ಲೀಸ್ಟರ್‌ ಗಲಭೆಗೆ ಹಿಂದೂ ಫೋಬಿಯ ಕಾರಣ; ಬ್ರಿಟನ್‌ ಪ್ರತಿಪಕ್ಷ ನಾಯಕ ಕೀರ್‌ ಸ್ಟಾರ್ಮರ್‌ ಟೀಕೆ

Team Udayavani, Oct 8, 2022, 7:30 AM IST

ಲಂಡನ್‌: ಭಾರತ ಮತ್ತು ಪಾಕಿಸ್ತಾನ ನಡುವಿನ ಏಷ್ಯಾ ಕಪ್‌ ಪಂದ್ಯದ ಬಳಿಕ ಬ್ರಿಟನ್‌ನ ಲೀಸ್ಟರ್‌ ಮತ್ತು ಬರ್ಮಿಂಗ್‌ಹ್ಯಾಮ್‌ನಲ್ಲಿ ನಡೆದ ಕೋಮು ಗಲಭೆಗೆ ಹಿಂದೂ ಫೋಬಿಯಾ ಕಾರಣ ಎಂದು ಅಲ್ಲಿನ ಪ್ರತಿಪಕ್ಷ ಲೇಬರ್‌ ಪಾರ್ಟಿಯ ನಾಯಕ ಕೀರ್‌ ಸ್ಟಾರ್ಮರ್‌ ಆರೋಪಿಸಿದ್ದಾರೆ.

ಇದರ ಜತೆಗೆ ಹಿಂದೂಗಳನ್ನು ಗುರಿಯಾಗಿರಿಸಿಕೊಂಡು ನಡೆಯುತ್ತಿರುವ ಜನಾಂಗೀಯ ನಿಂದನೆ ವಿರುದ್ಧ ಹೋರಾಟಕ್ಕೂ ಬದ್ಧವಾಗಿ ಇರುವುದಾಗಿ ಅವರು ಹೇಳಿದ್ದಾರೆ.

ಲಂಡನ್‌ನಲ್ಲಿ ನವರಾತ್ರಿ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಕೀರ್‌ ಸ್ಟಾರ್ಮರ್‌, ಒಡೆದು ಆಳುವ ರಾಜಕೀಯಕ್ಕೆ ಅಂತ್ಯಹಾಡಲಾಗುವುದು. ಸಮುದಾಯಗಳ ನಡುವೆ ದ್ವೇಷ ಹರಡಲು ಮಾಧ್ಯಮವನ್ನು ಬಳಸಿಕೊಳ್ಳುತ್ತಿರುವವರನ್ನು ಹತ್ತಿಕ್ಕಲಾಗುತ್ತದೆ ಎಂದಿದ್ದಾರೆ.

ಕಳೆದ ತಿಂಗಳು ಲೀಸ್ಟರ್‌ನಲ್ಲಿ ನಡೆದ ಸಂಘರ್ಷವು ಹಿಂದೂಫೋಬಿಯಾ ಅಥವಾ ಹಿಂದೂಗಳನ್ನು ಗುರಿಯಾಗಿಸಿ ನಡೆಸುತ್ತಿರುವ ಜನಾಂಗೀಯ ನಿಂದನೆಯನ್ನು ಪ್ರತಿಫ‌ಲಿಸಿದೆ. ಇದಕ್ಕೆ ಸಾಮಾಜಿಕ ಮಾಧ್ಯಮಗಳಲ್ಲಿನ ಸುಳ್ಳು ಮಾಹಿತಿಗಳು ಮತ್ತಷ್ಟು ಪ್ರಚೋದನೆ ನೀಡಿವೆ ಎಂದು ಬ್ರಿಟನ್‌ನ ಭಾರತೀಯ ಸಮುದಾಯದ ಕೆಲವು ಸಂಘಟನೆಗಳು ಆರೋಪಿಸಿವೆ.