ವಿಶ್ವನಾಥ್‌ ವಿರುದ್ಧ ಕೈ ,ದಳ ಅಭ್ಯರ್ಥಿಗಳು ರೆಡಿ

Team Udayavani, Apr 13, 2023, 2:02 PM IST

ಬೆಂಗಳೂರು: ಬೆಂಗಳೂರು ನಗರದ ಉಪನಗರವಾಗಿ ಗುರುತಿಸಲಾಗುವ, ದ್ವೈವಾರ್ಷಿಕ ಏರ್‌ ಶೋದಿಂದಾಗಿ ಜಾಗತಿಕ ನಕಾಶೆ ಯಲ್ಲಿ ಸ್ಥಾನ ಪಡೆದಿರುವ, ಪ್ರಾಚೀನ ಇತಿಹಾಸವುಳ್ಳ ಯಲಹಂಕ ಕ್ಷೇತ್ರದ ಚುನಾವಣಾ ಆಖಾಡ ಸಿದ್ಧವಾಗಿದೆ.

ಹಾಲಿ ಶಾಸಕ ಬಿಜೆಪಿಯ ಎಸ್‌. ಆರ್‌. ವಿಶ್ವನಾಥ್‌ ಅವರು ಬಿಜೆಪಿಯಿಂದ ಮತ್ತೆ ಅದೃಷ್ಟ ಪರೀಕ್ಷೆಗೆ ಇಳಿದಿದ್ದಾರೆ. ಅವರಿಗೆ ಜೆಡಿಎಸ್‌ನಿಂದ ಮುನೇಗೌಡ ಮತ್ತು ಕಾಂಗ್ರೆಸ್‌ನಿಂದ ಕೇಶವ ರಾಜಣ್ಣ ಪೈಪೋಟಿ ನೀಡಲು ಸಜ್ಜಾಗಿದ್ದಾರೆ. ಬೆಂಗಳೂರು ನಗರದ ಉತ್ತರ ತುದಿಯಲ್ಲಿರುವ ಯಲಹಂಕ ಲಾಗಾಯ್ತಿನಿಂದ ಕಾಂಗ್ರೆಸ್‌ ಮತ್ತು ಜನತಾ ಪರಿವಾರದ ಪ್ರಬಲ ಅಸ್ತಿತ್ವ ಹೊಂದಿದ್ದ ಕ್ಷೇತ್ರ. ಈ ಕ್ಷೇತ್ರದಲ್ಲಿ 2008ರಲ್ಲಿ ಎಸ್‌.ಆರ್‌. ವಿಶ್ವನಾಥ್‌ ಬಿಜೆಪಿ ಬಾವುಟ ಹಾರಿಸಿದ್ದರು. ಆದಾದ ನಂತರ ಅಶ್ವಮೇಧದ ಕುದುರೆಯಂತೆ ಓಡುತ್ತಿರುವ ವಿಶ್ವನಾಥ್‌ ಅವರನ್ನು ಕಟ್ಟಿ ಹಾಕಲು ಕಾಂಗ್ರೆಸ್‌, ಜೆಡಿಎಸ್‌ ನಡೆಸಿದ ಎಲ್ಲ ಪ್ರಯತ್ನಗಳು ವಿಫ‌ಲವಾಗಿವೆ.

2018ರಲ್ಲಿ 40 ಸಾವಿರಕ್ಕೂ ಹೆಚ್ಚು ಮತಗಳಿಂದ ವಿಶ್ವನಾಥ್‌ ಹ್ಯಾಟ್ರಿಕ್‌ ಗೆಲುವು ಸಂಪಾದಿಸಿ ಬಿಡಿಎ ಅಧ್ಯಕ್ಷರಾದರು. ವಿಶ್ವನಾಥ್‌ ಪ್ರಾಬಲ್ಯಕ್ಕೆ ಸಡ್ಡು ಹೊಡೆಯಲೇ ಬೇಕು ಎಂದು ಕಾಂಗ್ರೆಸ್‌ ಮತ್ತು ಜೆಡಿಎಸ್‌ ಪಣ ತೊಟ್ಟಿವೆ. ಕಾಂಗ್ರೆಸ್‌ನಿಂದ ಕೇಶವ ರಾಜಣ್ಣ ಅವರಿಗೆ ಟಿಕೆಟ್‌ ಘೋಷಿಸಲಾಗಿದ್ದು, ಟಿಕೆಟ್‌ ಆಕಾಂಕ್ಷಿಯಾಗಿದ್ದ ನಾಗರಾಜಗೌಡ ಬೆಂಬಲಿಗರ ಅಸಮಾಧಾನ ಬಹಿರಂಗವಾಗಿದೆ. ಉಳಿದಂತೆ ಲಾವಣ್ಯ ನರಸಿಂಹಮೂರ್ತಿ, ಪಿ.ಚಂದ್ರಪ್ಪ, ಗೋಪಿನಾಥ್‌ ಮುಂತಾದವರು ಟಿಕೆಟ್‌ ಆಕಾಂಕ್ಷಿಗಳಾಗಿದ್ದರು. ಜೆಡಿಎಸ್‌ ಈ ಕ್ಷೇತ್ರದಲ್ಲಿ ಗೆಲ್ಲಲೇ ಬೇಕು ಎಂದು ಪಣತೊಟ್ಟಿದ್ದು, ಮುನೇಗೌಡ ಈಗಾಗಲೇ ಕ್ಷೇತ್ರದಲ್ಲಿ ತಮ್ಮನ್ನು ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದಾರೆ. ಒಕ್ಕಲಿಗರ ಪ್ರಾಬಲ್ಯವಿರುವ ಈ ಕ್ಷೇತ್ರದಲ್ಲಿ ಎಸ್‌.ಆರ್‌.ವಿಶ್ವನಾಥ್‌ ಒಕ್ಕಲಿಗರಲ್ಲ ಎಂಬ ಬಾಣ ಈಗಾಗಲೇ ಪ್ರಯೋಗಿಸಿದ್ದು ವಿಶ್ವನಾಥ್‌ ಅವರಲ್ಲಿ ಗಲಿಬಿಲಿ ಸೃಷ್ಟಿಸಿದೆ.

ಆದರೆ ವಿಶ್ವನಾಥ್‌ ತಮ್ಮ ಅವಧಿಯಲ್ಲಿ ಕ್ಷೇತ್ರದಲ್ಲಿ ಸಾಕಷ್ಟು ಅಭಿವೃದ್ಧಿ ಕಾರ್ಯಗಳು ನಡೆದಿದ್ದು, ಕ್ಷೇತ್ರದ ಸಮಸ್ಯೆಗಳಿಗೆ ಸ್ಪಂದಿಸಿದ್ದು ಈ ಬಾರಿಯೂ ಗೆಲುವು ತಮ್ಮದೇ ಎಂಬ ವಿಶ್ವಾಸದಲ್ಲಿದ್ದಾರೆ. ಬೆಂಗಳೂರು ನಗರದ ಕ್ಷೀಪ್ರ ಪ್ರಗತಿಯ ಫ‌ಲ ಇದೀಗ ಯಲಹಂಕಕ್ಕೂ ತಲುಪಿದ್ದು, ಭೂಮಿ ಬೆಲೆ ಗಗನ ಮುಟ್ಟಿದೆ. ನಗರ ಮತ್ತು ಹಳ್ಳಿಯನ್ನು ಹೊಂದಿರುವ ಯಲಹಂಕ ಗ್ರಾಮೀಣ ಮತ್ತು ನಗರ ಭಾಗಗಳನ್ನು ಕಾಡುವ ಹತ್ತಾರು ಸಮಸ್ಯೆಗಳ ಆಗರವಾಗಿದೆ. ಆದರೆ ಶಿವರಾಮ ಕಾರಂತ ಬಡಾವಣೆಗೆ ಸಂಬಂಧಿಸಿದ ಭೂಸ್ವಾಧೀನ ಸಮಸ್ಯೆ 17 ಗ್ರಾಮಗಳನ್ನು ಬಾಧಿಸಿದ್ದು ವಿಶ್ವನಾಥ್‌ಗೆ ತಲೆನೋವು ತಂದಿದೆ. ಅದೇ ರೀತಿ ಯಲಹಂಕದಲ್ಲಿನ ಟ್ರಾಫಿಕ್‌ ಸಮಸ್ಯೆ ಜನರ ಆಕ್ರೋಶಕ್ಕೆ ಕಾರಣವಾಗಿದೆ. ಹಕ್ಕುಪತ್ರ ವಿತರಣೆ ಸರಿಯಾಗಿ ನಡೆದಿಲ್ಲ ಎಂಬ ಅಭಿಪ್ರಾಯವಿದೆ.

ಉಳಿದಂತೆ ರಸ್ತೆ, ಚರಂಡಿಯ ಸಮಸ್ಯೆಯು ಕ್ಷೇತ್ರವನ್ನು ಕಾಡುತ್ತಿದೆ. 3.73 ಲಕ್ಷ ಮತದಾರರಿರುವ ಈ ಕ್ಷೇತ್ರದಲ್ಲಿ 1.20 ಲಕ್ಷ ಒಕ್ಕಲಿಗ ಮತದಾರರಿದ್ದಾರೆ. ಪರಿಶಿಷ್ಟರ 90 ಸಾವಿರ ಮತ, 75 ಸಾವಿರ ಇತರ ಹಿಂದುಳಿದ ವರ್ಗದವರಿದ್ದಾರೆ. ಅಲ್ಪಸಂಖ್ಯಾತರ 30 ಸಾವಿರ, ಲಿಂಗಾಯತ 25 ಸಾವಿರ, ಬ್ರಾಹ್ಮಣರ 15 ಸಾವಿರ ಮತ್ತು ಇತರ ವರ್ಗದ ಮತದಾರರಿದ್ದಾರೆ. ಮೇಲ್ನೋಟಕ್ಕೆ ಒಕ್ಕಲಿಗರ ಪ್ರಾಬಲ್ಯವಿದ್ದರೂ ಸಹ ಇತರ ಪಂಗಡಗಳ ಮತದಾರರ ಸಂಖ್ಯೆ ಸಹ ನಿರ್ಣಾಯಕ ಪ್ರಮಾಣದಲ್ಲಿದೆ. ಈ ಬಾರಿ ಜಾತಿಯ ನೆಲೆಯಲ್ಲಿ ಚುನಾವಣೆ ನಡೆಯುತ್ತದೆಯೋ ಅಥವಾ ಅಭಿವೃದ್ಧಿ, ನಡತೆ ಮುಂತಾದ ಅಂಶಗಳು ನಿರ್ಣಾಯಕವಾಗಲಿದೆಯೇ ಎಂಬುದು ಕುತೂಹಲ.

ಯಲಹಂಕ:

2018ರಲ್ಲಿ ಏನಾಗಿತ್ತು?: ಎಸ್‌.ಆರ್‌.ವಿಶ್ವನಾಥ್‌ ಅವರು 1.20 ಲಕ್ಷ (ಶೇ.49) ಮತಗಳನ್ನು ಪಡೆದು 42,503 ಮತಗಳ ಭರ್ಜರಿ ಅಂತರ ದಿಂದ ಜೆಡಿಎಸ್‌ನ ಎ.ಎಂ.ಹನುಮಂತೇಗೌಡ (77,607 ಮತ) ಅವರನ್ನು ಮಣಿಸಿದ್ದರು. ಕಾಂಗ್ರೆಸ್‌ನ ಎಂ. ಎನ್‌. ಗೋಪಾಲಕೃಷ್ಣ 41,449 ಮತಗಳನ್ನಷ್ಟೇ ಪಡೆದಿದ್ದರು. ವಾರ್ಡ್‌ಗಳು ಎಷ್ಟು? : ಯಲಹಂಕ ವಿಧಾನಸಭಾ ಕ್ಷೇತ್ರದಲ್ಲಿ ಕೇಂಪೇಗೌಡ ವಾರ್ಡ್‌, ಚೌಡೇಶ್ವರಿ ವಾರ್ಡ್‌,