ಬದುಕಿನ ಸಂತೋಷ ಎಲ್ಲಿದೆ?

Team Udayavani, Feb 25, 2019, 8:08 AM IST

ಹಣ- ಸಂಪತ್ತು ಇದ್ದರೆ ಖುಷಿಯೂ ಇರುತ್ತೆ ಅಂತ ನಂಬಿರೋ ಜಗತ್ತು ನಮ್ಮದು. ಜಗತ್ತಿನ ಅತ್ಯಂತ ಖುಷಿಯ ಮನುಷ್ಯ ಸಿಕ್ಕರೆ, ಅದು ಪ್ಯಾಲೇಸ್‌ನಲ್ಲೇ  ಎಂದು ಹೇಳುವವರೂ ಇದ್ದಾರೆ. ಅವರ ಈ ತರ್ಕಕ್ಕೆ ಕಾರಣವೂ ಇಲ್ಲದಿಲ್ಲ. ಚಿನ್ನದ ಸಿಂಹಾಸನ, ರತ್ನಾಭರಣಗಳ ಕಿರೀಟ, ಖಜಾನೆಯನ್ನು ತುಂಬಿಕೊಂಡ ಸಂಪತ್ತು, ರಾಜ ವೈಭೋಗ, ಅರಮನೆ, ಸಾಮ್ರಾಜ್ಯಕ್ಕೆ ಬೆಂಗಾವಲಾಗಿ ನಿಂತ ದೊಡ್ಡ ಸೈನ್ಯ… ಇವೆಲ್ಲ ಸಿರಿವೈಭವಗಳನ್ನು ತನ್ನೊಂದಿಗೆ ಇಟ್ಟುಕೊಂಡ ರಾಜ, ಇನ್ನೇನು ತಾನೇ ಕಷ್ಟಪಡಲು ಸಾಧ್ಯ? ಆದರೆ, ಇವ್ಯಾವೂ ಇಲ್ಲದೆಯೂ ಖುಷಿಯಲ್ಲಿರಲು ಸಾಧ್ಯವಿದೆ ಎಂಬುದನ್ನು ರಾಜನೊಬ್ಬ ತೋರ್ಪಡಿಸಿದ್ದಾನೆ. ರಾಜ ಅಂದ ಮಾತ್ರಕ್ಕೆ, ಈತನ ಅರಮನೆ ಊರಿನಗಲ ಹಬ್ಬಿಲ್ಲ, ಒಂದು ಸಮುದ್ರ ತೀರದಲ್ಲಿ ಎಂಟತ್ತು ಅಡಿ ಮಾತ್ರವೇ. ಅಲ್ಲಿ ತನ್ನ ಕೈಯ್ನಾರೆ ಕಟ್ಟಿದ ಮರಳಿನ ಗೂಡೇ ಈತನ ಪ್ಯಾಲೇಸ್‌. ಅದರೆದುರು ಸಿಂಹಾಸನದಂತೆ ಒಂದು ಮರದ ಕುರ್ಚಿ ಇಟ್ಟು, ಚಿನ್ನದಂತೆ ಕಾಣುವ ಲೋಹದಿಂದ ಮಾಡಿದ ವಸ್ತುವನ್ನು, ತಲೆ ಮೇಲೆ ಧರಿಸಿ ಕಿರೀಟವೆಂಬಂತೆ ಕಳೆದ 22 ವರ್ಷಗಳಿಂದ ಸಂಭ್ರಮಿಸುತ್ತಿರುತ್ತಿದ್ದಾನೆ. ಇವನ ಈ ಅವತಾರ ನೋಡಿ, ಅಲ್ಲಿನ ಜನ ‘ಸ್ಯಾಂಡ್‌ ಕಿಂಗ್‌’ ಅಂತಲೇ ಕರೆಯುತ್ತಾರೆ. ಮಾರ್ಸಿಯೋ ಮಿಝೇಲ್ ರಿಯೋ ಡಿ ಜನೈರೋದ ಬರ್ರಾದ ತಿಜುಕಾ ಬೀಚ್‌ ನಲ್ಲಿ ಈ ರಾಜನ ಮರಳಿನ ಸಾಮ್ರಾಜ್ಯ ಕಾಣಿಸುತ್ತೆ.

ಈತ ಒಬ್ಬ ಪುಸ್ತಕ ವ್ಯಾಪಾರಿ. ಒಮ್ಮೆ ಬ್ರೆಜಿಲ್‌ನ ರಾಜನನ್ನು ಭೇಟಿಯಾಗಲು ಹೋಗಿದ್ದಾಗ ಈತನ ಹರಕು ಪೋಷಾಕು ನೋಡಿ ಸೆಕ್ಯೂರಿಟಿ ಗಾರ್ಡ್‌ಗಳು ಒಳಗೆ ಬಿಡಲಿಲ್ಲ. ಹೀಗಾಗಿ ಅಂದೇ ಮಾರ್ಸಿಯೋ ನಿರ್ಧರಿಸಿದಂತೆ ಕಡಲ ತಡಿಯಲ್ಲಿ ಮರಳಿನ ಅರಮನೆ ನಿರ್ಮಿಸಿದ್ದ. ಮಳೆ ಬಂದಾಗ, ಚಂಡಮಾರುತ ಎದ್ದಾಗ, ಈ ಅರಮನೆ ಕುಸಿದು ಬೀಳುತ್ತದೆ. ಕೆಲವೊಮ್ಮೆ ರಕ್ಕಸದ ಅಲೆಗಳಿಗೆ ಕೊಚ್ಚಿ ಹೋಗುತ್ತದೆ. ಆದರೆ, ಮಾರ್ಸಿಯೋ ತಾಳ್ಮೆ ಕಳೆದುಕೊಳ್ಳದೆ ಅಪಾರ ಸಹನೆಯಿಂದ ಮರು ನಿರ್ಮಿಸುತ್ತಾನೆ. ರಾತ್ರಿ ಮರಳಿನ ಅರಮನೆ ಒಳಗೆ ಅಪಾರ ಸೆಕೆಯ ಅನುಭವ ಆದಾಗ ಹೊರಗೆ ಬಂದು ಆಕಾಶ ನೋಡುತ್ತಾ ಮಲಗುತ್ತಾನೆ. ಚಿನ್ನ, ರತ್ನಗಳಿರುವ ಅರಮನೆಯಲ್ಲಿ ಮಲಗುವ ರಾಜನಿಗೆ ರಾತ್ರಿ ನಿದ್ರೆಯೇ ಬರುವುದಿಲ್ಲ. ಆದರೆ, ನನಗೆ ಕಣ್ತುಂಬಾ ನಿದ್ದೆ  ಬರುತ್ತೆ. ಯಾರ ಭಯವೂ ಇಲ್ಲ. ಹಣ- ಐಶ್ವರ್ಯ ಇದ್ದಲ್ಲಿ ಮನುಷ್ಯ ಸಕಲ ನೆಮ್ಮದಿ ಕಳಕೊಂಡಿರುತ್ತಾನೆ ಎನ್ನುತ್ತಾನೆ ಮಾರ್ಸಿಯೋ. ಈಗ ಹೇಳಿ, ಯಾರು ಜಗತ್ತಿನ ಅತ್ಯಂತ ಖುಷಿಯ ಮನುಷ್ಯ?