UV Fusion: ಹೊಸವರ್ಷದ ಹೊಸ್ತಿಲಲ್ಲಿ ನವ ಸಂಕಲ್ಪ ನಮ್ಮದಾಗಲಿ

Team Udayavani, Jan 13, 2025, 5:44 PM IST

ಕಾಲ ಸರಿದಂತೆ ವರುಷಗಳು ಅದೇಷ್ಟೂ ಬೇಗ ಸರಿದು ಹೋಗುತ್ತದೆ, ಮತ್ತೆ ಈ ವರುಷ ಬದಲಾಗಿ ಹಳೆ ನೆನಪುಗಳೊಂದಿಗೆ ಹೊಸ ಕನಸಿನ ಪಯಣ ಆರಂಭಿಸಲು ಹೊಸವರುಷ ಮತ್ತೆ ಕಾಲಿಡುತ್ತಿದೆ. ಹೀಗೆ ಕಳೆದು ಹೋದ ವರ್ಷದ ಪುಟಗಳಲ್ಲಿ ನಮ್ಮ ನೋವು- ನಲಿವಿನ ನೆನಪುಗಳು ಅಧ್ಯಾಯವಾಗಿ ಉಳಿಯುವುದಷ್ಟೇ ವಾಸ್ತವವಾಗಿರುತ್ತದೆ. ಕಾಲದ ವಿಪರೀತ ವೇಗವು ಕ್ಷಣಿಕವೆನಿಸುತಿರುವಂತೆ ಅನಿಸುವುದು, ಏಕೆಂದರೆ ಕಣ್ಣು ಮುಚ್ಚಿ ತೆರೆಯುವುದರೊಳಗೆ ಈ ವರುಷ ಕಳೆದು ಹೋಯಿತು. ಆದರೆ ವರುಷದ ಕೊನೆಯ ಪುಟಕ್ಕೇ ವಿರಾಮ ನೀಡಿ ಪುಟವನ್ನು ತಿರುಚಿದಾಗ ಮತ್ತೆ ಹೊಸ ಕನಸುಗಳ ಬರವಣಿಗೆಯ ಪುಸ್ತಕವನ್ನು ತೆರೆಯಲೇ ಬೇಕು ಅಲ್ಲವೇ.

ಸಮಯ ಅದೆಷ್ಟು ಬೇಗ ಕಳೆದು ಹೋಯಿತು ಅನ್ನುವಷ್ಟರಲ್ಲಿ ಒಂದು ವರ್ಷ ಹೇಗೆ ಕಳೆದು ಹೋಯಿತು ಎಂಬ ಅಂದಾಜು ಸಿಗದಷ್ಟು ವೇಗವಾಗಿ ಕಾಲ ಓಡುತ್ತಿದೆ. ಹೊಸ ವರುಷ ಹೊಸ ಕನಸುಗಳಿಗೆ ವೇದಿಕೆ.ಬದಲಾಗುವ, ಪರಿವರ್ತನೆ ಹೊಂದುವ ಪ್ರತಿಯೊಂದು ಹಂತಗಳಲ್ಲಿ ನಾವು ಏನಾದರೂ ಬದಲಾವಣೆ ಕಾಣಬೇಕು, ಏನನ್ನಾದರೂ ಮಾಡಬೇಕು ಎಂಬ ಬಲವಾದ ಕನಸು ನಮ್ಮಲ್ಲಿ ಹೊರ ಹೊಮ್ಮಲೇ ಬೇಕು. ಈ ವರುಷದಲ್ಲಿ ನಮ್ಮ ಕನಸುಗಳ ಹಾದಿಯಲ್ಲಿ ಯಾವ ರೀತಿಯಲ್ಲಿ ಬದಲಾವಣೆ ತಂದಿದೆ, ಮುಂದಿನ ಹಂತ ಹೇಗೆ ಸಾಗಬೇಕು ಎಂಬುದರ ಅರಿವು ಸ್ಪಷ್ಟವಾಗಿದ್ದರೆ ಯಶಸ್ಸು ನಮ್ಮದಾಗುವುದು ಖಂಡಿತ.

ವರುಷ ಕಳೆದಂತೆ ಹೊಸ ರೂಪಗಳೊಂದಿಗೆ ಕ್ಯಾಲೆಂಡರ್‌ಗಳು ಬದಲಾಗಿ ಬಿಡುತ್ತದೆ ಆದರೆ ನಮ್ಮ ಕನಸು ಗುರಿಗಳಲ್ಲ. ಆಡಂಭರದ ಆಚರಣೆಗಳು, ವಿಭಿನ್ನ ರೀತಿಯಲ್ಲಿ ಹೊಸ ವರುಷವನ್ನು ಸ್ವಾಗತಿಸುವ ರೀತಿಯ ಅಬ್ಬರವಾದರೆ, ಭವಿಷ್ಯದ ಕನಸುಗಳ ನಿರ್ಮಾಣವು ಹೊಸ ವರುಷದ ತಿರುವು ಎಂದು ಭಾವಿಸಿ ಮುನ್ನಡೆದಾಗ ಹೊಸದು ಎಂಬ ಪದವು ಅರ್ಥ ಪಡೆದಂತೆಯೇ ಸರಿ ಅನಿಸುವುದು.

ಹೊಸ ವರುಷವು ಕನಸಿನ ಅಡಿಪಾಯವಾಗಿ ಮಾಡಬೇಕಾದ ಕರ್ತವ್ಯಗಳ ಗಂಟೆ ನಮ್ಮನ್ನು ಬಡಿದು ಎಚ್ಚರಿಸುವ ರೀತಿಯಿದ್ದು ಹೊಸ ವರುಷದ ವೇಳಾಪಟ್ಟಿ ತಯಾರಿ ನಮ್ಮದಾಗಿರಬೇಕು. ಹೊಸ ವರುಷ ಆರಂಭವಾದಗ ನಾವು ನಮ್ಮ ಕನಸುಗಳೊಂದಿಗೆ ಸ್ವಾಗತಿಸಬೇಕು ವಿನಃ ಆಧುನಿಕ ಆಡಂಬರದ ಜತೆಯಲ್ಲ. ವರ್ಷದಂತೆ ಕನಸುಗಳು ಎಂದು ಬದಲಾಗಬಾರದು ನಮ್ಮ ಕಾರ್ಯಗಳೇನು, ಗುರಿಯ ಹಾದಿ, ಪ್ರಯತ್ನಗಳು ಎತ್ತ ಸಾಗುತ್ತಿದೆ ಇವೆಲ್ಲ ವಿಮರ್ಶೆಗಳು ನಮ್ಮದಾಗಬೇಕು. ನಮ್ಮ ಆಲೋಚನೆಗಳಿಗೆ ಹೊಸದೊಂದು ರೂಪ ನೀಡಲು ಹೊಸ ವರುಷ ಒಂದು ನೆಪವಷ್ಟೇ. ಈ ನೆಪದಲ್ಲದರು ದಿನಚರಿಗಳು ಬದಲಾಗಿ ಒಂದು ಏನನ್ನಾದರೂ ಈ ವರುಷದಲ್ಲಿ ಸಾಧಿಸಬೇಕು ಎಂಬ ಛಲ ನಮ್ಮಲ್ಲಿದ್ದು ಪ್ರತಿಯೊಂದು ದಿನವನ್ನು ಹೊಸ ದಿನವೆಂದು ಭಾವಿಸಿ ಕನಸಿನ ಬೆನ್ನಟ್ಟಬೇಕು.

ಪ್ರತಿ ಪಯಣವು ಸಂತೋಷದ ಒಂದು ಭಾಗವಾಗಿ ಅನುಭವಿಸಿ ಪ್ರತೀ ಅನುಭವಗಳಿಂದ ಕಲಿಯುತಿರಬೇಕು. ದಿನದ ಪ್ರಾರಂಭವು ಒಂದೊಳ್ಳೆ ದಿನವೆಂದು ಪ್ರಾರಂಭಿಸಿ ಆ ದಿನದಲ್ಲಿ ಏನು ಮಾಡಿದೀವಿ ಎಂದು ಕೊಂಚ ಸಮಯವಿಟ್ಟು ಯೋಚಿಸುವ ತಾಳ್ಮೆ ಇವೆಲ್ಲವೂ ನಮ್ಮ ಬದುಕಲ್ಲಿ ಅಳವಡಿಕೆಯಾದಗ ನಮ್ಮ ಬದುಕಿನಲ್ಲಿ ಕನಸುಗಳು ಬಹಳ ಮಹತ್ವಪೂರ್ಣವಾಗಿ ಅಮೂಲ್ಯವೆನಿಸುವುದು. ಕಳೆದು ಹೋದ ವರುಷದ ನೋವು ನಲಿವುಗಳು ನೆನಪಿನ ಜೋಲಿಗೆಯಲ್ಲಿ ಭದ್ರವಾಗಿರುವಂತದ್ದು, ಒಂದು ಹೊಸ ಅಧ್ಯಾಯ ಸೃಷ್ಟಿಸಲು ಈ ವರುಷವೊಂದು ಅವಕಾಶ ನೀಡುತಿದೆ ಎಂದು ಭಾವಿಸಿ ಒಂದೊಳ್ಳೆ ಸಂಕಲ್ಪದೊಂದಿಗೆ ಗುರಿಯತ್ತ ಮುನ್ನಡೆಯಬೇಕು ಮತ್ತು ಉತ್ತಮ ಭವಿಷ್ಯ ರೂಪಿಸಿಕೊಳ್ಳುವಲ್ಲಿ ಈ ವರುಷವೂ ಅಡಿಪಾಯವಾಗಲಿ ಎಂಬ ಅತೀ ದೊಡ್ಡ ಸಂಕಲ್ಪ ನಮ್ಮದಾಗಬೇಕು.

ವಿಜಯಲಕ್ಷ್ಮೀ ಬಿ.ಕೆಯ್ಯೂರು, ವಿವೇಕಾನಂದ ಕಾಲೇಜು ಪುತ್ತೂರು