ಇನ್ನು ಟ್ರಂಪ್‌ ಜಮಾನ; ಅಮೆರಿಕದ 45ನೇ ಅಧ್ಯಕ್ಷರಾಗಿ ಪ್ರಮಾಣ ವಚನ

Team Udayavani, Jan 21, 2017, 3:45 AM IST

ವಾಷಿಂಗ್ಟನ್‌ ಡಿಸಿ: ಅಮೆರಿಕವನ್ನು ಹಾಗೂ ವಿಶ್ವವನ್ನು ಹೊಸ ದಿಶೆಯತ್ತ ಕೊಂಡೊಯ್ಯುವ ಆಶಾವಾದದೊಂದಿಗೆ ಅಮೆರಿಕದ 45ನೇ ಅಧ್ಯಕ್ಷರಾಗಿ ರಿಪಬ್ಲಿಕನ್‌ ಪಕ್ಷದ ಮುಖಂಡ ಡೊನಾಲ್ಡ್‌  ಟ್ರಂಪ್‌ ಶುಕ್ರವಾರ ಪ್ರಮಾಣ ವಚನ ಸ್ವೀಕರಿಸಿದರು. ಅಬ್ರಹಾಂ ಲಿಂಕನ್‌ ಅಧಿಕಾರ ಚುಕ್ಕಾಣಿ ಹಿಡಿಯುವಾಗ ಬಳಸಿದ ಬೈಬಲ್‌ ಹಾಗೂ ಶಾಲಾ ದಿನಗಳಲ್ಲಿ ತಾಯಿ ನೀಡಿದ ಬೈಬಲ್‌ಗ‌ಳನ್ನು  ಟ್ರಂಪ್‌ ತಮ್ಮ ಪ್ರಮಾಣ ವಚನಕ್ಕೆ ಬಳಸಿದರು.

ಶಪಥಗ್ರಹಣದ ತತ್‌ಕ್ಷಣವೇ ಸಂಚಲನ ಮೂಡಿಸುವ ಭಾಷಣ ಮಾಡಿದ ಅವರು, “ಅಧಿಕಾರವನ್ನು ವಾಷಿಂಗ್ಟನ್‌ ಡಿಸಿಯಿಂದ ಜನರಿಗೆ ಹಸ್ತಾಂತರಿಸಲಿದ್ದೇವೆ. ಇನ್ನು ಮಾತುಗಳು ನಿಲ್ಲಲಿವೆ. ಇನ್ನೇನಿದ್ದರೂ ಕೃತಿ. ಅಮೆರಿಕನ್ನರ ಕನಸು ಕಾರಗೊಳಿಸುವೆ’ ಎಂದು ಹೇಳಿದರು.

“2017ರ ಜ.20 “ಜನರೇ ದೊರೆಗಳಾದರು’ ಎಂಬ ಕಾರಣಕ್ಕೆ ನೆನಪಿನಲ್ಲಿ ಉಳಿಯಲಿದೆ. ಅಮೆರಿಕವು ಹೊಸ ದಿಶೆಯಲ್ಲಿ ಸಾಗಲಿದ್ದು ಬಹಳ ವರ್ಷ ಕಾಲ ನನ್ನ ಅಧ್ಯಕ್ಷತೆ ನೆನಪಿನಲ್ಲಿ ಉಳಿಯಲಿದೆ’ ಎಂದರು.

“ಈ ದಿನದಿಂದ ಅಮೆರಿಕಕ್ಕೇ ಮೊದಲ ಆದ್ಯತೆ. ಕಳೆದುಹೋದ ಉದ್ಯೋಗಗಳನ್ನು ಮರಳಿ ತರಲಿದ್ದೇವೆ. ಅಮೆರಿಕ ನೌಕರರು ಮತ್ತು ಕುಟುಂಬದವರಿಗೆ ನೆರವು ಆಗುವಂಥ ನಿರ್ಣಯಗಳನ್ನು ಕೈಗೊಳ್ಳಲಿದ್ದೇವೆ’ ಎಂದು ಭರವಸೆ ನೀಡಿದರು. ಈ ಮೂಲಕ ಭಾರತ ಸೇರಿದಂತೆ ಹಲ ವಿದೇಶಗಳಿಗೆ ನೀಡಿರುವ ಹೊರಗುತ್ತಿಗೆ ಕಡಿತಗೊಳಿಸುವ ಹಾಗೂ ಅಮೆರಿಕದಲ್ಲಿ ಭಾರತೀಯರು ಸೇರಿ ಅನೇಕ ವಿದೇಶೀಯರು ಪಡೆದಿರುವ ನೌಕರಿಗಳನ್ನು ಅಮೆರಿಕನ್ನರಿಗೆ ಹಸ್ತಾಂತರಿಸುವ ಮುನ್ಸೂಚನೆ ನೀಡಿದರು.

“ನಾವು ಭೂಮಿಯ ಚಹರೆಯಿಂದ ಇಸ್ಲಾಮಿಕ್‌ ಭಯೋತ್ಪಾದನೆಯನ್ನು ಮೂಲೋತ್ಪಾಟನೆ ಮಾಡಲಿದ್ದೇವೆ’ ಎಂದು ಟ್ರಂಪ್‌ ಗುಡುಗಿದರು.