ಕುಡ್ಲದ “ಲುಂಗಿ’ ತೆಲುಗಿಗೆ!

Team Udayavani, Dec 5, 2019, 4:07 AM IST

ಹೆಸರಿನಿಂದಲೇ ಗಮನ ಸೆಳೆದ ಸಿನೆಮಾ “ಲುಂಗಿ’. ಮಂಗಳೂರು ಮೂಲದ ಪ್ರತಿಭೆಗಳ ಹೊಸ ರೀತಿಯ ಸಿನೆಮಾವಿದು. ಅ. 11ರಂದು ತೆರೆ ಕಂಡ “ಲುಂಗಿ’ ಸಿನೆಮಾ ನ. 29ರಂದು 50ನೇ ದಿನಕ್ಕೆ ಕಾಲಿರಿಸಿದೆ. ಅರ್ಜುನ್‌ ಲೂಯಿಸ್‌ ಹಾಗೂ ಅಕ್ಷಿತ್‌ ಶೆಟ್ಟಿ ಜಂಟಿಯಾಗಿ ನಿರ್ದೇಶಿಸಿರುವ ಈ ಚಿತ್ರದಲ್ಲಿ ಪ್ರಣವ್‌ ಹೆಗ್ಡೆ ನಾಯಕ. ಅಹಲ್ಯಾ ಸುರೇಶ್‌ ಹಾಗೂ ರಾಧಿಕಾ ರಾವ್‌ ನಾಯಕಿಯರು. ಸಿನೆಮಾದಲ್ಲಿ ಸಂಚಿತ್‌ ಹೆಗ್ಡೆ ಹಾಡಿರುವ “ವೇಸ್ಟ್‌ ಬಾಡಿ’ ಹಾಡು ಸಿಕ್ಕಾಪಟ್ಟೆ ಫೇಮಸ್‌ ಆಗಿದೆ. ಪ್ರಸಾದ್‌ ಕೆ.ಶೆಟ್ಟಿ ಸಂಗೀತ ನೀಡಿದ್ದಾರೆ.

“ಲುಂಗಿ’ ಸಿನೆಮಾ ತೆಲುಗಿನಲ್ಲಿ ರೀಮೆಕ್‌ ಕೂಡ ಆಗುತ್ತಿದೆ. ಒಟಿಟಿ ಪ್ಲಾಟ್‌ ಫಾರಂಗೆ ದೊಡ್ಡ ಮೊತ್ತಕ್ಕೆ ರೀಮೇಕ್‌ ಸೇಲ್‌ ಆಗಿರುವುದು ಚಿತ್ರ ತಂಡದ ಉತ್ಸಾಹ ಹೆಚ್ಚಿಸಿದೆ. ರೀಜೋ ಪಿ.ಜಾನ್‌ ಕೆಮೆರಾ ಹಿಡಿದಿರುವ ಈ ಚಿತ್ರದ ಮೂಲಕ ಹೊಸ ಪ್ರತಿಭೆಗಳು ಚಿತ್ರರಂಗಕ್ಕೆ ಪರಿಚಯ ಆಗಿದ್ದಾರೆ. ಪ್ರೀತಿ-ಪ್ರೇಮ ಹಾಗೂ ದೇಸಿತನದ ಸೊಗಡು ಇರುವ ಈ ಚಿತ್ರವನ್ನು, ಈಗಾಗಲೇ ಕೋಸ್ಟಲ್‌ವುಡ್‌ನ‌ಲ್ಲಿ ಎರಡು ಯಶಸ್ವಿ ಚಿತ್ರಗಳನ್ನು ನೀಡುವ ಮುಖೇಶ್‌ ಹೆಗ್ಡೆ ತಮ್ಮ ಖಾರ ಎಂಟರ್‌ಟೈನ್‌ಮೆಂಟ್‌ ಮೂಲಕ ನಿರ್ಮಿಸಿದ್ದಾರೆ.

ಯುವ ಜನಾಂಗದ ಅನೇಕ ತವಕ ತಲ್ಲಣಗಳನ್ನು ಹೊತ್ತು ತಂದ ಈ ಚಿತ್ರಕ್ಕೆ ಲುಂಗಿ ಎಂದು ಹೆಸರಿಡಲು ಕಾರಣವಿದೆ. ಕಥಾ ನಾಯಕನಿಗೂ ಲುಂಗಿಗೂ ಒಂದು ಸಂಬಂಧವಿದೆ. ಹಾಗಾಗಿಯೇ ಈ ಸಿನೆಮಾಗೆ ಇಂಥದೊಂದು ಟೈಟಲ್‌ ಇಟ್ಟಿದ್ದಾರೆ.