನು ಮದುವೆಯಾಗುವುದೇ ಉತ್ತಮವೆಂದು ನಾನು ಮದುವೆಯಾಗುತ್ತ ಬಂದೆ ಎನ್ನುತ್ತಾರೆ.

ಮಾಜಿ ಪತ್ನಿಯನ್ನು ವರಿಸುವ ಬಗ್ಗೆ ಮಾತಾನಾಡುವ ಕಾನ್‌ , ನಾವು ದೂರವಾಗಿರಬಹುದು. ಆದರೆ ನಮ್ಮ ನಡುವಿನ ಪ್ರೀತಿ ಇನ್ನು ಗಟ್ಟಿಯಾಗಿಯೇ ಇದೆ ಎನ್ನುತ್ತಾರೆ. ಆದರೆ ಇದುವರೆಗೆ ಕಾನ್‌ ಅವರಿಗೆ ಎಷ್ಟು ಮಕ್ಕಳಿದ್ದಾರೆ ಎನ್ನುವುದು ಮಾತ್ರ ತಿಳಿದು ಬಂದಿಲ್ಲ.