ನಿರ್ಮಿಲ್ಲೆಂ ನಿರ್ಮೋಣೆಂ ರೆಡಿ

Team Udayavani, Mar 7, 2019, 7:22 AM IST

ಮೂರು ವರ್ಷದ ಹಿಂದೆ ಕೊಂಕಣಿಯಲ್ಲಿ ನಿರ್ಮಾಣಗೊಂಡ ‘ನಶಿಬಾಚೋ ಖೆಳ್‌’ ಚಲನಚಿತ್ರವು ಸದ್ದಿಲ್ಲದೆ ಲಕ್ಷಾಂತರ ಜನರ ಮನ ಗೆದ್ದು ಈಗ 500ನೇ ಪ್ರದರ್ಶನದ ಸಂಭ್ರಮಾಚರಣೆಯಲ್ಲಿದೆ. ಅದರಿಂದ ಸ್ಫೂರ್ತಿ ಪಡೆದ ನಿರ್ಮಾಪಕ ಹೆನ್ರಿ ಡಿ’ಸಿಲ್ವ ಸುರತ್ಕಲ್‌ ಅದೇ ಬ್ಯಾನರ್‌ನಡಿಯಲ್ಲಿ ‘ದೇವರು ನಮ್ಮ ಹಣೆ ಬರಹದ ಮೇಲೆ ಏನು ಬರೆದಿದ್ದಾರೆ ಅದೇ ಆಗುವುದು’ ಎಂಬ ಸಂದೇಶದ ಮೇಲೆ ‘ನಿರ್ಮಿಲ್ಲೆಂ ನಿರ್ಮೋಣೆಂ’ ಎಂಬ ಇನ್ನೊಂದು ಚಿತ್ರ ತಯಾರಿಸಿದ್ದಾರೆ. ಬಿಗ್‌ಬಜೆಟ್‌ನಲ್ಲಿ ತಯಾರಾದ ಈ ಸಿನೆಮಾವನ್ನು ‘ಹುತ್ತದ ಸುತ್ತ’ ಎಂಬ ಕನ್ನಡ ಚಿತ್ರ ನಿರ್ದೇಶಿಸಿದ ಮೆಲ್ವಿನ್‌ ಎಲ್ಪೆಲ್‌ ಅವರು ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ.

ಚಿತ್ರದಲ್ಲಿ ನಾಯಕ ನಟನಾಗಿ ಪ್ರತಾಪ್‌ ಮಿನೇಜಸ್‌ ಹಾಗೂ ನಟಿಯಾಗಿ ಸೀಮಾ ಬುತೆಲ್ಲೋ, ಹೆರಾ ಪಿಂಟೋ, ರೋನಿ ಪೆರ್ನಾಂಡಿಸ್‌, ಹಂಬರ್ಟ್‌ ಪೆರ್ನಾಂಡಿಸ್‌, ಮೀನಾಕ್ಷಿ ಮಾರ್ಟಿನ್‌, ರೇಶ್ಮಾ ಅಭಿನಯಿಸಿದ್ದಾರೆ. ಚಿತ್ರಕ್ಕೆ ಮಂಜುನಾಥ ಹೆಗಡೆ ಛಾಯಾಗ್ರಹಣ ಮಾಡಿದ್ದು, ಚಿತ್ರಕಥೆ ನೋರ್ಬಟ್‌ ಜೋನ್‌, ಸಹನಿರ್ದೇಶಕರಾಗಿ ಸಂತೋಷ್‌ ರೈ ಮುಳ್ಳೇರಿಯ ಹಾಗೂ ಮಿಲನ್‌, ರಾಯನ್‌, ಜೆರಾಲ್ಡ್‌ ದುಡಿದಿದ್ದಾರೆ. ದಿ ವಿಲ್ಫಿ ರೆಬಿಂಬಸ್‌ ಅವರ ಸಂಗೀತ ಬಳಸಿಕೊಂಡು ಚಿತ್ರ ನಿರ್ಮಾಣಗೊಂಡಿದೆ. ಈಗಾಗಲೇ ತೆರೆಕಂಡಿರುವ ‘ನಶಿಬಾಚೋ ಖೆಳ್‌’ ಹಾಗೆಯೇ ಇನ್ನು ತೆರೆಕಾಣಲಿರುವ ‘ನಿರ್ಮಿಲ್ಲೆಂ ನಿರ್ಮೋಣೆಂ’ ಚಿತ್ರದಲ್ಲಿ ಪ್ರತಿಭಾವಂತ ಕಲಾವಿದರನ್ನು ಗುರುತಿಸಿ, ಅವರನ್ನು ತೆರೆಯ ಮೇಲೆ ಪರಿಚಯಿಸಲು ನಿರ್ಮಾಪಕ ಹೆನ್ರಿ ಡಿ’ಸಿಲ್ವ ಸುರತ್ಕಲ್‌ ವಿಶೇಷ ಆಸಕ್ತಿ ತೋರಿದ್ದಾರೆ ಎಂಬುದು ವಿಶೇಷ.