ಇಂದಿನಿಂದ ನಾಮಪತ್ರ ಸಲ್ಲಿಕೆಗೆ ಅವಕಾಶ

Team Udayavani, Apr 13, 2023, 7:05 AM IST

ಮಂಗಳೂರು : ಚುನಾವಣ ವೇಳಾಪಟ್ಟಿಯಂತೆ ಎ.13 ರಿಂದ ನಾಮಪತ್ರ ಸಲ್ಲಿಕೆ ಆರಂಭವಾಗಲಿದ್ದು, ಎ.20ರ ವರೆಗೆ ನಾಮಪತ್ರ ಸಲ್ಲಿಸಬಹುದು ಎಂದು ಡಿಸಿ ಹಾಗೂ ಜಿಲ್ಲಾ ಚುನಾವಣಾಧಿಕಾರಿ ರವಿ ಕುಮಾರ್‌ ಎಂ. ಆರ್‌ ತಿಳಿಸಿದ್ದಾರೆ.

ಬುಧವಾರ ಪತ್ರಿಕಾಗೋಷ್ಠಿಯಲ್ಲಿ ಅವರು ಮಾತನಾಡಿ, ನಾಮಪತ್ರ ಪರಿಶೀಲನೆಯ ದಿನ ಎ.21, ಎ.24 ನಾಮಪತ್ರ ಹಿಂಪಡೆಯಲು ಕೊನೆಯ ದಿನ. ಬೆಳಗ್ಗೆ 11ರಿಂದ ಮಧ್ಯಾಹ್ನ 3ರ ವರೆಗೆ ನಾಮಪತ್ರ ಸಲ್ಲಿಸಬಹುದು, ಅಭ್ಯರ್ಥಿ ಸೇರಿದಂತೆ ಒಟ್ಟು ಐದು ಮಂದಿ ಈ ಪ್ರಕ್ರಿಯೆ ವೇಳೆ ಇರಬಹುದು ಎಂದರು.

17.68 ಲಕ್ಷ ಮತದಾರರು
ಕಳೆದ ಎಪ್ರಿಲ್‌ 11ರ ವರೆಗೆ ಮತದಾರರ ಪಟ್ಟಿಗೆ ನೋಂದಣಿಗೆ ಅವಕಾಶ ನೀಡಲಾಗಿದ್ದು, ಜಿÇÉೆಯಲ್ಲಿ ಇದೀಗ ಅಂತಿಮವಾಗಿ ಒಟ್ಟು 17,68,031 ಮತದಾರರಿದ್ದಾರೆ. ಅದರಲ್ಲಿ 9,03,068 ಮಹಿಳಾ ಮತದಾರರು, 8,64,885 ಪುರುಷ ಮತದಾರರು ಮತ್ತು 78 ಲಿಂಗತ್ವ ಅಲ್ಪ ಸಂಖ್ಯಾಕರು. 18ರಿಂದ 19 ವರ್ಷದೊಳಗಿನ ಒಟ್ಟು 37,292 ಯುವ ಮತದಾರರಿದ್ದಾರೆ. ಬಂಟ್ವಾಳದಲ್ಲಿ ಅತಿ ಹೆಚ್ಚು ಅಂದರೆ 5266 ಯುವ ಮತದಾರರಿದ್ದಾರೆ ಎಂದರು.

80 ವರ್ಷ ಮೇಲ್ಪಟ್ಟವರು, ಅಂಗವಿಕಲರು ಮನೆಯಿಂದಲೇ ಮತದಾನ ಮಾಡಲು ಚುನಾವಣ ಆಯೋಗ ಅನುಮತಿ ನೀಡಿರುವ ಹಿನ್ನೆಲೆಯಲ್ಲಿ ದ.ಕ. ಜಿಲ್ಲೆಯಲ್ಲಿ ಈ ವರ್ಗದ ಶೇ.84ರಷ್ಟು ಮಂದಿಗೆ ಅಂಚೆ ಮತದಾನಕ್ಕೆ ಒಪ್ಪಿಗೆ ಪಡೆಯಲು 12ಡಿ ಫಾರಂಗಳನ್ನು ನೀಡಲಾಗಿದೆ. ಮೂರು ದಿನಗಳಲ್ಲಿ 12ಡಿ ನಮೂನೆಗಳ ವಿತರಣೆ ಪೂರ್ಣಗೊಳ್ಳಲಿದೆ ಎಂದರು.

ಮನೆಗೇ ಗುರುತಿನ ಚೀಟಿ
ಹೊಸದಾಗಿ ಸೇರ್ಪಡೆಯಾದ ಮತದಾರರಿಗೆ ಏಪ್ರಿಲ್‌ 20 ರಿಂದ ಗುರುತಿನ ಚೀಟಿ ಮುದ್ರಿಸುವ ಕಾರ್ಯ ಆರಂಭವಾಗಲಿದೆ. ಎ.21 ರಿಂದ ಸ್ಪೀಡ್‌ ಪೋಸ್ಟ್ ಮೂಲಕ ಮನೆ ಬಾಗಿಲಿಗೆ ಕಳುಹಿಸಲಾಗುವುದು. ಒಂದು ತಿಂಗಳಲ್ಲಿ 82,503 ಮತದಾರರ ಗುರುತಿನ ಚೀಟಿಗಳನ್ನು ಮನೆಗಳಿಗೆ ಕಳುಹಿಸಲಾಗಿದೆ. ವಿತರಣೆಯಾಗದ ಸ್ಪೀಡ್‌ ಪೋಸ್ಟ್‌ ಗಳನ್ನು ಚುನಾವಣಾಧಿಕಾರಿಗಳು ಸಂಗ್ರಹಿಸಿ ಅನಂತರ ಬಿಎಲ್ ಒಗಳ ಮೂಲಕ ಮತದಾರರಿಗೆ ತಲುಪಿಸಲಾಗುವುದು ಎಂದು ಜಿಲ್ಲಾಧಿಕಾರಿ ಮಾಹಿತಿ ನೀಡಿದರು. ಅಪರ ಡಿಸಿ ಕೃಷ್ಣಮೂರ್ತಿ ಉಪಸ್ಥಿತರಿದ್ದರು.

1.62 ಕೋಟಿ ರೂ. ನಗದು ವಶ
ಚುನಾವಣ ನೀತಿ ಸಂಹಿತೆ ಆರಂಭವಾದ ಬಳಿಕ ದ.ಕ. ಜಿಲ್ಲೆಯಲ್ಲಿ ಫ್ಲೆಯಿಂಗ್‌ ಸ್ಕ್ವಾಡ್‌ ತಂಡಗಳು 10.53 ಲಕ್ಷ ರೂ. ನಗದು ಹಣ ವಶಪಡಿಸಿಕೊಂಡಿದ್ದರೆ, ಸ್ಟಾಟಿಕ್‌ ಸರ್ವೆಲೆನ್ಸ್ ತಂಡಗಳು 1,57,20,000 ರೂ. ನಗದನ್ನು ವಶಪಡಿಸಿಕೊಂಡಿವೆ. ಪೊಲೀಸ್‌ ತಂಡಗಳು 1,38,500 ರೂ. ನಗದನ್ನು ವಶಪಡಿಸಿಕೊಂಡಿದ್ದಾರೆ. ಎಸ್‌ಎಸ್‌ಟಿ ತಂಡಗಳು ವಶಪಡಿಸಿಕೊಂಡ ಒಟ್ಟು ನಗದಿನಲ್ಲಿ 5 ಲಕ್ಷ ರೂ.ಗಳನ್ನು ದಾಖಲೆ ಪರಿಶೀಲನೆ ಬಳಿಕ ಮರಳಿಸಿದ್ದರೆ, ಪೊಲೀಸ್‌ ತಂಡಗಳು ವಶಪಡಿಸಿರುವ ಅಷ್ಟೂ ಮೊತ್ತವನ್ನು ಮರಳಿಸಲಾಗಿದೆ. ಅಂತಿಮವಾಗಿ 1,62,73,000 ರೂ.ಗಳನ್ನು ಸರಕಾರದ ಖಜಾನೆಗೆ ಜಮೆ ಮಾಡಲಾಗಿದೆ.

ಇಷ್ಟು ಮಾತ್ರವಲ್ಲದೆ, 4.41 ಲಕ್ಷ ರೂ. ಮೌಲ್ಯದ ಒಟ್ಟು 1138.83 ಲೀಟರ್‌ ಮದ್ಯ ವಶಪಡಿಸಿಕೊಳ್ಳಲಾಗಿದ್ದು, 8.29 ಲಕ್ಷ ರೂ ಮೌಲ್ಯದ 2.68 ಕೆಜಿ ಮಾದಕ ದ್ರವ್ಯ ವಶಪಡಿಸಿಕೊಳ್ಳಲಾಗಿದೆ. 19.25 ಲಕ್ಷ ರೂ. ಮೌಲ್ಯದ 2701 ಪ್ರಚಾರ ಸಾಮಗ್ರಿಗಳನ್ನು ವಶಪಡಿಸಿಕೊಳ್ಳಲಾಗಿದೆ.