ಜಲಿಯನ್‌ವಾಲಾ ಬಾಗ್‌ ಹತ್ಯಾಕಾಂಡಕ್ಕೆ ಕ್ಷಮೆ: ಬ್ರಿಟನ್‌ ಚಿಂತನೆ

Team Udayavani, Feb 20, 2019, 12:18 PM IST

ಲಂಡನ್‌ : 1919ರ ಎಪ್ರಿಲ್‌ 13ರಂದು ಪಂಜಾಬಿನ ಜಲಿಯನ್‌ವಾಲಾ ಬಾಗ್‌ನಲ್ಲಿ  ವೈಶಾಖೀ ಹಬ್ಬದ ಆಚರಣೆ ಸಲುವಾಗಿ ಸೇರಿದ್ದ ಜನಸ್ತೋಮದ ಮೇಲೆ ಜನರಲ್‌ ಡಯರ್‌ ಗುಂಡಿನ ಸುರಿಮಳೆ  ಗೈದು ನಡೆಸಿದ್ದ ಭಾರೀ ನರಮೇಧಕ್ಕೆ ನೂರು ವರ್ಷ ತುಂಬುತ್ತಿರುವ ಸಂದರ್ಭದಲ್ಲಿ ಆ ಐತಿಹಾಸಿಕ ಹತ್ಯಾಕಾಂಡಕ್ಕೆ ಕ್ಷಮೆಯಾಚಿಸಲು ಮತ್ತು ಅತ್ಯಂತ ಗೌರವಯುತ  ಶತಮಾನಾಚರಣೆ ನಡೆಸಲು ಬ್ರಿಟನ್‌ ಸರಕಾರ ಚಿಂತನೆ ನಡೆಸುತ್ತಿದೆ.

ಬ್ರಿಟನ್‌ ಸಂಸತ್ತಿನ ಕೆಳಮನೆಯಲ್ಲಿ ಅಮೃತಸರ ನರಮೇಧ : ಶತಮಾನ ವಿಷಯದ ಮೇಲಿನ ಚರ್ಚೆಯಲ್ಲಿ ಸರಕಾರಿ ವಿಪ್‌ ಆಗಿರುವ ಬ್ಯಾರೋನೆಸ್‌ ಅನಾಬೆಲ್‌ ಗೋಲ್ಡಿ ಅವರು ಈ ವಿಷಯವನ್ನು ದೃಢೀಕರಿಸಿದರು. 

ಜಲಿಯಾನ್‌ವಾಲಾ ಬಾಗ್‌ ಹತ್ಯಾಕಾಂಡದ ಬಳಿಕ ಆಗಿನ ಬ್ರಿಟಿಷ್‌ ರಾಜ್‌ ಘಟನೆ ಬಗ್ಗೆ ವಿಷಾದ ವ್ಯಕ್ತಪಡಿಸಿತ್ತು. ಆದರೆ ಅನಂತರ ಯಾವುದೇ ಬ್ರಿಟಿಷ್‌ ಸರಕಾರ ಅಧಿಕೃತವಾಗಿ ಕ್ಷಮೆಯಾಚಿಸಿಲ್ಲ ಎಂದು ಬ್ಯಾರೋನೆಸ್‌ ಹೇಳಿದರು.