ಮುಂದಿನ ತಿಂಗಳಲ್ಲಿ ‘ಬೆಲ್ಚಪ್ಪ’

Team Udayavani, Jul 4, 2019, 5:00 AM IST

ಕೋಸ್ಟಲ್ವುಡ್‌ನ‌ಲ್ಲಿ ಆಡು ಭಾಷೆಯ ಟೈಟಲ್ ಮೂಲಕ ಗಮನ ಸೆಳೆದಿರುವ ರಜನೀಶ್‌ ದೇವಾಡಿಗ ನಿರ್ದೇಶನದ ಬೆಲ್ಚಪ್ಪ ಸಿನೆಮಾ ಬಿಡುಗಡೆಗೆ ರೆಡಿಯಾಗಿದೆ. ಈಗಿನ ಲೆಕ್ಕಾಚಾರದ ಪ್ರಕಾರ, ಸಿನೆಮಾವನ್ನು ಆಗಸ್ಟ್‌ನಲ್ಲಿ ಬಿಡುಗಡೆ ಮಾಡಲು ನಿರ್ಧರಿಸಲಾಗಿದೆ. ಆಗ ಕೆಲವು ಕನ್ನಡ ಸಿನೆಮಾಗಳು ಕೂಡ ಬಿಡುಗಡೆಗೆ ಸಿದ್ಧವಾಗಲಿದ್ದು, ಚಿತ್ರಮಂದಿರದ ಲಭ್ಯತೆ ನೋಡಿಕೊಂಡು ದಿನ ನಿಗದಿ ಮಾಡಲು ಯೋಚಿಸಲಾಗಿದೆ.

ರಜನೀಶ್‌ ದೇವಾಡಿಗ ನಿರ್ದೇಶನದ ಎರಡನೇ ಸಿನೆಮಾ ಇದು. ಇದಕ್ಕಿಂತ ಮೊದಲು ‘ಕೋರಿರೊಟ್ಟಿ’ ಸಿನೆಮಾವನ್ನು ಮಾಡಿದ್ದರು.

ಅರವಿಂದ ಬೋಳಾರ್‌ ಪ್ರಮುಖ ಪಾತ್ರದಲ್ಲಿರುವ ಈ ಸಿನೆಮಾದಲ್ಲಿ ಸಂಪೂರ್ಣ ಹಾಸ್ಯವೇ ಪ್ರಾಮುಖ್ಯ ನೆಲೆಯಲ್ಲಿದೆ. ಜತೆಗೆ ಎಲ್ಲ ವರ್ಗದ ಪ್ರೇಕ್ಷಕರನ್ನು ಗುರಿಯಾಗಿರಿಸಿಕೊಂಡು ಸಿನೆಮಾ ತಯಾರಿಸಲಾಗಿದೆ. ಆದ್ದರಿಂದ ಇದು ಮಕ್ಕಳಿಂದ ಹಿಡಿದು ವೃದ್ಧರವರೆಗೆ ಎಲ್ಲರಿಗೂ ಇಷ್ಟವಾಗಲಿದೆ ಎಂಬ ವಿಶ್ವಾಸ ರಜನೀಶ್‌ರದ್ದು.

ಈ ಚಿತ್ರಕ್ಕೆ ಹಾಲಿವುಡ್‌ನ‌ಲ್ಲಿ ಕೆಲಸ ಮಾಡಿದ ಅನುಭವ ಹೊಂದಿರುವ ಲಕ್ಷ್ಮೀಶ ಶೆಟ್ಟಿ ಅವರು ಕೆಮರಾದ ಜವಾಬ್ದಾರಿಯನ್ನು ನಿಭಾಯಿಸಿದ್ದಾರೆ.

ಒಂದು ಫೈಟ್ ಸೀನ್‌ ಮತ್ತು ನಾಲ್ಕು ಹಾಡುಗಳಿರುವ ಚಿತ್ರದ ನಾಯಕಿಯಾಗಿ ಯಶಸ್ವಿ ದೇವಾಡಿಗ ಅವರು ನಟಿಸಿದ್ದಾರೆ. ಉಳಿದಂತೆ ಉಮೇಶ್‌ ಮಿಜಾರು, ದೀಪಕ್‌ ರೈ ಪಾಣಾಜೆ, ಯಜ್ಞೇಶ್‌, ಸುಕನ್ಯಾ ಮುಂತಾದವರು ಪ್ರಮುಖ ಪಾತ್ರದಲ್ಲಿದ್ದಾರೆ.