ಜೀವನದ ಸತ್ಯಾಸತ್ಯತೆಯನ್ನು ತೆರೆದಿಡುವ ‘ಹವರ್ಸ್` 

Team Udayavani, Sep 17, 2018, 2:51 PM IST

ಬದುಕಿನಲ್ಲಿ ಕೆಲವೊಂದು ಪರಿಸ್ಥಿತಿಗಳನ್ನು ನಾವು ಏಕಾಂಗಿಯಾಗಿಯೇ ಎದುರಿಸಬೇಕಾಗುತ್ತದೆ. ಈ ಸಂದರ್ಭದಲ್ಲಿ ಆತ್ಮವಿಶ್ವಾಸವೊಂದೇ ನಮ್ಮ ಕೈಹಿಡಿಯಬಲ್ಲದು. ಬದುಕುವ ಛಲವೊಂದಿದ್ದರೆ ಎಂಥ ಕಠಿನ ಪರಿಸ್ಥಿತಿಯನ್ನು ಬೇಕಿದ್ದರೂ ಜಯಸಿ ಬರುತ್ತೇವೆ ಎಂಬುದನ್ನೇ ಹೇಳುವ ಇಂಗ್ಲಿಷ್‌ ಚಿತ್ರ ‘127 ಹವರ್ಸ್’.

ಅಮೆರಿಕದ ಪಶ್ಚಿಮ ಭಾಗದಲ್ಲಿರುವ ಅಟಾಹ ಪರ್ವತ ಶ್ರೇಣಿ ಗಳ ಪ್ರಾಂತ್ಯಕ್ಕೆ 2003ರಲ್ಲಿ ಏಕಾಂಗಿಯಾಗಿ ತೆರಳಿದ್ದ ಮೆಕ್ಯಾನಿಕಲ್‌ ಎಂಜಿನಿಯರ್‌ ಆರೋನ್‌ ರಾಲ್‌ ಸ್ಟನ್‌ ಅಲ್ಲಿ ಬ್ಲೂಜಾನ್‌ ಕ್ಯಾನನ್‌ ಎಂಬ ದುರ್ಗಮ ಕಣಿವೆಯೊಳಗೆ ಬಂಡೆ‌ಗಳ ಮೂಲಕ ಇಳಿಯುವಾಗ ಜಾರಿ ಬಿದ್ದು ಸಿಲುಕಿಕೊಳ್ಳುತ್ತಾನೆ. ಇಲ್ಲಿ ಆತ ಕಳೆಯುವ 127 ಗಂಟೆಗಳ ಅವಧಿಯ ಕಾದಂಬರಿಯನ್ನು ಆಧಾರವಾಗಿಟ್ಟುಕೊಂಡು ‘127 ಹವರ್ಸ್  ಎಂಬ ಚಿತ್ರವನ್ನು ನಿರ್ಮಿಸಿದ್ದಾರೆ ಡ್ಯಾನಿ ಬಾಯ್ಲ್.

ರಜೆಯಲ್ಲಿ ಏಕಾಂಗಿಯಾಗಿ ಅಂಡಲೆಯುವ ಉದ್ದೇಶದಿಂದ ಹೋದ ಟೆಕ್ಕಿಯೊಬ್ಬ ಸಿಲುಕುವ ಅಪಾಯಕಾರಿ ಪ್ರಸಂಗ ಹಾಗೂ ಅದರಿಂದ ಹೊರಬರಲು ಆತ ಪಡುವ ಸಂಕಷ್ಟಗಳನ್ನು ಇಲ್ಲಿ ಮನೋಜ್ಞವಾಗಿ ಚಿತ್ರಿಸಲಾಗಿದೆ. ಈ ನಡುವೆ ಎದುರಾಗುವ ಆಹಾರ, ನೀರಿನ ಸಮಸ್ಯೆಗೆ ಆತ ಕಂಡುಕೊಳ್ಳುವ ದಾರಿ ಮನಕಲಕುವಂತೆ ಮಾಡುತ್ತದೆ. 

ಈ ನಡುವೆ ಕಲ್ಲುಗಳು ಉರುಳಿ ಟೆಕ್ಕಿಯ ಬಲಗೈ ಜಜ್ಜಿ ಹೋಗುತ್ತದೆ. ಇದೇ ತ್ರಿಶಂಕು ಸ್ಥಿತಿಯಲ್ಲಿ ಆತ 127 ಗಂಟೆಗಳ ಕಾಲ ಕಳೆಯುತ್ತಾನೆ. ಮನೆ ಮಂದಿ, ಸ್ನೇಹಿತರ ಬಳಿ ಹೇಳದೇ ಹೋಗಿರುವ ಟೆಕ್ಕಿಯ ಬದುಕಿನ ಸ್ವಾರಸ್ಯಕರ ಘಟನೆಯನ್ನು ತೆರೆದಿಡುವ ಈ ಚಿತ್ರ ಅವನನ್ನು ಹುಡುಕಲು ಅವರು ಮಾಡುವ ಪ್ರಯತ್ನಗಳ ಕುರಿತು ಬೆಳಕು ಚೆಲ್ಲುತ್ತದೆ. ಬದುಕಬೇಕೆಂಬ ಟೆಕ್ಕಿಯ ಹೋರಾಟ, ಆತ ಮಾಡುವ ಪ್ರಯತ್ನಗಳು ಮನ ಸೆಳೆಯುತ್ತದೆ. ಒಟ್ಟಿನಲ್ಲಿ ಕ್ಷಣಕ್ಷಣಕ್ಕೂ ರೋಮಾಂಚನವನ್ನುಂಟು ಮಾಡುವ ಈ ಚಿತ್ರ ಕೊನೆಯವರೆಗೂ ನೋಡುಗರನ್ನು ಹಿಡಿದಿಟ್ಟುಕೊಳ್ಳುವಂತೆ ಮಾಡಿದೆ.

ಈ ಚಿತ್ರಕ್ಕೆ ಭಾರತದ ಎ.ಆರ್‌. ರಹಮಾನ್‌ ಸಂಗೀತ ನೀಡಿರುವುದು ವಿಶೇಷ. ಇಡೀ ಚಿತ್ರ, ಮಾನವನ ಅಲೆದಾಡುವ ಹವ್ಯಾಸಕ್ಕೆ ಮುಂಜಾಗ್ರತೆ ಹಾಗೂ ಮುನ್ನೆಚ್ಚರಿಕೆ ಎಷ್ಟು ಅಗತ್ಯ ಎಂಬುದನ್ನು ಈ ಚಿತ್ರದಲ್ಲಿ ತಿಳಿಸಲಾಗಿದೆ.

 ಚೇತನ್‌ ಓ.ಆರ್‌.