ಕಂಬಳದಲ್ಲಿ ಸುನೀಲ್‌ ಶೆಟ್ಟಿ , ಶಿಲ್ಪಾ ಶೆಟ್ಟಿ

Team Udayavani, Mar 5, 2020, 5:05 AM IST

ತುಳುನಾಡಿನ ಸಾಂಪ್ರದಾಯಿಕ ಕ್ರೀಡೆ ಕಂಬಳ ಸದ್ಯ ದೇಶ-ವಿದೇಶದಲ್ಲಿ ಸುದ್ದಿಯಾಗುತ್ತಿದೆ. ಕಂಬಳ ಓಟಗಾರರು ಮಾಡಿದ ಸಾಧನೆಯಿಂದಾಗಿ ಎಲ್ಲೆಡೆಯಲ್ಲೂ ಕಂಬಳದ್ದೇ ಸುದ್ದಿ. ರಾಷ್ಟ್ರೀಯ ಅಂತಾರಾಷ್ಟ್ರೀಯ ಮಾಧ್ಯಮದಲ್ಲಿಯೂ ಕಂಬಳದ ಬಗ್ಗೆಯೇ ಮಾತುಕತೆ ನಡೆಯುತ್ತಿದೆ. ಇಂತಹ ಸಂದರ್ಭದಲ್ಲಿಯೇ ಇದೀಗ ಕೋಸ್ಟಲ್‌ವುಡ್‌-ಸ್ಯಾಂಡಲ್‌ವುಡ್‌ನ‌ಲ್ಲಿ ಸಿನೆಮಾವೊಂದು ಸೆಟ್ಟೇರುತ್ತಿರುವ ವಿಚಾರ ಈಗಾಗಲೇ ಬಹಿರಂಗಗೊಂಡಿದೆ.

ಸದ್ಯ ಇದೇ ಚಿತ್ರಕ್ಕೆ ಸಂಬಂಧಿಸಿದ ಇನ್ನಷ್ಟು ಹೊಸ ಅಂಶಗಳು ಕೇಳಿಬರುತ್ತಿದೆ. ಈ ಪ್ರಕಾರ ಕಂಬಳದಲ್ಲಿ ಬಾಲಿವುಡ್‌ ಸ್ಟಾರ್‌ಗಳು ಹಾಗೂ ತುಳುನಾಡಿನವರೇ ಆದ ಸುನೀಲ್‌ ಶೆಟ್ಟಿ ಹಾಗೂ ಶಿಲ್ಪಾ ಶೆಟ್ಟಿ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ತಿಳಿದುಬಂದಿದೆ. ಸದ್ಯ ಈ ಕುರಿತಂತೆ ಮಾತುಕತೆ ನಡೆಯುತ್ತಿದ್ದು, ಕಂಬಳ ಆಗುವ ಜಾಗಕ್ಕೆ ಸುನೀಲ್‌ ಶೆಟ್ಟಿ ಹಾಗೂ ಶಿಲ್ಪಾ ಶೆಟ್ಟಿ ಆಗಮಿಸಿ ಮುಖ್ಯ ಅತಿಥಿಗಳಾಗಿ ಪಾಲ್ಗೊಳ್ಳಲಿದ್ದಾರೆ ಎಂಬುದು ಲೆಟೆಸ್ಟ್‌ ಮಾಹಿತಿ.

ಲೋಕೇಶ್‌ ಮೂಡುಬಿದಿರೆ ಅವರು ಕಂಬಳ ಸಿನೆಮಾ ಮಾಡಲು ನಿರ್ಧರಿಸಿದ್ದು, ತುಳು ಹಾಗೂ ಕನ್ನಡದಲ್ಲಿ ರಿಲೀಸ್‌ ಆಗಲಿದೆ. ಜತೆಗೆ “ಕಂಬಳ‘ ಸಿನೆಮಾ, ಮುಂದೆ ಬಾಲಿವುಡ್‌ನ‌ಲ್ಲಿಯೂ ಸೆಟ್ಟೇರಲಿದೆಯಂತೆ. ಅಂದಹಾಗೆ, ಇತ್ತೀಚೆಗೆ ಕಂಬಳ ಓಟದ ಮೂಲಕ ಸುದ್ದಿಯಾದ ಶ್ರೀನಿವಾಸ ಗೌಡ ಅವರು ತುಳು ಹಾಗೂ ಕನ್ನಡದಲ್ಲಿ ನಿರ್ಮಾಣವಾಗುವ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಜತೆಗೆ ಐದು ಮಂದಿ ಕಂಬಳ ಜಾಕಿಗಳನ್ನು ಮುಖ್ಯಪಾತ್ರದಲ್ಲಿಟ್ಟು ಸಿನೆಮಾ ಮಾಡುವ ಬಗ್ಗೆ ನಿರ್ಧರಿಸಲಾಗಿದೆ. ಕನ್ನಡದ ಖ್ಯಾತ ನಟರು ಹಾಗೂ ಕೋಸ್ಟಲ್‌ವುಡ್‌ನ‌ ಖ್ಯಾತನಾಮರು ಸಿನೆಮಾದಲ್ಲಿರಲಿದ್ದಾರೆ.