“ನಿಕೋಬಾರಿ ಹಟ್‌’ಗೆ ಶೀಘ್ರ GI tag?

Team Udayavani, Apr 10, 2023, 7:45 AM IST

ಪೋರ್ಟ್‌ಬ್ಲೇರ್‌: ತಲೆಕೆಳಗಾದ ಹೆಲ್ಮಟ್‌ ಆಕಾರದಲ್ಲಿರುವ “ನಿಕೋಬಾರಿ ಹಟ್‌’ಗೆ ಶೀಘ್ರದಲ್ಲೇ ಭೌಗೋಳಿಕ ಮಾನ್ಯತೆ (ಜಿಐ) ಟ್ಯಾಗ್‌ ದೊರೆಯುವ ಸಾಧ್ಯತೆ ಇದೆ. ಅಲ್ಲದೇ ನಿಕೋಬಾರಿ ಮ್ಯಾಟ್‌ ಮತ್ತು ವರ್ಜಿನ್‌ ಕೊಬ್ಬರಿ ಎಣ್ಣೆಗೆ ಜಿಐ ಟ್ಯಾಗ್‌ಗಾಗಿ ಅರ್ಜಿ ಸಲ್ಲಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇತ್ತೀಚೆಗೆ ನಿಕೋಬಾರ್‌ ಬುಡುಕಟ್ಟು ಜನಾಂಗದ ಸಾಂಪ್ರದಾಯಿಕ ದೋಣಿ “ಹೋಡಿ’ಗೆ ಜಿಐ ಟ್ಯಾಗ್‌ ದೊರೆತಿತ್ತು.

“ನಿಕೋಬಾರಿ ಹಟ್‌ ಅನ್ನು ನಾವು “ಚಾನ್ವಿ-ಪಟಿ-ನೀ ಹುಫ‌ುಲ್‌’ ಎಂದು ಕರೆಯುತ್ತೇವೆ. ನಮ್ಮ ಸಮುದಾಯದ ಹಕ್ಕುಗಳು ಮತ್ತು ಹಿತಾಸಕ್ತಿಯನ್ನು ಕಾಪಾಡಲು, ಅದೇ ರೀತಿಯ ಪ್ರತಿಕೃತಿಗಳಿಂದ ಅದು ದುರುಪಯೋಗವಾಗದಂತೆ ತಡೆಯಲು ನಾವು ಜಿಐ ಟ್ಯಾಗ್‌ಗಾಗಿ ಅರ್ಜಿ ಸಲ್ಲಿಸಿದ್ದೇವೆ,’ ಎಂದು ಬುಡಕಟ್ಟು ಅಭಿವೃದ್ಧಿ ಮಂಡಳಿಯ ಅಧ್ಯಕ್ಷ ರಶೀದ್‌ ಯೂಸೂಫ್ ಹೇಳಿದ್ದಾರೆ.

ಜಿಐ ಟ್ಯಾಗ್‌ ಎನ್ನುವುದು ನಿರ್ದಿಷ್ಟ ಭೌಗೋಳಿಕ ಮೂಲ ಮತ್ತು ಗುಣಗಳನ್ನು ಹೊಂದಿರುವ ಉತ್ಪನ್ನಗಳಿಗೆ ನೀಡುವ ಸಂಕೇತವಾಗಿದೆ. ಇದು ನಿರ್ದಿಷ್ಟ ಪ್ರದೇಶದಲ್ಲಿ ಪ್ರತ್ಯೇಕವಾಗಿ ಕಂಡುಬರುವ ಯಾವುದೇ ಅನನ್ಯ ಉತ್ಪನ್ನಕ್ಕೆ ಕಾನೂನು ರಕ್ಷಣೆಯನ್ನು ಒದಗಿಸುತ್ತದೆ.