ಜಾರ್ಜಿಯಾ ಡೆಮಾಕ್ರಾಟ್‌ ತೆಕ್ಕೆಗೆ

Team Udayavani, Nov 21, 2020, 6:59 AM IST

ವಾಷಿಂಗ್ಟನ್‌: ರಿಪಬ್ಲಿಕನ್‌ ಬಾಹುಳ್ಯದ ಜಾರ್ಜಿಯಾವನ್ನು ತಮ್ಮ ತೆಕ್ಕೆಗೆ ಪಡೆಯುವಲ್ಲಿ ಕೊನೆಗೂ ಅಮೆರಿಕದ ನಿಯೋಜಿತ ಅಧ್ಯಕ್ಷ ಜೋ ಬೈಡೆನ್‌ ಯಶಸ್ವಿಯಾಗಿದ್ದಾರೆ. ಮತಗಳ ಮರುಎಣಿಕೆ ಪ್ರಕ್ರಿಯೆ ಶುಕ್ರವಾರ ಮುಗಿದಿದ್ದು, ಬೈಡೆನ್‌ 12,284 ಮತಗಳ ಅಂತರದಿಂದ ಜಯ ಗಳಿಸಿದ್ದಾರೆ. ಈ ಮೂಲಕ 1992ರ ಬಳಿಕ ಪ್ರಮುಖ ಪ್ರಾಂತ್ಯ ಜಾರ್ಜಿಯಾ­ದಲ್ಲಿ ಗೆಲುವಿನ ನಗೆ ಬೀರಿದ ಮೊದಲ ಡೆಮಾಕ್ರಾಟ್‌ ಎಂಬ ಹೆಗ್ಗಳಿಕೆಗೆ ಅವರು ಪಾತ್ರರಾಗಿದ್ದಾರೆ. ನ.3ರಂದು ನಡೆದ ಚುನಾವಣೆಯಲ್ಲಿ ಯಾವುದೇ ಅಕ್ರಮ ನಡೆದಿಲ್ಲ ಎನ್ನುವುದು ಮರುಎಣಿಕೆ­ಯಿಂದ ಸ್ಪಷ್ಟವಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಡಬ್ಲ್ಯುಎಚ್‌ಒಗೆ ಸೇರ್ಪಡೆ: ಇದೇ ವೇಳೆ, ಶುಕ್ರವಾರ ಮಾತನಾಡಿರುವ ಬೈಡೆನ್‌, “ವಿಶ್ವ ಆರೋಗ್ಯ ಸಂಸ್ಥೆಗೆ ಮತ್ತೆ ಅಮೆರಿಕ ಸೇರ್ಪಡೆ­ಯಾಗಲಿದೆ’ ಎಂದು ಘೋಷಿಸಿ­ದ್ದಾರೆ. ಜತೆಗೆ, ಚೀನವು ನಿಯಮ­­ಗಳಿಗೆ ಅನುಗುಣವಾಗಿ ನಡೆದು­ಕೊಳ್ಳಲಿ ಎಂದೂ ಹೇಳಿದ್ದಾರೆ. ಕೊರೊನಾ ಸೋಂಕಿಗೆ ಸಂಬಂಧಿಸಿ ಡಬ್ಲ್ಯುಎಚ್‌ಒ ಮೇಲೆ ಕಿಡಿಕಾರಿದ್ದ ಟ್ರಂಪ್‌ ಎಪ್ರಿಲ್‌ನಲ್ಲಿ, ವಿಶ್ವ ಆರೋಗ್ಯ ಸಂಸ್ಥೆಯಿಂದ ಹೊರಬರುವ ಘೋಷಣೆ ಮಾಡಿದ್ದರು.

ಟ್ರಂಪ್‌ ಕಾನೂನು ಸಲಹೆಗಾರನ ತಲೆಯಿಂದ ಇಳಿದಿದ್ದೇನು?
ಟ್ರಂಪ್‌ ಕಾನೂನುಪಡೆಯ ಪ್ರಮುಖರಾದ ರುಡಿ ಗಿಯುಲಾನಿ, ಸೋಲಿಗೆ ಕಾರಣಗಳನ್ನು ವಿವರಿಸುತ್ತಿದ್ದರು. ಅದೇ ವೇಳೆ ಅವರ ತಲೆಯ ಎಡ ಮತ್ತು ಬಲಬದಿಯಿಂದ ಕಪ್ಪುದ್ರವ ಇಳಿದು ಗಲ್ಲ ವನ್ನು ಮುಟ್ಟಿತು. ಅದೇನೆಂದು ಯಾರಿಗೂ ಅರ್ಥವಾಗಲಿಲ್ಲ. ಊಹೆಗಳ ಪ್ರಕಾರ ಅದು ಬೆವರಿನ ಪರಿಣಾಮ ತಲೆಗೆ ಹಚ್ಚಿದ್ದ ಬಣ್ಣ ದ್ರವಿ ಸಿದ್ದು. ಇನ್ನೊಂದು ಊಹೆಯ ಪ್ರಕಾರ, ಕಣ್ಣಿಗೆ ಹಾಕಿದ್ದ ಕನ್ನಡಕದ ಕಟ್ಟುಗಳಿಂದ ಇಳಿದಿದ್ದು. ಒಬ್ಬ ಕೇಶವಿನ್ಯಾಸಕನ ಪ್ರಕಾರ, ರುಡಿ ತಲೆಯ ಅಕ್ಕಪಕ್ಕದ ಭಾಗ ಸುಟ್ಟಂತಾಗಿದ್ದನ್ನು ಮರೆ ಮಾಚಲು ಹಚ್ಚಿದ್ದ ಕಾಡಿಗೆ. ವಿಚಿತ್ರವೆಂದರೆ ಸುದ್ದಿಗೋಷ್ಠಿ ಸುದ್ದಿಯಾಗುವುದರ ಬದಲು, ಈ ವಿಷಯ ಬಹಳ ಸುದ್ದಿ ಮಾಡಿತು.