ಪ್ರವಾಸದ ಅನುಭವ ನೀಡುವ ಪೆರುವಿನ ಪವಿತ್ರ ಕಣಿವೆ

Team Udayavani, Nov 14, 2018, 3:41 PM IST

ಉದ್ಯೋಗ, ಮನೆ, ಮಕ್ಕಳು ಇರುವ ಸಾಂಪ್ರದಾಯಿಕ ಭಾರತೀಯ ಮಹಿಳೆಯರೂ ಒಂದು ಖಂಡದಿಂದ ಮತ್ತೊಂದು ಖಂಡಕ್ಕೆ ಧೈರ್ಯದಿಂದ ಪಯಣಿಸಬಹುದು ಎಂಬುದನ್ನು ಕಲಿಸಿಕೊಡುವ ಪ್ರವಾಸ ಕಥನ ನೇಮಿಚಂದ್ರ ಅವರ ಪೆರುವಿನ ಪವಿತ್ರ ಕಣಿವೆ. ಲೇಖಕಿ ತಮ್ಮ ಸಹೋದ್ಯೋಗಿ ಮಾಲತಿ ಜತೆ ದಕ್ಷಿಣ ಅಮೆರಿಕ ಖಂಡದ ಪೆರುವಿಗೆ ಹೋದ ಅನುಭವ ಮತ್ತು ಪೆರುವಿನ ಇತಿಹಾಸದ ಸಂಪೂರ್ಣ ಚಿತ್ರಣ ಈ ಪುಸ್ತಕದಲ್ಲಿದೆ.

ಘಟನೆ 1
ನಾಸ್ಕಾದ ಮರುಭೂಮಿಯಲ್ಲಿ ಅಡ್ಡಾಡಿದ ಅಪರೂಪದ ಪ್ರಯಾಣಿಕರಿಗೆ ನೆಲದ ಮಟ್ಟದಿಂದ ಈ ಗೆರೆಗಳಿಗೆ ಯಾವ ಅರ್ಥವೂ ಗೋಚರಿಸುತ್ತಿರಲಿಲ್ಲ. ಇಲ್ಲಿ ವಿಮಾನಗಳು ಹಾರಲು ಆರಂಭಿಸಿದ ಮೇಲೆ ಪ್ರಯಾಣಿಕರಿಗೆ ಈ ನೆಲದಲ್ಲಿನ ಬೃಹತ್‌ ಚಿತ್ರಗಳು ಗೋಚರಿಸತೊಡಗಿದವು. ವಿಮಾನದಿಂದ ತೆಗೆದ ಛಾಯಾಚಿತ್ರಗಳು ಅತ್ಯದ್ಭುತ ರೇಖಾ ಚಿತ್ರಗಳು ಗೋಚರಿಸಿದವು. ಮನುಷ್ಯ ಆಕಾಶದಲ್ಲಿ ಹಾರುವುದನ್ನು ಕಲಿತು ಕೇವಲ ನೂರು ವರ್ಷಗಳಾಗಿವೆ. ಈ ಚಿತ್ರಗಳು ಏನಿಲ್ಲವೆಂದರೂ 1,500 ವರ್ಷಗಳಷ್ಟು ಹಳೆಯವು. ಇದೇ ಇಲ್ಲಿನ ವಿಸ್ಮಯ.

ಘಟನೆ 2
ರೈಲಿನಲ್ಲಿ ಸಿಕ್ಕ ಕ್ಯಾಲಿಫೋರ್ನಿಯಾದ ಮಹಿಳೆ ನೇಮಿಚಂದ್ರ ಮತ್ತು ಮಾಲತಿಯವರ ಪರಿಚಯ ಕೇಳಿ ಆಶ್ಚರ್ಯಪಟ್ಟಳು. ಭಾರತದ ಇಬ್ಬರು ಮಹಿಳೆಯರು ಗಂಡ, ಮನೆ, ಮಕ್ಕಳನ್ನು ಬಿಟ್ಟು ಸ್ವತಂತ್ರವಾಗಿ ದೇಶ-ವಿದೇಶ ಸುತ್ತಲು ಹೊರಟಿರುವುದು ಆಕೆಗೆ ಅದ್ಭುತವಾಗಿ ಕಂಡಿತು. ಭಾರತದ ಬರೀ ನಕರಾತ್ಮಕ ಚಿತ್ರಗಳನ್ನೇ ಕಂಡು ಕೇಳಿದ ಆಕೆಗೆ ಭಾರತದ ಸಂಸ್ಕೃತಿಯ ಮತ್ತೊಂದು ಪರಿಚಯವನ್ನು ಮಾಡಿಸಿಕೊಟ್ಟರು.

ಘಟನೆ 3
ಅಮೆಜಾನ್‌ ನದಿಯ ಮೇಲೆ ಕನಸಿನ ಪಯಣ ಹೊರಟ ಲೇಖಕಿಗೆ ಬೋಟಿನಲ್ಲಿ ಮಿನಿ ಭಾರತವೇ ಕಂಡಿತು. ಬೋಟಿನವ ತಿನ್ನುತ್ತಿದ್ದ ಚಾಕಲೇಟನ್ನು ಎಲ್ಲರಿಗೂ ಹಂಚಿದ, ದಂಪತಿಯೋರ್ವರು ಬಿಸ್ಕೆಟ್‌ನ್ನು ದೋಣಿಯ ತುಂಬಾ ಹಂಚಿದರು. ಈ ಹಂಚಿ ತಿನ್ನುವ, ಎದುರಿಗಿರುವವರನ್ನು ಕೇಳುವ ಭಾರತೀಯ ಸಂಪ್ರದಾಯ ಮೈಲುಗಳಾಚೆಗಿನ ಪೆರುವಿನಲ್ಲಿ ಕಂಡು ಬಂತು.

ಸುಶ್ಮಿತಾ ಶೆಟ್ಟಿ