ರಸಾನುಭೂತಿ ನೀಡಿದ ನೃತ್ಯ ದೀಪಂ

Team Udayavani, Jan 19, 2018, 2:48 PM IST

ಭರತಾಂಜಲಿ (ರಿ.) ಕೊಟ್ಟಾರ ಪ್ರಸ್ತುತಪಡಿಸಿದ ಕಲಾ ಸಂಸ್ಥೆಗಳ 12 ವರ್ಷದೊಳಗಿನ ಮಕ್ಕಳ ನೃತ್ಯ ಸಂಭ್ರಮ “ನೃತ್ಯ ದೀಪಂ’ ಇತ್ತೀಚೆಗೆ ಮಂಗಳೂರಿನ ಪುರಭವನದಲ್ಲಿ ನಡೆಯಿತು. ನಾಟ್ಯ ಗುರು ಉಳ್ಳಾಲ್‌ ಮೋಹನ್‌ ಕುಮಾರ್‌ ಮತ್ತು ವಿದುಷಿ ಕಮಲಾ ಭಟ್‌ ಉಪಸ್ಥಿತಿಯಲ್ಲಿ ನಡೆದ ನೃತ್ಯ ಕಾರ್ಯಕ್ರಮ  ರಸಾನುಭೂತಿಯನ್ನು ನೀಡುವಲ್ಲಿ ಯಶಸ್ವಿಯಾಗಿದೆ.

 ತಿಮಾ ಶ್ರೀಧರ್‌ ಶಿಷ್ಯೆಯಾದ ಅನ್ವಿತಾ ರಾವ್‌ ಅವರ ಗಣೇಶ ಸ್ತುತಿಯೊಂದಿಗೆ ಆರಂಭವಾದ ನೃತ್ಯ ನಾಟ ರಾಗದ ಚುಟುಕು ಸಾಹಿತ್ಯದ ಸಂಯೋಜನೆಯಲ್ಲಿ ಸುಂದರವಾಗಿ ಮೂಡಿಬಂತು. ತನ್ವಿ ಜಿ. ಅವರು ಪ್ರದರ್ಶಿಸಿದ ಶುದ್ಧ ಧನ್ಯಾಸಿ ರಾಗದ ಪ್ರಣವಕಾರಂ ಅರ್ಥಗರ್ಭಿತ ಸಾಹಿತ್ಯವನ್ನು ಒಳಗೊಂಡಿದ್ದು, ಹಸ್ತಮುದ್ರಿಕೆ ಅಂಗಶುದ್ಧ ನೃತ್ಯ ಭಂಗಿ ಮೆಚ್ಚುಗೆ ಪಡೆಯಿತು.ಸುಮನಸ ರಂಜನಿ ರಾಗದ ಶಿವ ಸ್ತುತಿ ಮೇಘಾರಾವ್‌ ಅವರ ವಯಸ್ಸಿಗೂ ಮೀರಿದ ನೃತ್ಯ ಪ್ರಾವೀಣ್ಯತೆಯನ್ನು ಹೊರ ತಂದಿತು. 

 ಸ್ಪಂದನಾ ಐತಾಳ್‌ ಕದ್ರಿ ಪ್ರದರ್ಶಿಸಿದ ತ್ರಿಮಾತಾ ಕೌತವಂನಲ್ಲಿ ಜತಿ ಕೊಂಚ ಎಡವಿದರೂ ಪುಟ್ಟ ಕಲಾವಿದೆ ಬುದ್ಧಿವಂತಿಕೆಯಿಂದ ಹೆಜ್ಜೆಯನ್ನು ತಾಳಕ್ಕೆ ತಂದು ಸೇರಿಸುವಲ್ಲಿ ಯಶ ಕಂಡಿದ್ದು ಶ್ಲಾಘನೀಯ.  ಕಮಲಾ ಭಟ್‌ ಶಿಷ್ಯರಾದ ಸ್ಮತಿ ಹಾಗೂ ಸಿದ್ಧಿ ಹರೀಶ್‌ ಪ್ರಸ್ತುತಪಡಿಸಿದ ಆನಂದ ನರ್ತನ ಗಣಪತಿ ಹಾಗೂ ಚತುರಶ್ರೀ ಜಾತಿ ಅಲರಿಪು ಪುಟಾಣಿಗಳ ತಾಳ ಜ್ಞಾನವನ್ನು ಪ್ರದರ್ಶಿಸಿತು.

 ದೀಪಕ್‌ ಪುತ್ತೂರು ಅವರ ಶಿಷ್ಯೆ ಅಕ್ಷಯಾ ಪಾರ್ವತಿ ಸರೋಳಿ ಪ್ರದರ್ಶಿಸಿದ ಪ್ರಣವಕಾರ ಆನಂದ ನಟಪಾದಂ ಹಾಗೂ ದಾಸ ಸಾಹಿತ್ಯದ ಆಡಲು ಹೋಗೋಣ ಬಾರೋ ರಂಗದಲ್ಲಿ ಮೂಡಿಬಂತು. ಸುಧೀರ್‌ ಕೊಡವೂರು ಮತ್ತು ಮಾನಸಿ ಸುಧೀರ್‌ ಅವರ ಪುತ್ರಿ ಹಾಗು ಶಿಷ್ಯೆ ಪ್ರದರ್ಶಿಸಿದ ರಾಗಮಾಲಿಕೆ ಆದಿತಾಳ “ಕಾಣದ ಸೀತೆಯ’ ರಚನೆಯ ಡಿ. ವಿ ಪ್ರಸನ್ನ ಕುಮಾರ್‌ ಅವರ ಪದವರ್ಣ ಶ್ರೀ ರಾಮನ ಕಥಾಭಾಗ ಹಾಗೂ ಮನೋಜ್ಞ ನೃತ್ಯ ಭಂಗಿಗಳು ತಾಳ ಜ್ಞಾನದ ಹೆಜ್ಜೆಗಾರಿಕೆ ರಾಮಾಯಣವನ್ನೇ ಶಿಲೆಯಂತೆ ಕೆತ್ತಿದಂತಿತ್ತು. 

ಅಂತ್ಯದಲ್ಲಿ ಪ್ರವಿತಾ ಅಶೋಕ್‌ ಪುತ್ರಿಯರಾದ ಪೂರ್ವಿಕಾ ಹಾಗೂ ಗಾರ್ಗೀ ದೇವಿ ಪ್ರದರ್ಶಿಸಿದ ಬಿಭಾಶ್‌ ರಾಗದ ಕಾಳಿದಾಸ ಕೃತಿ ಹಾಗೂ ದಾಸ ಸಾಹಿತ್ಯ ಗುಮ್ಮನ ಕರೆಯದಿರೋ ರಾಗಮಾಲಿಕೆಯ ನೃತ್ಯಾಭಿನಯ ಪುಟಾಣಿಗಳ ನೃತ್ಯಾಸಕ್ತಿ, ನೃತ್ಯಾಭ್ಯಾಸವನ್ನು ಒರೆಗಲ್ಲಿಗೆ ಹಚ್ಚಿದಂತಿತ್ತು. ಪ್ರತಿಮಾ ಶ್ರೀಧರ್‌, ಶ್ರೀಧರ ಹೊಳ್ಳ ಇವರುಗಳು ತಮ್ಮ ಭರತಾಂಜಲಿ ಸಂಸ್ಥೆಯ ಮೂಲಕ “ನೃತ್ಯ ದೀಪಂ’ ಕಾರ್ಯಕ್ರಮವನ್ನು ಆಯೋಜಿಸಿ ಪುಟ್ಟ ಕಲಾವಿದರಿಗೆ ಏಕವ್ಯಕ್ತಿ ಪ್ರದರ್ಶವನ್ನು ನೀಡಲು ಅವಕಾಶ ಕಲ್ಪಿಸಿಕೊಟ್ಟು ಸಾರ್ಥಕತೆಯನ್ನು ಕಂಡುಕೊಂಡರು.

ಪ್ರಮೋದ್‌ ಉಳ್ಳಾಲ್‌