ಬ್ರಿಟನ್‌ನ ಹಿರಿಯ ರಂಗಭೂಮಿ ನಿರ್ದೇಶಕ ಪೀಟರ್‌ ಬ್ರೂಕ್‌ ನಿಧನ 

Team Udayavani, Jul 4, 2022, 1:01 AM IST

ಲಂಡನ್‌: ಮಹಾಭಾರತ ಸೇರಿದಂತೆ ಜಗತ್ತಿನ ಹಲವಾರು ದೇಶಗಳ ಪುರಾಣ, ಜಗತ್ಪ್ರಸಿದ್ಧ ಕಲಾವಿದರ ಕೃತಿಗಳನ್ನು ಆಂಗ್ಲ ರಂಗಭೂಮಿಗೆ ಅಳವಡಿಸಿದ ಖ್ಯಾತಿಗೆ ಪಾತ್ರವಾಗಿದ್ದ, ಬ್ರಿಟನ್‌ ರಂಗ ಭೂಮಿಯ ಹಿರಿಯ ರಂಗ ನಿರ್ದೇಶಕ ಪೀಟರ್‌ ಬ್ರೂಕ್‌ (97) ನಿಧನ ಹೊಂದಿದ್ದಾರೆ.

ಕರ್ನಾಟಕದ “ನಾಟಕ ರತ್ನ’ ಗುಬ್ಬಿ ವೀರಣ್ಣನವರಂತೆ, ರಂಗಭೂಮಿಯಲ್ಲಿ ಹಲವಾರು ಪ್ರಯೋಗಗಳನ್ನು ಮಾಡಿ ಸೈ ಎನಿಸಿಕೊಂಡವರು ಬ್ರೂಕ್‌. ಶೇಕ್ಸ್‌ಪಿ ಯರ್‌ನ ಕಾವ್ಯಗಳಲ್ಲಿನ ಕಾಲ್ಪನಿಕ ಲೋಕವನ್ನು ರಂಗವೇದಿಕೆಗಳಲ್ಲಿ ಅಕ್ಷರಶಃ ಸೃಷ್ಟಿಸಿ ನೋಡುಗರನ್ನು ಮಂತ್ರಮುಗ್ಧಗೊಳಿಸಿದ್ದು ಇವರ ಕ್ರಿಯಾಶೀಲತೆಗೆ ಸಾಕ್ಷಿಯೆನಿಸಿತ್ತು.
ಅದರಲ್ಲೂ ವಿಶೇಷವಾಗಿ, ಶೇಕ್ಸ್‌ಪಿಯರ್‌ನ “ಎ ಮಿಡ್‌ ಸಮ್ಮರ್ಸ್‌ ನೈಟ್‌ ಡ್ರೀಮ್ಸ್‌’ ಎಂಬ ನಾಟಕ ಕ್ಕಾಗಿ ವೇದಿಕೆಯ ಮೇಲೆ ಹೂವುಗಳ ಲೋಕವನ್ನೇ ಸೃಷ್ಟಿಸಿ, ಎಲ್ಲ ಪಾತ್ರಧಾರಿಗಳನ್ನೂ ಶ್ವೇತವರ್ಣದ ವಸ್ತ್ರಗಳಲ್ಲೇ ನಟಿಸುವಂತೆ ಮಾಡಿ ಶೇಕ್ಸ್‌ಪಿಯರ್‌ರವರ ಕಲ್ಪನೆಯನ್ನು ಸಾಕಾರಗೊಳಿಸಿದ್ದು ಇವರಿಗೆ ಹೆಚ್ಚಿನ ಜನಪ್ರಿಯತೆ ತಂದುಕೊಟ್ಟಿತ್ತು. ಅವರ ಪ್ರಯೋಗಶೀಲತೆಗೆ ಇಡೀ ವಿಶ್ವವೇ ರಂಗಭೂಮಿ ಯಾಗಿತ್ತೆಂದು ಅವರ ನಿಧನಕ್ಕೆ ಶ್ರದ್ಧಾಂಜಲಿ ಸಲ್ಲಿಸಿರುವ ಬ್ರಿಟನ್‌ನ ವಿದ್ವಾಂಸರು ತಿಳಿಸಿದ್ದಾರೆ.

“ಮಹಾ’ ಪ್ರಯೋಗ: 1970ರ ಮಧ್ಯಭಾಗದಲ್ಲಿ ಮಹಾಭಾರತವನ್ನು ದೃಶ್ಯವೈಭವದಂತೆ ಪರಿಣಾಮಕಾರಿ ಯಾಗಿ ವೇದಿಕೆಯ ಮೇಲೆ ತಂದ ಹೆಗ್ಗಳಿಕೆ ಇವರದ್ದು. ಅದರಲ್ಲಿ 16 ದೇಶಗಳ ಸುಮಾರು 21 ಕಲಾವಿದರಿಂದ ಅಭಿನಯ ತೆಗೆದಿದ್ದರು. ಆ ಬೃಹನ್ನಾಟಕದಲ್ಲಿ ಭಾರತದ ಕಲಾವಿದೆ ಮಲ್ಲಿಕಾ ಸಾರಾ ಭಾಯಿ ಅವರು ದ್ರೌಪದಿಯ ಪಾತ್ರವನ್ನು ನಿರ್ವಹಿಸಿದ್ದರು. ಅವರ ಸಮಗ್ರ ಸಾಧನೆಯನ್ನು ಪರಿಗಣಿಸಿ ಭಾರತ ಸರಕಾರ ಕಳೆದ ವರ್ಷ, ಬ್ರೂಕ್‌ ಅವರಿಗೆ ಪ್ರತಿಷ್ಠಿತ “ಪದ್ಮಶ್ರೀ’ ನೀಡಿ ಗೌರವಿಸಿತ್ತು.