ಪಾಕ್‌ಗೆ “ಉಗ್ರ’ ಎಚ್ಚರಿಕೆ

Team Udayavani, Oct 28, 2017, 6:00 AM IST

ವಾಷಿಂಗ್ಟನ್‌: ನಿಮ್ಮ ನೆಲದಲ್ಲಿನ ಉಗ್ರರ ವಿರುದ್ಧ ನೀವೇ ಕ್ರಮ ಕೈಗೊಳ್ಳಿ. ಇಲ್ಲದಿದ್ದರೆ ನಮ್ಮದೇ ವಿಧಾನದಲ್ಲಿ ನಾವು ಕ್ರಮ ಕೈಗೊಳ್ಳುತ್ತೇವೆ ಹೀಗೆಂದು ಪಾಕಿಸ್ತಾನಕ್ಕೆ ಅಮೆರಿಕ ಎಚ್ಚರಿಕೆಯ ಸಂದೇಶ ನೀಡಿದೆ. ಈ ಹಿಂದೆಯೇ ಪಾಕಿಸ್ತಾನದ ನೆಲದೊಳಗೆ ನುಗ್ಗಿ ಒಸಾಮಾ ಬಿನ್‌ ಲಾಡೆನ್‌ ಹತ್ಯೆ ಮಾಡಿದ್ದ ಅಮೆರಿಕ, ಅದೇ ರೀತಿಯ ದಾಳಿಯ ಸುಳಿವನ್ನೂ ನೀಡಿದೆ. ಅಲ್ಲದೆ, ಇತ್ತೀಚಿನ ದಿನಗಳಲ್ಲಿ ಪಾಕಿಸ್ತಾನದ ವಿರುದ್ಧ ಕಠಿಣವಾದ ನಿಲುವನ್ನೇ ತೆಗೆದುಕೊಂಡಿರುವ ಅಮೆರಿಕ, ಇದೀಗ ಮತ್ತಷ್ಟು ಖಡಕ್‌ ಸೂಚನೆಯನ್ನೂ ನೀಡಿದೆ.

ಪಾಕಿಸ್ತಾನ, ಭಾರತ ಮತ್ತು ಅಮೆರಿಕ ಪ್ರವಾಸ ನಡೆಸಿದ್ದ ಅಮೆರಿಕ ವಿದೇಶಾಂಗ ಸಚಿವ ರೆಕ್ಸ್‌ ಟಿಲ್ಲರ್‌ಸನ್‌ ಜಿನೀವಾದಲ್ಲಿ ಈ ಬಗ್ಗೆ ಮಾತನಾಡಿದ್ದಾರೆ. “”ನಾವು ಪಾಕಿಸ್ತಾನದಿಂದ ಏನನ್ನೂ ಬಯಸುತ್ತಿಲ್ಲ. ಆದರೆ,  ನಾವು ಆ ದೇಶದಲ್ಲಿರುವ ಉಗ್ರರ ಬಗ್ಗೆ ಮಾಹಿತಿಯನ್ನೂ ನೀಡಿದ್ದೇವೆ. ಈ ಮಾಹಿತಿಯಂತೆ ಉಗ್ರರ ವಿರುದ್ಧ ಪಾಕ್‌ ಕ್ರಮ ಕೈಗೊಳ್ಳಬೇಕು ಬಯಸುತ್ತೇವೆ. ಆದರೆ ನೀವೇನು  ಮಾಡಬೇಕು ಎಂಬುದನ್ನು ನಿರ್ಧರಿಸುವುದು ನಿಮ್ಮ ಕೈಯಲ್ಲೇ ಇದೆ. ನೀವು ಈ ಕ್ರಮ ಕೈಗೊಳ್ಳದಿದ್ದರೆ ನಮ್ಮ ವ್ಯೂಹಗಳನ್ನು ನಾವು ಬದಲಿಸಿ, ವಿಭಿನ್ನ ವಿಧಾನದಲ್ಲಿ ನಾವು ಉಗ್ರರ ವಿರುದ್ಧ ಕ್ರಮ ಕೈಗೊಳ್ಳುತ್ತೇವೆ ಎಂದು ಟಿಲ್ಲರ್‌ಸನ್‌ ಹೇಳಿದ್ದಾರೆ.

ನಾವೀಗ ನಮ್ಮ ಮಾತುಗಳನ್ನು ಕೇಳಿ ಎಂದು ಯಾರಿಗೂ ಸೂಚನೆ ನೀಡುತ್ತಿಲ್ಲ. ನಾನಂತೂ ಸದ್ಯಕ್ಕೆ ಹೊಸಬನಾಗಿದ್ದೇನೆ. ಈಗ ಶೇ.80 ರಷ್ಟು ಮಾತು ಕೇಳುತ್ತೇನೆ, ಶೇ.20ರಷ್ಟು ಮಾತ್ರ ನಾನೇ ಮಾತನಾಡುñತ್ತೇನೆ. ಅದರಲ್ಲೂ ಪಾಕಿಸ್ತಾನದ ನಾಯಕತ್ವದ ಜತೆಗೆ ಉತ್ತಮವಾಗಿಯೇ ಮಾತನಾಡಿದ್ದೇನೆ. ಅವರ ಮಾತುಗಳನ್ನು ಆಲಿಸಿಯೇ ಈ ಬಗ್ಗೆ ಸೂಚನೆ ನೀಡಲಾಗಿದೆ ಎಂದು ಟಿಲ್ಲರ್‌ಸನ್‌ ತಿಳಿಸಿದ್ದಾರೆ.

ಡೊನಾಲ್ಡ್‌ ಟ್ರಂಪ್‌ ಅಧಿಕಾರಕ್ಕೇರಿದ ನಂತರ ಪಾಕ್‌ ಬಗ್ಗೆ ಅಮೆರಿಕದ ನಿಲುವು ಕಠಿಣವಾಗಿದ್ದು, ಈ ಹಿಂದೆಯೂ ಹಲವು ಬಾರಿ ಉಗ್ರರ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಪಾಕ್‌ಗೆ ಸೂಚಿಸಲಾಗಿದೆ. ಭಾರತಕ್ಕೆ ಭೇಟಿ ನೀಡುವ ಮೊದಲು ಪಾಕ್‌ಗೆ ತೆರಳಿದ್ದ ವಿದೇಶಾಂಗ ಸಚಿವ ರೆಕ್ಸ್‌ ಟಿಲ್ಲರ್‌ಸನ್‌, ಪ್ರಧಾನಿ ಶಹೀದ್‌ ಖಾನ್‌ ಅಬ್ಟಾಸಿ ಹಾಗೂ ಸೇನಾ ಮುಖ್ಯಸ್ಥ ಜಾವೇದ್‌ ಬಾಜ್ವಾ ಜತೆ ಮಾತುಕತೆ ನಡೆಸಿದ್ದಾರೆ.

ಅಮೆರಿಕಕ್ಕೆ ಬಗ್ಗುವುದಿಲ್ಲ
ಅಮೆರಿಕದ ಎಚ್ಚರಿಕೆಯ ಬಗ್ಗೆ ಪ್ರತಿಕ್ರಿಯಿಸಿದ ಪಾಕ್‌ ವಿದೇಶಾಂಗ ಸಚಿವ ಖ್ವಾಜಾ ಅಸಿಫ್, ಅಮೆರಿಕಕ್ಕೆ ನಾವು ಶರಣಾಗುವುದೂ ಇಲ್ಲ. ನಮ್ಮ ಏಕಸ್ವಾಮ್ಯತೆಯೊಂದಿಗೆ ರಾಜಿಯನ್ನೂ ಮಾಡಿಕೊಳ್ಳುವುದಿಲ್ಲ. ಯಾವುದೇ ನಿರ್ದಿಷ್ಟ ಕ್ರಮಗಳನ್ನು ಕೈಗೊಳ್ಳುವಂತೆ ನಮಗೆ ಅಮೆರಿಕ ಸೂಚನೆ ನೀಡಿಲ್ಲ ಎಂದು ಹೇಳಿದ್ದಾರೆ.

75 ಉಗ್ರರ ಪಟ್ಟಿ: ಹಕ್ಕಾನಿ ಉಗ್ರ ಸಂಘಟನೆ ಹಾಗೂ ಇತರ ಉಗ್ರ ಸಂಘಟನೆಗಳ 75 ಉಗ್ರರ ಪಟ್ಟಿಯನ್ನು ಅಮೆರಿಕ ನೀಡಿದೆ. ಈ ಉಗ್ರರ ವಿರುದ್ಧ ತಕ್ಷಣವೇ ಕ್ರಮ ಕೈಗೊಳ್ಳಬೇಕು ಎಂದು ಅಮೆರಿಕ ಆಗ್ರಹಿಸಿದೆ. ಆದರೆ ಪಾಕಿಸ್ತಾನ ಮಾತ್ರ ಅಮೆರಿಕ ಇಂಥ ಯಾವುದೇ ಉಗ್ರರ ಪಟ್ಟಿಯನ್ನು ನೀಡಿಲ್ಲ ಎಂದು ವಾದಿಸುತ್ತಿದೆ.