ಪಾಕ್‌ ಬೈಕ್‌ ಸವಾರನ ಸಾವು: ಅಮೆರಿಕ ರಾಜತಂತ್ರಜ್ಞ ಸ್ವದೇಶಕ್ಕೆ

Team Udayavani, May 15, 2018, 11:13 AM IST

ಇಸ್ಲಾಮಾಬಾದ್‌ : ಕಳೆದ ವರ್ಷ ಸಂಭವಿಸಿದ್ದ ರಸ್ತೆ ಅಪಘಾತದಲ್ಲಿ ಪಾಕಿಸ್ಥಾನೀ ಬೈಕ್‌ ಸವಾರನ ಸಾವಿಗೆ ಕಾರಣರಾಗಿದ್ದ ಅಮೆರಿಕದ ಡಿಫೆನ್ಸ್‌ ಅಟಾಶೆ ಕರ್ನಲ್‌ ಜೋಸೆಫ್ ಹಾಲ್‌ ಅವರು  ತನಗೆ ವಿಚಾರಣೆಯಿಂದ ರಾಜತಾಂತ್ರಿಕ ರಕ್ಷಣೆ ಸಿಗುವುದರ ಕುರಿತಾದ ವಿವಾದದ ಹಿನ್ನೆಲೆಯಲ್ಲಿ ಸ್ವದೇಶಕ್ಕೆ ಮರಳಿರುವುದಾಗಿ ವರದಿಯಾಗಿದೆ.

ಜೋಸೆಫ್ ಹಾಲ್‌ ಅವರ ಕಾರು ಕಳೆದ ವರ್ಷ ಎ.7ರಂದು ಇಸ್ಲಾಮಾಬಾದ್‌ನಲ್ಲಿ ರಸ್ತೆ ಸಿಗ್ನಲ್‌ ಜಂಪ್‌ ಮಾಡಿದ ಕಾರಣ ಪಾಕ್‌ ಬೈಕ್‌ ಸವಾರ ಮೃತಪಟ್ಟಿದ್ದ . ಆ ಬಗ್ಗೆ ಪೊಲೀಸರು ಕೇಸು ದಾಖಲಿಸಿಕೊಂಡಿದ್ದರು. ಆದರೆ ಹಾಲ್‌ ಅವರಿಗೆ ರಾಜತಾಂತ್ರಿಕ ರಕ್ಷಣೆ ಇದ್ದ ಕಾರಣ ಅವರನ್ನು ಪೊಲಿಸರು ಬಂಧಿಸಿರಲಿಲ್ಲ.

ಹಾಲ್‌ ಅವರನ್ನು ಅಮೆರಿಕ ಸರಕಾರ ತನ್ನ ಕಾನೂನಿನ ಪ್ರಕಾರ ತನ್ನ ದೇಶದಲ್ಲಿ ವಿಚಾರಣೆಗೆ ಗುರಿ ಪಡಿಸುವುದೆಂದು ಹೇಳಿದ್ದುದನ್ನು ಅನುಸರಿಸಿ ಪಾಕ್‌ ಸರಕಾರ ಹಾಲ್‌ ವಿಚಾರಣೆಯನ್ನು ಕೈಬಿಟ್ಟಿತ್ತು. ಅಂತೆಯೇ ಹಾಲ್‌ ಅವರು ವಿಶೇಷ ವಿಮಾನದಲ್ಲಿ ಅಫ್ಘಾನಿಸ್ಥಾನಕ್ಕೆ ತೆರಳಿ ಅಲ್ಲಿಂದ ಅಮೆರಿಕಕ್ಕೆ ಮರಳಲಿದ್ದಾರೆ ಎಂದು ವರದಿಗಳು ತಿಳಿಸಿವೆ.