ಇರಾನ್ ಬೆಂಬಲಿತ ಸಿರಿಯಾ ಉಗ್ರರ ತಾಣಗಳ ಮೇಲೆ ಅಮೆರಿಕ ವೈಮಾನಿಕ ದಾಳಿ

Team Udayavani, Feb 26, 2021, 11:16 AM IST

ವಾಷಿಂಗ್ಟನ್: ಇತ್ತೀಚೆಗೆ ಇರಾಕ್ ನಲ್ಲಿನ ಅಮೆರಿಕದ ಸೇನಾ ನೆಲೆ ಮೇಲೆ ರಾಕೆಟ್ ದಾಳಿ ನಡೆಸಿದ್ದಕ್ಕೆ ಪ್ರತೀಕಾರವಾಗಿ ಅಮೆರಿಕ ಸೇನೆ ಇರಾನ್ ಬೆಂಬಲಿತ ಸಿರಿಯಾ ಉಗ್ರರ ನೆಲೆಗಳ ಮೇಲೆ ಗುರುವಾರ(ಫೆ.25) ವೈಮಾನಿಕ ದಾಳಿ ನಡೆಸಿರುವುದಾಗಿ ವರದಿ ತಿಳಿಸಿದೆ.

ಇದನ್ನೂ ಓದಿ:ಜಾಗತಿಕ ಮಾರುಕಟ್ಟೆ ಎಫೆಕ್ಟ್: ಮುಂಬಯಿ ಷೇರುಪೇಟೆ ಸೆನ್ಸೆಕ್ಸ್ 1000 ಅಂಕ ಕುಸಿತ

ದಾಳಿ ಕುರಿತು ರಾಯಟರ್ಸ್ ವರದಿ ಮಾಡಿದ್ದು, ಉಗ್ರರ ವಿರುದ್ಧ ಕ್ರಮ ತೆಗೆದುಕೊಳ್ಳಲು ಮುಂದಾಗಿರುವುದಾಗಿ ಹೇಳಿರುವ ಅಮೆರಿಕ, ಕೇವಲ ಸಿರಿಯಾದ ಮೇಲೆ ಮಾತ್ರ ದಾಳಿ ನಡೆಸಬೇಕೆ ವಿನಃ, ಇರಾಕ್ ಮೇಲೆ ಬೇಡ ಎಂದು ಬೈಡೆನ್ ನಿರ್ದೇಶನ ನೀಡಿರುವುದಾಗಿ ವರದಿ ವಿವರಿಸಿದೆ.

ಸದ್ಯ ದಾಳಿ ಬಗ್ಗೆ ತನಿಖೆ ನಡೆಸುತ್ತಿರುವುದರಿಂದ ಇರಾಕ್ ಸರ್ಕಾರಕ್ಕೆ ಉಸಿರೆಳೆದುಕೊಳ್ಳಲು ಅವಕಾಶ ನೀಡುವ ಮೂಲಕ ಯಾವುದೇ ದಾಳಿಗೆ ಮುಂದಾಗಿಲ್ಲ ಎಂದು ಅಮೆರಿಕ ತಿಳಿಸಿದೆ. ಅಧ್ಯಕ್ಷ ಜೋ ಬೈಡೆನ್ ಅವರ ನಿರ್ದೇಶನದ ಮೇರೆಗೆ ಪೂರ್ವ ಸಿರಿಯಾದಲ್ಲಿರುವ ಇರಾನ್ ಬೆಂಬಲಿತ ಉಗ್ರರ ನೆಲೆ ಮೇಲೆ ಗುರುವಾರ ಸಂಜೆ ವೈಮಾನಿಕ ದಾಳಿ ನಡೆಸಲಾಗಿತ್ತು ಎಂದು ಪೆಂಟಾಗಾನ್ ವಕ್ತಾರ ಜಾನ್ ಕಿರ್ಬೈ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಕಟಾಬ್ ಹಿಜ್ಬುಲ್ಲಾ(ಕೆಎಚ್) ಮತ್ತು ಕಟಾಬ್ ಸಯ್ಯಿದ್ ಅಲ್ ಶುಹಾದಾ(ಕೆಎಸ್ ಎಸ್) ಸೇರಿದಂತೆ ಹಲವು ಇರಾನ್ ಬೆಂಬಲಿತ ಉಗ್ರರ ಶಿಬಿರದ ಮೇಲೆ ದಾಳಿ ನಡೆಸಲಾಗಿದೆ. ಆದರೆ ದಾಳಿಯಲ್ಲಿ ಸಂಭವಿಸಿದ ಸಾವು, ನೋವಿನ ಬಗ್ಗೆ ಅಮೆರಿಕ ಯಾವುದೇ ಅಧಿಕೃತ ಮಾಹಿತಿ ನೀಡಿಲ್ಲ ಎಂದು ವರದಿ ತಿಳಿಸಿದೆ.