ಯುಎಇಯ ಗೋಲ್ಡನ್‌ ವೀಸಾ ಕೊಡುಗೆ

Team Udayavani, Nov 16, 2020, 5:30 AM IST

ದುಬಾೖ: ಹೊರದೇಶಿಗರನ್ನು ಸೆಳೆಯಲು ಕಠೋರ ಕಾನೂನುಗಳನ್ನೆಲ್ಲ ಮೃದುಗೊಳಿಸಿದ್ದ ಯುಎಇ ಆಡಳಿತ ಈಗ ಮತ್ತೂಂದು ಸಿಹಿಸುದ್ದಿ ನೀಡಿದೆ. ಯುಎಇ ಪ್ರಧಾನಿ “ಗೋಲ್ಡನ್‌ ವೀಸಾ’ ಘೋಷಿಸಿದ್ದು, ಉದ್ಯೋಗ ನಿಮಿತ್ತ ಯುಎಇಯನ್ನು ನೆಚ್ಚಿಕೊಂಡ ವಿದೇಶಿಗರಿಗೆ ಇದು ಬಂಪರ್‌ ಉಡುಗೊರೆಯಾಗಲಿದೆ!

ಅದರಲ್ಲೂ ಸಹಸ್ರಾರು ಮಂದಿ ಭಾರತೀಯರ ಪಾಲಿಗೆ ಇದು ಅಕ್ಷರಶಃ ದೀಪಾವಳಿ ಕೊಡುಗೆ . ಗೋಲ್ಡನ್‌ ವೀಸಾ ಪಡೆದವರು ಪತ್ನಿ, ಮಕ್ಕಳೊಂದಿಗೆ ಯುಎಇ ನೆಲದಲ್ಲಿ 10 ವರ್ಷ ವಾಸವಿರಬಹುದು.

ಯಾರು ಅರ್ಹರು?
ಗೋಲ್ಡನ್‌ ವೀಸಾ ಪಡೆಯಲು ಯುಎಇ ಸರಕಾರವು ವಿವಿಧ ವೃತ್ತಿ, ವಿದ್ಯಾಭ್ಯಾಸ, ಕೌಶಲ ಆಧರಿಸಿ ಕೆಲವು ಅತ್ಯುನ್ನತ ಅರ್ಹತೆಗಳನ್ನೇ ಮುಂದಿಟ್ಟಿದೆ.

ಯಾರೆಲ್ಲ ಅರ್ಜಿ ಸಲ್ಲಿಸಬಹುದು?
ಪಿಎಚ್‌ಡಿ ಪದವೀಧರರು: ಪಿಎಚ್‌ಡಿ ಪದವಿ ಹೊಂದಿ ಉದ್ಯೋಗದಲ್ಲಿರುವವರು ಗೋಲ್ಡನ್‌ ವೀಸಾಕ್ಕೆ ಅರ್ಜಿ ಸಲ್ಲಿಸಬಹುದು. ಆದರೆ ಇವರು ಯುಎಇ ನಿಗದಿಪಡಿಸಿದ ಜಗತ್ತಿನ ಟಾಪ್‌ 500 ವಿ.ವಿ.ಗಳಲ್ಲಿ ಪಿಎಚ್‌ಡಿ ಪೂರೈಸಿರಬೇಕು.

 ವೈದ್ಯರು: ಗೋಲ್ಡನ್‌ ವೀಸಾ ಆಫ‌ರ್‌ ಮೂಲಕ ಯುಎಇಯ ವಿದೇಶಿ ವೈದ್ಯರನ್ನು ತನ್ನತ್ತ ಆಕರ್ಷಿಸುತ್ತಿದೆ. ಈ ಮೂಲಕ ಸಾಂಕ್ರಾಮಿಕ ರೋಗ ನಿಯಂತ್ರಿಸುವ ಗುರಿ ಹೊಂದಿದೆ. ಸಾಂಕ್ರಾಮಿಕ ರೋಗಶಾಸ್ತ್ರದಲ್ಲಿ ನಿಪುಣರಾದ ವೈದ್ಯರಿಗೆ ಯುಎಇಯು ಹೆಚ್ಚು ಆದ್ಯತೆ ಕಲ್ಪಿಸಿದೆ.

 ಎಂಜಿನಿಯರ್‌ಗಳು: ತಾಂತ್ರಿಕ ಪ್ರತಿಭೆಗಳಿಗೂ ಯುಎಇ ಗೋಲ್ಡನ್‌ ವೀಸಾ ಮೂಲಕ ರತ್ನಗಂಬಳಿ ಹಾಸಿದೆ. ಕಂಪ್ಯೂಟರ್‌, ಎಲೆಕ್ಟ್ರಾನಿಕ್ಸ್‌, ಪ್ರೋಗ್ರಾಮಿಂಗ್‌, ಎಲೆಕ್ಟ್ರಿಕಲ್ಸ್‌, ಆ್ಯಕ್ಟಿವ್‌ ಟೆಕ್ನಾಲಜಿ, ಎಐ ಮತ್ತು ಬಿಗ್‌ ಡೇಟಾ ಎಂಜಿನಿಯರ್‌ಗಳೂ ಅರ್ಹತೆಯ ಪಟ್ಟಿಯಲ್ಲಿದ್ದಾರೆ.

ಹೆಚ್ಚು ಅರ್ಹರು: ಮಾನ್ಯತೆ ಪಡೆದ ವಿ.ವಿ.ಗಳಲ್ಲಿ 3.8ಕ್ಕೂ ಅತಿಹೆಚ್ಚು ಅಂಕ ಪಡೆದ, ಹೆಚ್ಚು ಅರ್ಹತೆಯುಳ್ಳ ವ್ಯಕ್ತಿಗಳಿಗೂ ಈ ವೀಸಾ ಲಭ್ಯವಿರಲಿದೆ.

 ವಿಜ್ಞಾನಿಗಳು/ ಸಂಶೋಧಕರು: ವಿಶೇಷ ಸಾಧಕ ವಿಜ್ಞಾನಿ – ಸಂಶೋಧಕರೂ ಅರ್ಹರು. ಆದರೆ ವಿಜ್ಞಾನಿ ಗಳಿಗೆ ಎಮಿರೇಟ್ಸ್‌ ಸೈಂಟಿಸ್ಟ್‌ ಕೌನ್ಸಿಲ್‌ ನೋಂದಣಿ ಕಡ್ಡಾಯ.

 ಸಂಶೋಧಕರು: ಯುಎಇ ಆರ್ಥಿಕತೆಗೆ ನೆರವಾಗುವಂಥ ಉತ್ಪನ್ನಗಳ ಸಂಶೋಧಕರಿಗೂ ಅವಕಾಶವಿದೆ. ಆದರೆ ಇವರು ವಿತ್ತ ಸಚಿವಾಲಯ ಅನುಮೋದಿಸಿದ ಪೇಟೆಂಟ್‌ ಹೊಂದಿರುವುದು ಕಡ್ಡಾಯ.

 ಕಲಾವಿದರು: ಸಂಸ್ಕೃತಿ, ಕಲೆಯಂಥ ಸೃಜನಶೀಲ ಕ್ಷೇತ್ರಗಳ ಖ್ಯಾತ ಕಲಾವಿದರೂ ಪಟ್ಟಿಯಲ್ಲಿದ್ದಾರೆ. ಸಂಸ್ಕೃತಿ ಇಲಾಖೆಯಲ್ಲಿ ಅವರ ರಚನೆ ಗಳು ನೋಂದಾಯಿಸಲ್ಪಟ್ಟಿರಬೇಕು.

 ಹೂಡಿಕೆದಾರರು: ಯುಎಇಯಲ್ಲಿ 20 ದಶಕೋಟಿ ರೂ. ಹೂಡಿಕೆ ಸಾಮರ್ಥ್ಯದ ಉದ್ಯಮಿಗಳೂ ಅರ್ಹರು.