World Prematurity Day: ಅಂತಾರಾಷ್ಟ್ರೀಯ ಅವಧಿಪೂರ್ವ ಶಿಶು ಜನನ ದಿನ; ನವೆಂಬರ್‌ 17

Team Udayavani, Nov 17, 2024, 1:30 PM IST

ಪ್ರತೀ ವರ್ಷ ನವೆಂಬರ್‌ 17ರಂದು ಅಂತಾರಾಷ್ಟ್ರೀಯ ಅವಧಿಪೂರ್ವ ಶಿಶು ಜನನ ದಿನವನ್ನು ಆಚರಿಸಲಾಗುತ್ತದೆ. ಶಿಶುಗಳ ಅವಧಿಪೂರ್ವ ಜನಿಸುವುದು ಮತ್ತು ಅದರಿಂದ ಕುಟುಂಬಗಳ ಮೇಲೆ ಉಂಟಾಗುವ ಪರಿಣಾಮಗಳ ಬಗ್ಗೆ ಜಾಗತಿಕವಾಗಿ ಅರಿವು ಮೂಡಿಸುವ ಅಭಿಯಾನ ಈ ದಿನಾಚರಣೆಯ ಉದ್ದೇಶವಾಗಿದೆ. ಈ ವರ್ಷ ಅವಧಿಪೂರ್ವ ಶಿಶು ಜನನ ದಿನದ ಧ್ಯೇಯವಾಕ್ಯವು ‘ಎಲ್ಲೆಡೆಯೂ ಉತ್ಕೃಷ್ಟ ಆರೈಕೆಯ ಲಭ್ಯತೆ’ ಎಂಬುದಾಗಿದ್ದು, ಅವಧಿಪೂರ್ವ ಜನಿಸಿದ ಎಲ್ಲ ಶಿಶುಗಳು ಕೂಡ ಬದುಕುಳಿದು ಅತ್ಯುತ್ತಮ ಜೀವನ ನಡೆಸಲು ಸಾಧ್ಯವಾಗುವಂತಹ ಉತ್ಕೃಷ್ಟ ಗುಣಮಟ್ಟದ ಆರೈಕೆಯ ಅವಕಾಶ ಪಡೆಯಲು ಸಾಧ್ಯವಾಗಬೇಕೆಂದು ಈ ಧ್ಯೇಯವಾಕ್ಯದ ಆಶಯವಾಗಿದೆ.

1. ಅವಧಿಪೂರ್ವ ಶಿಶು ಜನನಕ್ಕೆ ಕಾರಣವೇನು ಮತ್ತು ಇದು ನಮ್ಮ ದೇಶದಲ್ಲಿ ಯಾಕೆ ಅತೀ ಸಾಮಾನ್ಯವಾಗಿ ಸಂಭವಿಸುತ್ತದೆ? ಮಹಿಳೆಯೊಬ್ಬರು ಗರ್ಭ ಧರಿಸಿದ ಬಳಿಕ ಎಷ್ಟು ಅವಧಿಯಲ್ಲಿ ಶಿಶುವಿಗೆ ಜನ್ಮ ನೀಡಬಹುದು ಮತ್ತು ಅದು ಸುರಕ್ಷಿತವಾಗಿ ಬದುಕುಳಿಯಬಹುದು? ಇಂತಹ ಅವಧಿಪೂರ್ವ ಶಿಶುಗಳ ಜಾಗತಿಕವಾಗಿ ಸ್ವೀಕೃತವಾಗಿರುವ ವರ್ಗೀಕರಣ ಹೇಗಿದೆ?

ಉತ್ತರ: ಗರ್ಭ ಧಾರಣೆಗೆ ಸಂಬಂಧಿಸಿ ಗರ್ಭಿಣಿಯು ಹೊಂದಿರುವ ಅನಾರೋಗ್ಯಗಳು, ತಾಯಿ ಹೊಂದಿರುವ ದೀರ್ಘ‌ಕಾಲೀನ ಅನಾರೋಗ್ಯಗಳು, ಸೋಂಕುಗಳು, ಅವಳಿ ಶಿಶು ಗರ್ಭ, ತಾಯಿಯ ಗರ್ಭಕೋಶದಲ್ಲಿ ಇರಬಹುದಾದ ಸಮಸ್ಯೆಗಳು, ಶಿಶುವಿನ ಸುತ್ತ ಹೆಚ್ಚುವರಿ ದ್ರವಾಂಶ ತುಂಬಿರುವುದು ಮತ್ತು ತಾಯಿಗೆ ಪೌಷ್ಟಿಕಾಂಶ ಕೊರತೆ ಇತ್ಯಾದಿ ಕಾರಣಗಳಿಂದ ಅವಧಿಪೂರ್ವ ಶಿಶು ಜನನವಾಗುತ್ತದೆ. 24 ವಾರಗಳು ಸಂಪೂರ್ಣಗೊಂಡ ಗರ್ಭಾವಸ್ಥೆಯ ಬಳಿಕ ಅಥವಾ 500 ಗ್ರಾಂಗಳಿಗಿಂತ ಹೆಚ್ಚು ದೇಹ ತೂಕ ಹೊಂದಿ ಜನಿಸಿದ ಯಾವುದೇ ಶಿಶು ಬದುಕುಳಿಯಲು ಶಕ್ತವಾಗಿರುತ್ತದೆ ಮತ್ತು ಲಭ್ಯವಿದ್ದರೆ ಸಂಪೂರ್ಣ ಚಿಕಿತ್ಸೆಯನ್ನು ಅದಕ್ಕೆ ಒದಗಿಸಬೇಕು. ಗರ್ಭಸ್ಥ ಶಿಶುವಿನ ವಿಷಯದಲ್ಲಿ ಇದನ್ನು ‘ಬದುಕುಳಿಯುವ ಅವಧಿ’ ಎಂದು ಪರಿಗಣಿಸಲಾಗುತ್ತದೆ. 24 ಸಂಪೂರ್ಣ ವಾರಗಳಿಗಿಂತ ಮುನ್ನ ಗರ್ಭವನ್ನು ತೆಗೆದುಹಾಕುವುದನ್ನು ‘ಗರ್ಭಪಾತ’ ಎಂದು ಕರೆಯಲಾಗುತ್ತದೆ. 24-28 ವಾರಗಳ ನಡುವಣ ಅವಧಿಯಲ್ಲಿ ಜನಿಸಿದ ಶಿಶುಗಳನ್ನು ‘ಅತ್ಯಂತ ಅವಧಿಪೂರ್ವ’ ಎಂದೂ, ಅವುಗಳ ಜನನ ಕಾಲದ ದೇಹತೂಕವು 2 ಕಿಲೊಗ್ರಾಂಗಿಂತ ಕಡಿಮೆ ಇದ್ದರೆ ‘ಅತ್ಯಂತ ಕಡಿಮೆ ದೇಹತೂಕದ ಶಿಶುಗಳು ಎಂದೂ ಕರೆಯಲಾಗುತ್ತಿದ್ದು, ಇಂತಹ ಶಿಶುಗಳು ಬದುಕುಳಿಯುವುದಕ್ಕೆ ಅಪಾರ ಚಿಕಿತ್ಸೆ, ನಿಗಾ ಬೇಕಾಗುತ್ತದೆ. 28ರಿಂದ 32 ವಾರಗಳ ನಡುವೆ ಜನಿಸಿದ ಶಿಶುಗಳು ‘ಅತೀ ಅವಧಿಪೂರ್ವ ಶಿಶು’ಗಳಾದರೆ 32ರಿಂದ 34 ವಾರಗಳ ನಡುವೆ ಜನಿಸಿದ ಶಿಶುಗಳು ‘ಮಧ್ಯಮ ಅವಧಿಪೂರ್ವ ಶಿಶು’ಗಳಾಗಿರುತ್ತವೆ. 34 ಸಂಪೂರ್ಣ ವಾರಗಳ ಬಳಿಕ ಆದರೆ 37 ಸಂಪೂರ್ಣ ವಾರಗಳಿಗಿಂತ ಮುನ್ನ ಜನಿಸಿದ ಶಿಶುಗಳನ್ನು ‘ವಿಳಂಬ ಅವಧಿಪೂರ್ವ ಶಿಶುಗಳು’ ಎನ್ನಲಾಗುತ್ತದೆ. 1ರಿಂದ 1.5 ಕಿಲೊಗ್ರಾಂ ದೇಹತೂಕ ಹೊಂದಿ ಜನಿಸಿದ ಯಾವುದೇ ಶಿಶುವನ್ನು ಅತ್ಯಂತ ಕಡಿಮೆ ದೇಹತೂಕದ ಶಿಶು ಎಂದೂ, 2.5 ಕಿಲೊಗ್ರಾಂಗಿಂತ ಕಡಿಮೆ ಆದರೆ 1.5 ಕಿಲೊಗ್ರಾಂಗಿಂತ ಹೆಚ್ಚು ದೇಹತೂಕ ಹೊಂದಿರು ಶಿಶುವನ್ನು ಕಡಿಮೆ ದೇಹತೂಕದ ಶಿಶು ಎನ್ನಲಾಗುತ್ತದೆ.

2. ಅವಧಿಪೂರ್ವ ಶಿಶು ಜನನಕ್ಕೆ ಸಂಬಂಧಿಸಿ ಅತೀ ಸಾಮಾನ್ಯವಾಗಿರುವ ವೈದ್ಯಕೀಯ ಸಮಸ್ಯೆ ಏನು?

ಉತ್ತರ: ಅವಧಿಪೂರ್ವ ಜನಿಸಿದ ಶಿಶುವಿನಲ್ಲಿ ಯಾವುದೇ ದೇಹಾಂಗ ವ್ಯವಸ್ಥೆಗಳು ಕೂಡ ಪೂರ್ಣವಾಗಿ ಬೆಳವಣಿಗೆ ಹೊಂದಿರುವುದಿಲ್ಲ. ಶ್ವಾಸಕೋಶಗಳು ಪೂರ್ಣ ಬೆಳವಣಿಗೆ ಆಗದೆ ಇರುವುದರಿಂದ ಉಸಿರಾಟಕ್ಕೆ ಸಂಬಂಧಿಸಿ ತೀವ್ರ ತೊಂದರೆ ಉಂಟಾಗಬಹುದು ಮತ್ತು ಶಿಶುವನ್ನು ವಿಶೇಷ ವೆಂಟಿಲೇಟರ್‌ ಆಧಾರದಲ್ಲಿ ಇರಿಸಬೇಕಾಗಬಹುದು. ಜತೆಗೆ ಅವಧಿಪೂರ್ವ ಜನಿಸಿದ ಶಿಶುಗಳು ಹೈಪೊಥರ್ಮಿಯಾ, ರಕ್ತದಲ್ಲಿ ಸಕ್ಕರೆಯಂಶ ಕಡಿಮೆಯಾಗುವುದು ಮತ್ತು ಸೋಂಕುಗಳಿಗೆ ಸುಲಭ ವಾಗಿ ತುತ್ತಾಗಬಲ್ಲವು. ಕರುಳುಗಳು ಬೆಳವಣಿಗೆ ಹೊಂದದೆ ಇರುವುದರಿಂದ ಸ್ತನ್ಯಪಾನವನ್ನು ಅರಗಿಸಿ ಕೊಳ್ಳುವುದು ಕಷ್ಟವಾಗಬಹುದಲ್ಲದೆ ಕರುಳುಗಳ ಇತರ ಸಮಸ್ಯೆಗಳು ಕೂಡ ತಲೆದೋರಬಹುದಾಗಿದೆ. ಇಂತಹ ಶಿಶುಗಳಲ್ಲಿ ವಾಂತಿ ಮತ್ತು ಸ್ತನ್ಯ ಪಾನ ಅಸಹಿಷ್ಣುತೆ ಸಾಮಾನ್ಯವಾಗಿರುತ್ತದೆ. ರಕ್ತನಾಳಗಳು ಪೂರ್ಣವಾಗಿ ಬೆಳವಣಿಗೆ ಹೊಂದದೆ ಇರುವುದರಿಂದ ಕಣ್ಣು ಗಳು ಮತ್ತು ಮೆದುಳಿನಲ್ಲಿ ತೊಂದರೆಗಳು ಕಾಣಿಸಿ ಕೊಳ್ಳಬಹುದು. ಭ್ರೂಣ ನಾಳಗಳು ಇನ್ನೂ ತೆರೆದೇ ಇರುವುದರಿಂದಾಗಿ ಹೃದಯ ಕೂಡ ಬಾಧಿತವಾಗಿ ಪೇಟೆಂಟ್‌ ಡಕ್ಟಸ್‌ ಆರ್ಟರಿಯೋಸಸ್‌ನಂತಹ ಸಮಸ್ಯೆ ಗಳು ಉಂಟಾಗಬಹುದು. ಶ್ರವಣ ಶಕ್ತಿಗೂ ತೊಂದರೆ ಯಾಗಬಹುದು.

3. ಅವಧಿಪೂರ್ವವಾಗಿ ಜನಿಸಿದ ಶಿಶುಗಳ ನರಶಾಸ್ತ್ರೀಯ ಬೆಳವಣಿಗೆಗೆ ಸಂಬಂಧಿಸಿದಂತೆ ಜೀವಂತ ಉಳಿಯುವಿಕೆ ಮತ್ತು ಸಹಜ ಬೆಳವಣಿಗೆಯ ಅವಕಾಶಗಳು, ಸಾಧ್ಯತೆಗಳೇನು?

ಉತ್ತರ: ಬದುಕುಳಿಯುವಿಕೆ ಮತ್ತು ಸಹಜ ಬೆಳವಣಿಗೆಯ ಫ‌ಲಿತಾಂಶಗಳು ಎಷ್ಟು ಅವಧಿಪೂರ್ವ ಜನನವಾಗಿದೆ ಮತ್ತು ಶಿಶುವಿನ ಆರಂಭಿಕ ಬದುಕಿನಲ್ಲಿ ಎದುರಾಗುವ ಅನಾರೋಗ್ಯಗಳು ಅಥವಾ ಸಂಕೀರ್ಣ ಸಮಸ್ಯೆಗಳನ್ನು ಅವಲಂಬಿಸಿದೆ. 32 ವಾರಗಳ ಬಳಿಕ ಜನಿಸಿದ ಶಿಶುಗಳಲ್ಲಿ ಬದುಕುಳಿಯುವ ಮತ್ತು ಸಹಜವಾಗಿ ಬೆಳವಣಿಗೆಯಾಗುವ ಸಾಧ್ಯತೆ ತಲಾ ಶೇ. 90ಕ್ಕಿಂತ ಅಧಿಕವಾಗಿರುತ್ತದೆ. 28ರಿಂದ 32 ವಾರಗಳ ನಡುವಣ ಅವಧಿಯಲ್ಲಿ ಜನಿಸುವ ಶಿಶುಗಳಲ್ಲಿ ಬದುಕುಳಿಯುವ ಸಾಧ್ಯತೆ ಶೇ. 80ಕ್ಕಿಂತ ಹೆಚ್ಚು ಮತ್ತು ಸಹಜವಾಗಿ ಬೆಳವಣಿಗೆ ಕಾಣುವ ಸಾಧ್ಯತೆ ಶೇ. 70ಕ್ಕಿಂತ ಹೆಚ್ಚು ಇರುತ್ತದೆ. 26ರಿಂದ 28 ವಾರಗಳ ನಡುವಣ ಅವಧಿಯಲ್ಲಿ ಜನಿಸಿ ಮಣಿಪಾಲ ಕಸ್ತೂರ್ಬಾ ಆಸ್ಪತ್ರೆಯ ನಿಯೊನೇಟಾಲಜಿಯಂತಹ ಕೇಂದ್ರದಲ್ಲಿ ನಿಗಾಕ್ಕೆ ಒಳಪಡುವ ಶಿಶುಗಳಲ್ಲಿ ಶೇ. 65ಕ್ಕಿಂತ ಹೆಚ್ಚು ಬದುಕುಳಿದರೆ ಶೇ. 50ಕ್ಕಿಂತ ಹೆಚ್ಚು ಶಿಶುಗಳು ಸಂಪೂರ್ಣ ಸಹಜವಾಗಿ ಬೆಳವಣಿಗೆ ಹೊಂದುತ್ತವೆ. 24ರಿಂದ 26 ವಾರಗಳ ನಡುವಣ ಅವಧಿಯಲ್ಲಿ ಜನಿಸುವ ಶಿಶುಗಳಲ್ಲಿ ಶೇ. 30ರಿಂದ 50ರಷ್ಟು ಶಿಶುಗಳು ಬದುಕುಳಿಯುತ್ತವಾದರೆ ಶೇ. 45ರಿಂದ 55 ಶಿಶುಗಳು ದೀರ್ಘ‌ಕಾಲೀನ ಸಮಸ್ಯೆಗಳನ್ನು ಹೊಂದಿರುತ್ತವೆ.

4. ಹೆರಿಗೆ ಸಮಯದಲ್ಲಿ ಗಾಯ ಅಥವಾ ಹಾನಿ ಅತ್ಯಂತ ಕಡಿಮೆಯಾಗುವಂತೆ ಹಾಗೂ ಶಿಶುವಿನ ಬದುಕುಳಿಯುವ ಸಾಧ್ಯತೆಗಳು ಗರಿಷ್ಠ ಮಟ್ಟದಲ್ಲಿರುವಂತೆ ಈ ಗರ್ಭಧಾರಣೆಗಳನ್ನು ನಿಭಾಯಿಸುವುದು ಹೇಗೆ?

ಉತ್ತರ: ಅವಧಿಪೂರ್ವ ಹೆರಿಗೆಯಾಗುವ ಸಾಧ್ಯತೆಯನ್ನು ಸಾಕಷ್ಟು ಮುಂಚಿತವಾಗಿ ಪತ್ತೆಹಚ್ಚಿದರೆ ಉತ್ತಮ ಫ‌ಲಿತಾಂಶವನ್ನು ಸಾಧಿಸಬಹುದಾಗಿದೆ. ಇಂತಹ ಹೆಚ್ಚು ಅಪಾಯದ ಗರ್ಭಧಾರಣೆಗಳಲ್ಲಿ ವೈದ್ಯಕೀಯ ಅಥವಾ ಸ್ತ್ರೀರೋಗಶಾಸ್ತ್ರೀಯ ಆರೋಗ್ಯ ಸಮಸ್ಯೆಗಳನ್ನು ಹೊಂದಿರುವ ಸ್ತ್ರೀಯರು ಒಳಗೊಂಡಿರುತ್ತಾರೆ. ಉದಾಹರಣೆಗೆ, ಹದಿಹರಯದ ಅಥವಾ ಹೆಚ್ಚು ವಯಸ್ಕ ತಾಯಂದಿರು, ಅಧಿಕ ರಕ್ತದೊತ್ತಡಕ್ಕೆ ಸಂಬಂಧಿಸಿದ ಸಮಸ್ಯೆಗಳು, ಮಧುಮೇಹ, ಗರ್ಭಕೋಶದ ಅಸಮರ್ಪಕ ಧಾರಣ ಸಾಮರ್ಥ್ಯ, ಮದ್ಯಪಾನ ಇತ್ಯಾದಿ. ಇಂತಹ ತಾಯಂದಿರನ್ನು ಹೆಚ್ಚು ಅಪಾಯದ ಪ್ರಕರಣಗಳ ನಿರ್ವಹಣೆಗಾಗಿ ಇರುವ ಸ್ತ್ರೀರೋಗ ಶಾಸ್ತ್ರೀಯ ಕೇಂದ್ರಗಳಲ್ಲಿ ನಿರ್ವಹಿಸಬೇಕು ಹಾಗೂ ಇಂತಹ ಪ್ರಕರಣಗಳಲ್ಲಿ ಜನಿಸುವ ಶಿಶುಗಳ ಸಾಕಣೆಗೆ ಮೀಸಲು ಎನ್‌ಐಸಿಯುಗಳು, ತಜ್ಞ ವೈದ್ಯರು ಮತ್ತು ಸಿಬಂದಿ ಅಗತ್ಯವಿರುತ್ತದೆ. ಅಗತ್ಯ ಸೌಲಭ್ಯಗಳು ಲಭ್ಯವಿಲ್ಲದೆ ಇದ್ದಾಗ ಇಂತಹ ಗರ್ಭಿಣಿಯರನ್ನು ಮೀಸಲು ಕೇಂದ್ರಗಳಿಗೆ ಸ್ಥಳಾಂತರಿಸುವ ಮೂಲಕ ತಾಯಿ ಮತ್ತು ಶಿಶುವಿನ ಪ್ರಾಣ ಉಳಿಸಬಹುದಾಗಿದೆ. ಇಂತಹ ಗರ್ಭಿಣಿಯರನ್ನು ವೈದ್ಯಕೀಯವಾಗಿ ಸೂಕ್ತ ರೀತಿಯಲ್ಲಿ ನಿರ್ವಹಿಸಿದರೆ ಹೆರಿಗೆಯನ್ನು ಸಾಕಷ್ಟು ಮುಂದೂಡಬಹುದು ಮತ್ತು ಸಾಕಷ್ಟು ಪ್ರಕರಣಗಳಲ್ಲಿ ಅವಧಿಪೂರ್ವ ಶಿಶುಜನನವನ್ನು ತಪ್ಪಿಸಬಹುದಾಗಿದೆ. ಶಿಶುಜನನದ ಒಂದು ವಾರದ ಒಳಗೆ ತಾಯಿಗೆ ನೀಡಲಾಗುವ ಶಿಶುಜನನೋತ್ತರ ಸ್ಟೀರಾಯ್ಡಗಳಿಂದ ಅವಧಿಪೂರ್ವ ಜನಿಸಿದ ಶಿಶುವಿನಲ್ಲಿ ಶ್ವಾಸಾಂಗ ಸಮಸ್ಯೆಗಳನ್ನು ಗಮನಾರ್ಹವಾಗಿ ಕಡಿಮೆ ಮಾಡಬಹುದಾಗಿದೆ.

5. ಹೆರಿಗೆಯ ಸಂದರ್ಭದಲ್ಲಿ ಗಮನದಲ್ಲಿ ಇರಿಸಬೇಕಾದ ವಿಶೇಷ ಅಂಶಗಳು ಯಾವುವು?

ಉತ್ತರ: ಅವಧಿಗಿಂತ ತುಂಬಾ ಮುಂಚಿತವಾಗಿ ಜನಿಸಿದ ಶಿಶುಗಳಿಗೆ ತಾಯಿಯ ಗರ್ಭದೊಳಗಿನ ವಾತಾವರಣದಿಂದ ಹೊರಗಿನ ವಾತಾವರಣಕ್ಕೆ ಹೊಂದಿಕೊಳ್ಳುವುದು ಕಷ್ಟವಾಗಬಹುದು. ಇದಕ್ಕಾಗಿ ಶಿಶುಜನನೋತ್ತರ ಪುನಶ್ಚೇತನ, ಶಾಖದ ವಾತಾವರಣ ಒದಗಿಸುವುದು ಮತ್ತು ಶ್ವಾಸಾಂಗ ನೆರವಿ ನಂತಹ ನೆರವುಗಳು ಅಗತ್ಯವಾಗುತ್ತವೆ. ಇಂತಹ ಶಿಶುಗಳನ್ನು ಸೂಕ್ಷ್ಮವಾಗಿ ನಿರ್ವಹಿಸುವುದು ಅತೀ ಮುಖ್ಯವಾಗಿದ್ದು, ಈ ಮೂಲಕ ಶ್ವಾಸಾಂಗ ಹಾನಿ ಅಥವಾ ಗಾಯ ಮತ್ತು ಮಿದುಳಿನಲ್ಲಿ ರಕ್ತಸ್ರಾವವನ್ನು ತಡೆಯಬಹುದಾಗಿದೆ. ಹಾಗೆಯೇ ಧನಾತ್ಮಕ ಒತ್ತಡ (ಶಾಖ, ಆದ್ರತೆ ಮತ್ತು ಆಮ್ಲಜನಕ-ಗಾಳಿ ಮಿಶ್ರಿತ ಶ್ವಾಸಾಂಗ ನೆರವು)ದಿಂದ ಇಂತಹ ಅವಧಿಪೂರ್ವವಾಗಿ ಜನಿಸಿದ ಶಿಶುಗಳ ಫ‌ಲಿತಾಂಶ ಉತ್ತಮಗೊಳ್ಳುತ್ತದೆ. ಇಂತಹ ಶಿಶುಗಳಿಗೆ ತೀರಾ ಹೆಚ್ಚಾಗಿ ಆಮ್ಲಜನಕವನ್ನು ಕೂಡ ನೀಡಬಾರದು, ಹಾಗೆ ಮಾಡಿದರೆ ಕಣ್ಣುಗಳು ಮತ್ತು ಶ್ವಾಸಕೋಶಗಳಿಗೆ ಹಾನಿಯಾಗುವ ಸಾಧ್ಯತೆಯಿರುತ್ತದೆ.

6. ಉತ್ತಮ ಫ‌ಲಿತಾಂಶ ಪಡೆಯುವುದಕ್ಕಾಗಿ ಇಂತಹ ಶಿಶುಗಳನ್ನು ಯಾವಾಗ ಮತ್ತು ಹೇಗೆ ಉನ್ನತ ವೈದ್ಯಕೀಯ ಕೇಂದ್ರಗಳಿಗೆ ರವಾನಿಸಬೇಕು?

ಉತ್ತರ: ಅವಧಿಪೂರ್ವ ಶಿಶುಗಳ ಸಾಗಣೆಯು ಕೌಶಲಯುತ ದಾದಿಯರು, ನಿಯೋನೇಟಾಲಜಿಸ್ಟ್‌ಗಳು ಮತ್ತು ಅರೆವೈದ್ಯಕೀಯ ಸಿಬಂದಿಯ ನೆರವಿನೊಂದಿಗೆ ನಡೆಯಬೇಕು. ಈ ಸಿಬಂದಿ ನವಜಾತ ಶಿಶುವಿನ ಶ್ವಾಸಾಂಗವನ್ನು ನಿರ್ವಹಿಸುವುದರಲ್ಲಿ ತರಬೇತಿ ಪಡೆದಿರಬೇಕು. ಅನಾರೋಗ್ಯಪೀಡಿತ ನವಜಾತ ಶಿಶುಗಳು ಅಥವಾ ಅವಧಿಪೂರ್ವ ಜನಿಸಿದ ಶಿಶುಗಳನ್ನು ರವಾನಿಸುವ ಆ್ಯಂಬುಲೆನ್ಸ್ನಲ್ಲಿ ಇನ್‌ಕ್ಯುಬೇಟರ್‌, ಮಾನಿಟರ್‌, ವಿದ್ಯುತ್‌ ಸರಬರಾಜು, ಸಕ್ಷನ್‌ ಯಂತ್ರ ಹಾಗೂ ಗಾಳಿ ಮತ್ತು ಆಮ್ಲಜನಕ ಮೂಲಗಳು ಇದ್ದು, ಇವು ನವಜಾತ ಶಿಶುವಿನ ರವಾನೆ ವೆಂಟಿಲೇಟರ್‌ ಗೆ ಹೊಂದಾಣಿಕೆ ಆಗುವಂತಿರಬೇಕು. ಶಿಶುವಿನ ರಕ್ತದಲ್ಲಿ ಗ್ಲುಕೋಸ್‌ ಮಟ್ಟ ಕಡಿಮೆಯಾಗದೆ ಇರುವುದಕ್ಕಾಗಿ ಶಿಶುವನ್ನು ಗ್ಲುಕೋಸ್‌ ಐವಿ ಡ್ರಿಪ್‌ಗೆ ಒಳಪಡಿಸಬೇಕು. ಶಿಶುವನ್ನು ದಾಖಲಿಸಬೇಕಾದ ನವಜಾತ ಶಿಶು ತೀವ್ರ ನಿಗಾ ಘಟಕಕ್ಕೆ ಮುಂಚಿತವಾಗಿ ಮಾಹಿತಿ ನೀಡಿ ಘಟಕವು ಶಿಶುವಿನ ದಾಖಲಾತಿಗೆ ಸನ್ನದ್ಧವಾಗಿರುವಂತೆ ನೋಡಿಕೊಳ್ಳಬೇಕು. ಮುಂದಿನ ವಾರಕ್ಕೆ

7. ಪ್ರತೀ ಪ್ರಸವೋತ್ತರ ತೀವ್ರ ನಿಗಾ ಘಟಕ (ನಿಯೋನೇಟಲ್‌ ಐಸಿಯು-ಎನ್‌ಐಸಿಯು)ದಲ್ಲಿ ಯಾವೆಲ್ಲ ಸೌಲಭ್ಯಗಳು ಇರುತ್ತವೆ?

ಉತ್ತರ: ಪ್ರಸವೋತ್ತರ ತೀವ್ರ ನಿಗಾ ಘಟಕ (ಎನ್‌ಐಸಿಯು) ಗಳಲ್ಲಿ ಮೂರು ಹಂತದವು ಇರುತ್ತವೆ. ಆರಂಭಿಕ ಹಂತದ ಎನ್‌ಐಸಿಯುಗಳು ಆರೋಗ್ಯವಂತ ನವಜಾತ ಶಿಶುಗಳಿಗೆ ಪ್ರಾಥಮಿಕ ಆರೈಕೆಯನ್ನು ಒದಗಿಸಬಲ್ಲಂಥವಾಗಿರುತ್ತವೆ. ದ್ವಿತೀಯ ಹಂತದ ಎನ್‌ಐಸಿಯುಗಳು ಅವಧಿಪೂರ್ವವಾಗಿ ಜನಿಸಿದ್ದರೂ ಆರೋಗ್ಯ ಸ್ಥಿರವಾಗಿರುವ ಶಿಶುಗಳಿಗೆ ಮತ್ತು ಲಘು ಅನಾರೋಗ್ಯಗಳನ್ನು ಹೊಂದಿರುವ ನವಜಾತ ಶಿಶುಗಳಿಗೆ ಆರೈಕೆ ಒದಗಿಸಬಲ್ಲವಾಗಿವೆ. ಮೂರನೇ ಹಂತದ ಎನ್‌ಐಸಿಯುಗಳು ತೀವ್ರವಾಗಿ ಅಸ್ವಸ್ಥವಾಗಿರುವ ನವಜಾತ ಶಿಶುಗಳಿಗೆ ಮತ್ತು 32 ಸಂಪೂರ್ಣ ವಾರಗಳಿಗಿಂತ ಕಡಿಮೆ ಅವಧಿಯಲ್ಲಿ ಅಥವಾ 1,200 ಗ್ರಾಂಗಳಿಗಿಂತ ಕಡಿಮೆ ದೇಹತೂಕ ಹೊಂದಿ ಜನಿಸಿದ ಎಲ್ಲ ಶಿಶುಗಳಿಗೆ ಚಿಕಿತ್ಸೆ ಮತ್ತು ಆರೈಕೆ ಒದಗಿಸಬಲ್ಲವಾಗಿರುತ್ತವೆ. ಮೂರನೇ ಹಂತದ ಬಿ ಎನ್‌ಐಸಿಯುಗಳು ಅತ್ಯುಚ್ಚ ದರ್ಜೆಯ ಪ್ರಸವೋತ್ತರ ಆರೈಕೆ ಮತ್ತು ಚಿಕಿತ್ಸೆಯನ್ನು ಶಿಶುಗಳಿಗೆ ನೀಡಬಲ್ಲವಾಗಿರುತ್ತವೆ. ಇಂತಹ ಕೇಂದ್ರಗಳಲ್ಲಿ 1 ಕಿಲೊಗ್ರಾಂಗೂ ಕಡಿಮೆ ದೇಹತೂಕ ಹೊಂದಿ ಜನಿಸಿರುವ ಅತ್ಯಂತ ಪುಟ್ಟ ಶಿಶುಗಳನ್ನು ನಿರ್ವಹಿಸಬಲ್ಲ ಮತ್ತು ಅವಧಿಪೂರ್ವ ಶಿಶುಗಳಿಗೆ ಶಸ್ತ್ರಚಿಕಿತ್ಸೆ ನಡೆಸಬಲ್ಲ ಸೌಲಭ್ಯಗಳಿರುತ್ತವೆ. ಇಂತಹ ಕೇಂದ್ರಗಳಲ್ಲಿ ಮಾನವ ಸ್ತನ್ಯಬ್ಯಾಂಕ್‌ ಇರುತ್ತದೆ ಹಾಗೂ ಅತ್ಯಂತ ಹೆಚ್ಚು ತರಂಗಾಂತರದ ವೆಂಟಿಲೇಶನ್‌, ಇನ್‌ಹೇಲ್‌ಡ್‌ ನೈಟ್ರಿಕ್‌ ಆಕ್ಸೆ„ಡ್‌ (ಜಿNO), ಥೆರಾಪ್ಯುಟಿಕ್‌ ಹೈಪೊಥರ್ಮಿಯಾ ಇತ್ಯಾದಿ ಒದಗಿಸಬಲ್ಲ ಸೌಲಭ್ಯಗಳಿರುತ್ತವೆ. ಸಾಮಾನ್ಯವಾಗಿ ಇಂತಹ ಕೇಂದ್ರಗಳಲ್ಲಿ ಕೆಲಸ ಮಾಡುವ ಸ್ನಾತಕೋತ್ತರ ಪದವೀಧರ ಮಕ್ಕಳ ವೈದ್ಯರು ಮಕ್ಕಳ ವೈದ್ಯಕೀಯದ ಉಪವಿಭಾಗವಾದ ಪ್ರಸವೋತ್ತರ ಶಿಶು ಆರೈಕೆ (ನಿಯೋನೇಟಾಲಜಿ)ಯಲ್ಲಿ ತರಬೇತಿ (ಡಿಎಂ ಅಥವಾ ಡಿಎನ್‌ಬಿ)ಯನ್ನು ಹೊಂದಿರುತ್ತಾರೆ. ಭಾರತದಲ್ಲಿ ಇದುವರೆಗೆ ಒಟ್ಟು 15 ಇಂತಹ ಮೂರನೇ ಹಂತದ ಬಿ ಎನ್‌ ಐಸಿಯು ಹೊಂದಿರುವ ಆಸ್ಪತ್ರೆಗಳಿದ್ದು, ಮಣಿಪಾಲ ಕೆಎಂಸಿಯೂ ಇವುಗಳಲ್ಲಿ ಒಂದಾಗಿದೆ.

8. ಅವಧಿಪೂರ್ವವಾಗಿ ಜನಿಸಿದ ಶಿಶುಗಳ ಆರೈಕೆ ಯಲ್ಲಿ ನಿಯೋನೇಟಲ್‌ ನರ್ಸ್‌ಗಳ ಪಾತ್ರ ಏನು?

ಉತ್ತರ: ಎನ್‌ಐಸಿಯುನಲ್ಲಿ ದಾಖಲಿಸಲ್ಪಟ್ಟಿರುವ ಅತ್ಯಂತ ದುರ್ಬಲರಾದ ಶಿಶುಗಳಿಗೆ ಪ್ರಾಥಮಿಕ ಆರೈಕೆಯನ್ನು ಒದಗಿಸುವ ಹೊಣೆಗಾರಿಕೆ ಈ ನಿಯೋನೇಟಲ್‌ ನರ್ಸ್‌ಗಳ ಮೇಲಿರುತ್ತದೆ. ದೇಹದ ಜೀವಧಾರಕ ಪ್ರಕ್ರಿಯೆಗಳ ಮೇಲೆ ನಿಗಾ ಇರಿಸುವುದು, ಕೊಳವೆ ಅಥವಾ ಚಮಚದ ಮೂಲಕ ಆಹಾರ ಉಣಿಸುವುದು, ಔಷಧಗಳನ್ನು ನೀಡುವುದು, ಸೋಂಕು ನಿಯಂತ್ರಣ, ಬೆಳವಣಿಗೆಯ ಆರೈಕೆ (ಬಟ್ಟೆ ಕಟ್ಟುವುದು, ಸುತ್ತಿ ಮಲಗಿಸುವುದು, ನೋವು ನಿವಾರಣೆ ಇತ್ಯಾದಿ) ಹಾಗೂ ದೇಹ ಸಂಪರ್ಕ (ಕಾಂಗರೂ ಮದರ್‌ ಕೇರ್‌) ಮತ್ತು ಎದೆಹಾಲು ಉಣಿಸುವಂತಹ ಉತ್ತಮ ಅಭ್ಯಾಸಗಳನ್ನು ಇವರು ನಡೆಸುತ್ತಿರುತ್ತಾರೆ. ಇದರ ಜತೆಗೆ ಇಂತಹ ಶಿಶುಗಳ ತಾಯಂದಿರಿಗೆ ನೆರವನ್ನೂ ಇವರು ಒದಗಿಸುತ್ತಾರೆ. ಈ ಶಿಶುಗಳ ತಾಯಂದಿರು ಎದೆಹಾಲು ಹಿಂಡಿ ಊಡಿಸುವುದು ಅಥವಾ ಮೊಲೆಹಾಲು ಉಣಿಸುವುದಕ್ಕೆ ಪ್ರೋತ್ಸಾಹವನ್ನು ಒದಗಿಸುವ ಆಪ್ತಸಮಾಲೋಚನೆಯನ್ನು ಕೂಡ ಈ ನರ್ಸ್‌ಗಳು ನೀಡುತ್ತಾರೆ.

9. ಅವಧಿಪೂರ್ವ ಶಿಶುವಿನ ಆರೈಕೆಯಲ್ಲಿ ತಾಯಿ, ತಂದೆ ಮತ್ತು ನಿಕಟ ಕುಟುಂಬಸ್ಥರು ಕೂಡ ಪಾತ್ರ ವಹಿಸುತ್ತಾರೆಯೇ?

ಉತ್ತರ: ಆರೈಕೆಯ ಕುಟುಂಬ ಕೇಂದ್ರಿತ ಮಾದರಿಯಲ್ಲಿ ನಸ್‌ ìಗಳ ಜತೆಗೆ ಹೆತ್ತವರು (ತಾಯಿ ಮತ್ತು ತಂದೆ) ಪ್ರಾಥಮಿಕ ಆರೈಕೆದಾರರಾಗಿರುತ್ತಾರೆ. ಎನ್‌ಐಸಿಯುಗಳಲ್ಲಿ ಹೆತ್ತವರ ಪ್ರವೇಶಕ್ಕೆ ಯಾವುದೇ ನಿರ್ಬಂಧಗಳು ಇರುವುದಿಲ್ಲ ಮತ್ತು ಅವರು ಶಿಶು ವೈದ್ಯರ ದೈನಿಕ ಭೇಟಿಯ ಸಂದರ್ಭದಲ್ಲಿ ಉಪಸ್ಥಿತರಿರಲು ಹಾಗೂ ಶಿಶು ಸಂಬಂಧಿ ಚಟುವಟಿಕೆಗಳಾದ ಹಾಲು ಉಣಿಸುವುದು, ನ್ಯಾಪಿ ಬದಲಾಯಿಸುವುದು, ಶಿಶುವನ್ನು ಸರಿಯಾಗಿ ಮಲಗಿಸುವುದು ಮತ್ತು ತೂಕ ಅಳತೆ, ನೋವುಂಟಾಗುವ ಚಿಕಿತ್ಸೆಗಳ ಸಂದರ್ಭದಲ್ಲಿ ಶಿಶುಗಳನ್ನು ಸಂತೈಸಲು ಅನುವು ಮಾಡಿಕೊಡಲಾಗುತ್ತದೆ. ಜತೆಗೆ ಶಿಶುವಿನ ನಿರ್ವಹಣೆಗೆ ಸಂಬಂಧಿಸಿದ ಯಾವುದೇ ನಿರ್ಧಾರ ಪ್ರಕ್ರಿಯೆಯಲ್ಲಿ ಅವರನ್ನು ಸೇರಿಸಿಕೊಳ್ಳಲಾಗುತ್ತದೆ. ಇದರಿಂದ ತಾಯಿ-ಶಿಶುವಿನ ಬೆಸುಗೆ ದೃಢವಾಗುತ್ತದೆ, ಎನ್‌ಐಸಿಯು ದಾಖಲಾತಿಯ ಒತ್ತಡ, ಚಿಂತೆಯನ್ನು ಕಡಿಮೆ ಮಾಡಲು ಹೆತ್ತವರಿಗೆ ನೆರವಾಗುತ್ತದೆ ಮತ್ತು ಶಿಶು ಪ್ರಗತಿ ಉತ್ತಮವಾಗುತ್ತದೆ. ಆದರೆ ಇದಕ್ಕೆ ಹೆಚ್ಚುವರಿ ಸ್ಥಳಾವಕಾಶ ಮತ್ತು ವಿಶೇಷವಾಗಿ ನರ್ಸ್‌ಗಳ ಜತೆಗೆ ಸಿಬಂದಿ ಕೂಡ ಅಗತ್ಯವಾಗುತ್ತದೆ.

10. ಅವಧಿಪೂರ್ವ ಶಿಶುಗಳು ಆಸ್ಪತ್ರೆಯಿಂದ ಬಿಡುಗಡೆ ಹೊಂದಿ ಮನೆಗೆ ತೆರಳಲು ಯಾವೆಲ್ಲ ಮಾನದಂಡಗಳು ಪೂರ್ಣವಾಗಿರಬೇಕು ಮತ್ತು ಇದರಲ್ಲಿ ಒಳಗೊಳ್ಳುವ ವೆಚ್ಚ ಎಷ್ಟು?

ಉತ್ತರ: ಎ. ಅವಧಿಪೂರ್ವ ಜನಿಸಿದ ಶಿಶುಗಳು ರಕ್ತದೊತ್ತಡ ಮತ್ತು ಹೃದಯ ಬಡಿತ ಗತಿಯು ಸ್ಥಿರತೆ (ಹೀಮೊಡೈನಾಮಿಕಲೀ ಸ್ಟೇಬಲ್‌) ಸಾಧಿಸುವ ತನಕ ಅವರಿಗೆ ಎನ್‌ಐಸಿಯು ಆರೈಕೆ ಅಗತ್ಯವಾಗಿರುತ್ತದೆ; ಆ ಬಳಿಕ ಆಸ್ಪತ್ರೆಯಿಂದ ಬಿಡುಗಡೆ ಮಾಡುವುದಕ್ಕೆ ಮುನ್ನ ಅವರನ್ನು ತಾಯಿಯ ಜತೆಗೆ ಕೊಠಡಿಗೆ ವರ್ಗಾಯಿಸಿ ಜತೆಗಿರಿಸಲಾಗುತ್ತದೆ. ರಕ್ತನಾಳಕ್ಕೆ ಚುಚ್ಚಿದ ದ್ರವೌಷಧ ಮತ್ತು ಶ್ವಾಸಾಂಗ ನೆರವಿನಿಂದ ವಿರಹಿತರಾಗಿ, ನೇರ ಎದೆಹಾಲು ಉಣ್ಣುವ ಹಾಗೂ 1,800 ಗ್ರಾಂ ದೇಹತೂಕ ಹೊಂದಿದ ಬಳಿಕ ಈ ಶಿಶುಗಳನ್ನು ತಾಯಿಯ ಜತೆಗಿರಲು ವಾಡ್‌ ìಗೆ ವರ್ಗಾಯಿಸಲಾಗುತ್ತದೆ. ಇಂತಹ ಶಿಶುಗಳ ಆರೈಕೆ ಮಾಡುವುದಕ್ಕೆ ತಾಯಿ ಮತ್ತು ಕುಟುಂಬ ಸದಸ್ಯರಿಗೆ ತರಬೇತಿ ನೀಡಬೇಕಿರುತ್ತದೆ. ಆಸ್ಪತ್ರೆಯಿಂದ ಬಿಡುಗಡೆಗೊಳ್ಳುವ ವೇಳೆಗೆ ನಾವು ಶಿಶುಗಳು 2.5 ಕಿಲೊಗ್ರಾಂ ದೇಹತೂಕ ಹೊಂದುವ ತನಕ ಕಾಂಗರೂ ತಾಯಿ ಆರೈಕೆಯನ್ನು ಮುಂದುವರಿಸಲು, ಶಿಶುವನ್ನು ಬೆಚ್ಚಗೆ ಇರಿಸಿಕೊಳ್ಳಲು, ಉತ್ತಮ ನೈರ್ಮಲ್ಯ ಕಾಪಾಡಿಕೊಳ್ಳಲು, ಸರಿಯಾಗಿ ಎದೆಹಾಲು ಉಣಿಸಲು ಮತ್ತು ನಿಯಮಿತವಾಗಿ ಫಾಲೊಅಪ್‌ ಭೇಟಿಗೆ ಬರುವುದಕ್ಕೆ ತಿಳಿಸುತ್ತೇವೆ.

ಬಿ. ಶಿಶು ಎಷ್ಟು ಅವಧಿಪೂರ್ವವಾಗಿ ಜನಿಸುತ್ತದೆಯೋ ಅಷ್ಟು ಅದರ ಆರೈಕೆ, ಚಿಕಿತ್ಸೆ, ಎನ್‌ಐಸಿಯು ವಾಸಗಳ ವೆಚ್ಚಗಳು ಕೂಡ ಹೆಚ್ಚುತ್ತವೆ. ಉದಾಹರಣೆಗೆ, 32 ವಾರಗಳಲ್ಲಿ 1.5 ಕಿಲೊಗ್ರಾಂ ದೇಹತೂಕದೊಂದಿಗೆ ಜನಿಸುವ ಶಿಶುವಿಗೆ 3-4 ವಾರಗಳ ಆಸ್ಪತ್ರೆ ವಾಸ ಮತ್ತು ಸುಮಾರು 1 ವಾರದ ಶ್ವಾಸಾಂಗ ನೆರವು ಸಾಕಾಗುತ್ತದೆ. ಎನ್‌ಐಸಿಯು ಶುಲ್ಕವನ್ನು ಕನಿಷ್ಠ ದಿನಕ್ಕೆ 10 ಸಾವಿರ ರೂ.ಗಳು ಮತ್ತು ಇತರ ವೆಚ್ಚಗಳು ದಿನಕ್ಕೆ 5 ಸಾವಿರ ರೂ. ಎಂದಿಟ್ಟುಕೊಂಡರೆ ಒಟ್ಟು ವೆಚ್ಚ ಸುಮಾರು 3ರಿಂದ 5 ಲಕ್ಷ ರೂ.ಗಳಾಗುತ್ತವೆ. ಇದೇವೇಳೆ, 28 ವಾರಗಳಗಳಲ್ಲಿ 900 ಗ್ರಾಂ ದೇಹತೂಕ ಹೊಂದಿ ಜನಿಸಿದ ಶಿಶು ಆಸ್ಪತ್ರೆಯಿಂದ ಬಿಡುಗಡೆ ಹೊಂದಲು 8-12 ವಾರಗಳು ಹಾಗೂ 3-4 ವಾರಗಳ ಶ್ವಾಸಾಂಗ ನೆರವು ಬೇಕಾಗಬಹುದಾಗಿದ್ದು, ಒಟ್ಟು ವೆಚ್ಚ 4ರಿಂದ 6 ಲಕ್ಷ ರೂ.ಗಳಾಗಬಹುದಾಗಿದೆ.

ಗಮನಿಸಿ: ಮಣಿಪಾಲದ ಕೆಎಂಸಿ ಆಸ್ಪತ್ರೆಯಲ್ಲಿ 24 ಹಾಸಿಗೆಗಳುಳ್ಳ ಲೆವೆಲ್‌ 3 ಬಿ ಎನ್‌ಐಸಿಯು ಇದ್ದು, ನುರಿತ ವೈದ್ಯರು, ಸಿಬಂದಿ, ನರ್ಸ್‌ಗಳು ಮತ್ತು ಅತೀವ ಕಡಿಮೆ ದೇಹತೂಕ ಹೊಂದಿ ಜನಿಸುವ ಶಿಶುಗಳನ್ನೂ ನಿಭಾಯಿಸುವುದಕ್ಕೆ ಶಕ್ತವಾದ ಅತ್ಯಾಧುನಿಕ ಸೌಲಭ್ಯಗಳನ್ನು ಹೊಂದಿದೆ. ರಾಷ್ಟ್ರೀಯ ವೈದ್ಯಕೀಯ ಪರಿಷತ್ತು (ಎನ್‌ ಎಂಸಿ) ಇಲ್ಲಿ ನಿಯೋನೇಟಾಲಜಿಯಲ್ಲಿ ಡಿಎಂ ಪ್ರೋಗ್ರಾಮ್‌ ಆರಂಭಿಸಲು ಅಂಗೀಕಾರ ನೀಡಿದೆ.

-ಡಾ| ರಾಜೇಂದ್ರ ಪ್ರಸಾದ್‌-ಡಾ| ಜಯಶ್ರೀ ಪಿ.
-ಡಾ| ಶೀಲಾ ಮಥಾಯ್‌
ನಿಯೋನೇಟಾಲಜಿ ವಿಭಾಗ, ಕೆಎಂಸಿ, ಮಾಹೆ, ಮಣಿಪಾಲ