ಕನಕಪುರ ಬಂಡೆಗೇ “ಬಂಡೆಯ ಹಾರ’ ಹಾಕಿದಾಗ…

Team Udayavani, Mar 29, 2023, 6:48 AM IST

ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್‌ ಅವರಿಗೆ ಅಭಿಮಾನಿಗಳು ಕನಕಪುರದ ಬಂಡೆ ಎಂದು ಪ್ರೀತಿಯಿಂದ ಕರೆಯುವ ವಾಡಿಕೆಯುಂಟು. ಡಿಕೆಶಿಯವರು ಎಂಥದ್ದೇ ಸಮಯದಲ್ಲೇ ಆಗಲಿ, ಬಂಡೆಯಂತೆ ಗಟ್ಟಿಯಾಗಿರ್ತಾರೆ ಎಂಬುದು ಈ ಮಾತಿನ ಮೂಲಾರ್ಥ.

ಡಿಕೆಶಿ ಕೂಡ ಅಭಿಮಾನಿಗಳ ಈ ಪ್ರೀತಿಯ ಬಿರುದನ್ನು ಒಪ್ಪಿಕೊಂಡಿದ್ದಾರೆ. ಡಿ.ಕೆ.ಶಿವಕುಮಾರ್‌ ಅವರು ಮಂಗಳವಾರ ಮಂಡ್ಯ ಜಿಲ್ಲೆಯ ಶ್ರೀರಂಗಪಟ್ಟಣದ ಬಾಬುರಾಯನಕೊಪ್ಪಲು ಗ್ರಾಮದಲ್ಲಿ ಪ್ರಜಾಧ್ವನಿಯಾತ್ರೆ ನಡೆಸಿದ್ದು ಈ ವೇಳೆ ಯುವ ಕಾಂಗ್ರೆಸ್‌ ಕಾರ್ಯಕರ್ತರು ಡಿಕೆಶಿಗೆ “ಬಂಡೆಯ ಹಾರ’ವನ್ನೇ ಹಾಕಿದ್ದಾರೆ.

ಈ ಮೂಲಕ ಕನಕಪುರ ಬಂಡೆಯನ್ನು ಯಾರಿಂದರೂ ಹೊಡೆಯಲು ಸಾಧ್ಯವಿಲ್ಲ ಎಂಬ ಸಂದೇಶವನ್ನು ರವಾನಿಸಿದ್ದಾರೆ. ಥರ್ಮಕೋಲ್‌ನಿಂದ ಈ ಬಂಡೆ ಹಾರವನ್ನು ತಯಾರಿಸಲಾಗಿದೆ. ಮೈಸೂರಿನ ಕಲಾವಿದರು ಈ ಹಾರ ತಯಾರಿಸಿಕೊಟ್ಟಿದ್ದಾರೆ.

ಎಲ್ಲರೂ ಹಣ್ಣು, ಹೂವು, ತರಕಾರಿಯಲ್ಲಿ ಹಾರ ಮಾಡಿ ಹಾಕುತ್ತಾರೆ. ಆದರೆ ನಮ್ಮ ಡಿಕೆಶಿಗೆ ನಾವು ಬಂಡೆಯ ಹಾರವನ್ನೇ ಹಾಕಿದ್ದೇವೆ ಎಂದು ಕಾರ್ಯಕರ್ತರು ಖುಷಿಯಿಂದ ಹೇಳಿಕೊಂಡಿದ್ದಾರೆ.