ಆ್ಯಂಟಿ ಮೈಕ್ರೊಬಿಯಲ್‌ ಪ್ರತಿರೋಧ

Team Udayavani, Feb 4, 2018, 6:00 AM IST

ಆ್ಯಂಟಿಬಯಾಟಿಕ್‌ ಪ್ರತಿರೋಧ ಅಪರಿಹಾರ್ಯವಾಗಿದೆ ಎಂಬುದು ಸ್ಪಷ್ಟ. ಆ್ಯಂಟಿ ಬಯಾಟಿಕ್‌ ಔಷಧಗಳಿಗೆ ಪ್ರತಿರೋಧವನ್ನು ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯುಎಚ್‌ಒ)ಯು ಸಾರ್ವಜನಿಕ ಆರೋಗ್ಯಕ್ಕೆ ಒಂದು ಭಾರೀ ಸವಾಲು ಎಂಬುದಾಗಿ ಘೋಷಿಸಿದೆ. 

ವಿವಿಧ ಸೋಂಕುಕಾರಕ ಸೂಕ್ಷ್ಮಜೀವಿಗಳಲ್ಲಿ, ಅದರಲ್ಲೂ ವಿಶೇಷವಾಗಿ, ಸಾಮಾನ್ಯ ಸೋಂಕುಗಳಿಂದ ತೊಡಗಿ ರಕ್ತಪ್ರವಾಹದ ಸೋಂಕು (ಸೆಪ್ಸಿಸ್‌), ಭೇದಿ, ನ್ಯುಮೋನಿಯಾ, ಮೂತ್ರಾಂಗ ವ್ಯೂಹ ಸೋಂಕುಗಳು ಮತ್ತು ಗೊನೋರಿಯಾದಂತಹ ತೀವ್ರ ತರಹದ ಕಾಯಿಲೆಗಳಿಗೂ ಕಾರಣವಾಗುವ ಏಳು ಬ್ಯಾಕ್ಟೀರಿಯಾಗಳಲ್ಲಿ ಆ್ಯಂಟಿ ಬಯಾಟಿಕ್‌ ಪ್ರತಿರೋಧ ಶಕ್ತಿ ಕಾಣಿಸಿಕೊಳ್ಳುತ್ತಿದೆ ಎಂಬುದಾಗಿ ಡಬ್ಲ್ಯುಎಚ್‌ಒ ಮಾಹಿತಿ ನೀಡಿದೆ. ಇದರ ಫ‌ಲಿತಾಂಶ ಅತೀವ ಕಳವಳಕ್ಕೆ ಕಾರಣವಾಗಿದೆ, ಜಗತ್ತಿನಾದ್ಯಂತ ಸೂಕ್ಷ್ಮಜೀವಿಗಳಲ್ಲಿ ಆ್ಯಂಟಿ ಬಯಾಟಿಕ್‌ ಪ್ರತಿರೋಧ ಬೆಳೆಯುತ್ತಿದೆ, ಇದರಿಂದಾಗಿ ಎಲ್ಲೆಡೆ “ಕೊಟ್ಟಕೊನೆಗೆ ಬಳಸಬೇಕಾದ ಆ್ಯಂಟಿ ಬಯಾಟಿಕ್‌’ಗಳನ್ನೂ ಉಪಯೋಗಿಸಬೇಕಾದಂತಹ ಅನಿವಾರ್ಯ ಸೃಷ್ಟಿಯಾಗಿದೆ. 

ಈ ಅನಾಹುತವನ್ನು ತಡೆಯಲು ಅಥವಾ ಕನಿಷ್ಠಪಕ್ಷ ಮುಂದೂಡಲು ಯಾವ ಕ್ರಮವನ್ನು ತೆಗೆದುಕೊಳ್ಳಬಹುದು? ಕಳೆದ ಕೆಲವಾರು ವರ್ಷಗಳಿಂದ ಈ ಕ್ಷೇತ್ರದಲ್ಲಿ ಪರಿಣತರಾದ ಜ್ಞಾನಿಗಳು ಮತ್ತು ವಿವಿಧ ಅಂತಾರಾಷ್ಟ್ರೀಯ ಆರೋಗ್ಯಸೇವಾ ಸಮೂಹಗಳಿಂದ ಹಲವು ವಿಭಿನ್ನ ಪರಿಹಾರ ಸೂತ್ರಗಳು ಪ್ರಸ್ತಾವಿಸಲ್ಪಟ್ಟಿವೆ. ಮಾನವರಲ್ಲಿ ಆ್ಯಂಟಿ ಬಯಾಟಿಕ್‌ ಬಳಕೆಯ ಮೇಲೆ ಕಠಿನ ನಿಯಂತ್ರಣ, ಆ್ಯಂಟಿ ಬಯಾಟಿಕ್‌ ನೀಡಬೇಕಾದರೆ ಖಚಿತವಾದ ವೈದ್ಯರ ಶಿಫಾರಸಿನ ಅಗತ್ಯ (ಶೀತ ಮತ್ತು ಇತರ ವೈರಲ್‌ ಸೋಂಕುಗಳಿಗೆ ಚಿಕಿತ್ಸೆ ನೀಡಲು ಆ್ಯಂಟಿ ಬಯಾಟಿಕ್‌ ಬಳಕೆ ಇಲ್ಲ), ವೈದ್ಯರ ಶಿಫಾರಸು ಇಲ್ಲದೆ ಆ್ಯಂಟಿ ಬಯಾಟಿಕ್‌ ಔಷಧ ನೀಡಬಾರದು (ಅನಗತ್ಯ ಆ್ಯಂಟಿ ಬಯಾಟಿಕ್‌ ಬಳಕೆಗೆ ಕಡಿವಾಣ) ಹಾಗೂ ಪಶು ಸಾಕಾಣಿಕೆ ಮತ್ತು ಕೃಷಿಯಲ್ಲಿ ಆ್ಯಂಟಿ ಬಯಾಟಿಕ್‌ಗಳ ನಿಯಂತ್ರಿತ, ಚಿಕಿತ್ಸೋದ್ದೇಶಕ್ಕಷ್ಟೇ ಬಳಕೆಯಂತಹ ಕ್ರಮಗಳ ಪ್ರಸ್ತಾವನೆಗಳು ಇದರಲ್ಲಿವೆ. 
(ಜ.21ರಿಂದ ಮುಂದುವರಿದ ಭಾಗ)

– ಮುಂದಿನ ವಾರಕ್ಕೆ