ಮತ್ತೆ ಗೋವಾಕ್ಕೆ ಹೋಗೋಣ

Team Udayavani, Nov 15, 2018, 1:09 PM IST

ಪಣಜಿಗೆ ಹೋಗೋಣ ಬನ್ನಿ. ವಾರ್ಷಿಕ ಅಂತಾರಾಷ್ಟ್ರೀಯ ಸಿನಿಮೋತ್ಸವ ನ. 20 ರಿಂದ 28 ರವರೆಗೆ ನಡೆಯಲಿದೆ. ಇದು 49 ನೇ ಭಾರತೀಯ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ. ಮುಂದಿನ ವರ್ಷ ಸುವರ್ಣ ಸಂಭ್ರಮ.

ಪ್ರತಿ ವರ್ಷವೂ ಚಿತ್ರೋತ್ಸವಕ್ಕೆ ಏನಾದರೂ ಸೇರುತ್ತಲೇ ಇರುತ್ತದೆ. ಅದರಂತೆಯೇ ಈ ವರ್ಷವೂ ಒಂದಿಷ್ಟು ಹೊಸತಿದೆ. ಒಟ್ಟೂ 68 ದೇಶಗಳ 212 ಚಲನಚಿತ್ರಗಳು ಪ್ರದರ್ಶನಗೊಳ್ಳಲಿವೆ. ಈ ವರ್ಷ ಇಸ್ರೇಲ್‌ ದೇಶದ ಸಿನಿಮಾಗಳಿಗೆ ಕಂಟ್ರಿ ಫೋಕಸ್‌ ವಿಭಾಗದಡಿ ಮಹತ್ವ ನೀಡಲಾಗಿದೆ. ಹಾಗೆಯೇ ಜಾರ್ಖಂಡ್‌ ರಾಜ್ಯದ ಸಿನಿಮಾಗಳನ್ನು ವಿಶೇಷವಾಗಿ ಪರಿಗಣಿಸಲಾಗಿದೆ. ರೆಟ್ರಾಸ್ಪೆಕ್ಟಿವ್‌ (ಒಬ್ಬ ಚಲನಚಿತ್ರ ನಿರ್ದೇಶಕನ ಚಿತ್ರಗಳು ಮರುಓದು) ವಿಭಾಗದಡಿ ಖ್ಯಾತ ನಿರ್ದೇಶಕ ಇಂಗರ್‌ ಬರ್ಮನ್‌ ರ ಚಿತ್ರಗಳನ್ನು ಪರಿಗಣಿಸಲಾಗಿದೆ. ಅಂದ ಹಾಗೆ ಅವರ ಜನ್ಮಶತಮಾನೋತ್ಸವ ವರ್ಷವಿದು.

ಖೇಲೋ ಭಾರತ್‌ ನ ಬ್ರ್ಯಾಂಡ್‌ನ‌ ವಿಸ್ತರಣೆ ಎಂಬಂತೆ ಈ ಬಾರಿಯ ಚಿತ್ರೋತ್ಸವದಲ್ಲಿ ಗೋಲ್ಡ್‌, ಸೂರ್ಮಾ, ಭಾಗ್‌ ಮಿಲ್ಕಾ ಭಾಗ್‌, ಮೇರಿ ಕಾಮ್‌, ಎಂಎಸ್‌ಡಿ : ದಿ ಅನ್‌ಟೋಲ್ಡ್‌ ಸ್ಟೋರಿ ಇತ್ಯಾದಿ ಚಿತ್ರಗಳು ಪ್ರದರ್ಶನವಾಗುತ್ತಿವೆ. ಇವೆಲ್ಲವೂ ಕ್ರೀಡೆಗೆ ಸಂಬಂಧಿಸಿದ ಚಿತ್ರಗಳು.

ಕನ್ನಡದ್ದೇನಿದೆ?
ಭಾರತೀಯ ಪನೋರಮಾ ವಿಭಾಗದಲ್ಲಿ ಆಯ್ಕೆಯಾದ ಚಿತ್ರಗಳಲ್ಲಿ ಈ ಬಾರಿ ಕನ್ನಡ ಚಲನಚಿತ್ರಕ್ಕೆ ಅವಕಾಶವಿಲ್ಲ, ಆದರೆ ಕರ್ನಾಟಕಕ್ಕಿದೆ. ಅಂದರೆ ತುಳು ಭಾಷೆಯ ಅಭಯ ಸಿಂಹ ನಿರ್ದೇಶನದ ಪಡ್ಡಾಯಿ ಚಲನಚಿತ್ರ ಪ್ರದರ್ಶನಗೊಳ್ಳುತ್ತಿದೆ. ಉಳಿದಂತೆ ಯಾವ ಕನ್ನಡ ಚಿತ್ರಗಳೂ ಈ ವಿಭಾಗದಡಿ ಆಯ್ಕೆಯಾಗಿಲ್ಲ| ಚಲನಚಿತ್ರಗಳ ಪ್ರದರ್ಶನದೊಂದಿಗೆ ಮಾಸ್ಟರ್‌ ಕ್ಲಾಸ್‌, ಸಂವಾದ, ಓಪನ್‌ ಫೋರಂ ಎಲ್ಲವೂ ಉತ್ಸವಕ್ಕೆ ಕಳೆ ತುಂಬಲಿವೆ. ಸಿನಿಮೋತ್ಸವ ಆರಂಭವಾಗುವುದು ದಿ ಎಸ್ಪರನ್‌ ಪೇಪರ್ ಎಂಬ ಚಿತ್ರದಿಂದ.