ಮೆಸ್‌ ವರ್ಲ್ಡ್!

Team Udayavani, Dec 16, 2017, 12:40 PM IST

ಮೆಸ್‌ ಎಂದರೆ ಮನೆಯೂಟದ ಕೈತುತ್ತು. ಅಲ್ಲೊಂದು ಶಿಸ್ತು, ಮನೆಯ ಅಮ್ಮನೋ, ಅಕ್ಕನೋ ಮಾಡಿದ ಅಡುಗೆಯನ್ನು ನೆನಪಿಸುವಂಥ ಸ್ವಾದ ಆ ಊಟದ ವಿಶೇಷ ಗತ್ತು. ಹುಟ್ಟಿ ಬೆಳೆದ ಮನೆಯ ವಾತಾವರಣವನ್ನು ಹೃದಯದಲ್ಲಿ ಕೂರಿಸುತ್ತಾ, ಸಾಂಪ್ರದಾಯಿಕ ಊಟದಿಂದ ಹೊಟ್ಟೆ ತುಂಬಿಸುವ ವಿಶೇಷ ಗುಣ ಈ ಮೆಸ್‌ಗಳಿಗಿರುತ್ತವೆ. ಬೆಂಗಳೂರಿನಲ್ಲೂ ಹುಡುಕಿಕೊಂಡು ಹೋಗಿ ತಿನ್ನಲೇಬೇಕಾದ ಮೆಸ್‌ಗಳು, ಕಾಡುವ ರುಚಿಯನ್ನು ದಯಪಾಲಿಸುವಂಥ ಮೆಸ್‌ಗಳು ಹತ್ತಾರು ಕಾಣಿಸುತ್ತವೆ. ಆ ಕುರಿತ ಪುಟ್ಟ ಟಿಪ್ಪಣಿ ಇಲ್ಲಿದೆ…

1. ಅಯ್ಯರ್‌ ಮೆಸ್‌: ಕಳೆದ 40 ವರ್ಷಗಳಿಂದ ತಮಿಳು ಬ್ರಾಹ್ಮಣ ಶೈಲಿಯ ಬಾಳೆ ಎಲೆ ಊಟವನ್ನು ಬಡಿಸುವಲ್ಲಿ ನಿರತವಾಗಿರುವ ಮೆಸ್‌ಗೆ ಇದು. ಮನೆಯಲ್ಲಿ ಕುಳಿತು ಊಟ ಮಾಡಿದಂತೆಯೇ ಇರುತ್ತೆ ಇಲ್ಲಿನ ವಾತಾವರಣ.
 
ಎಲ್ಲಿದೆ?: ದೇವಿ ಪ್ರಸಾದ್‌ ಹೋಂ ಅಪ್ಲಯನ್ಸ್‌, 7ನೇ ಕ್ರಾಸ್‌, ವೆಸ್ಟ್‌ ಪಾರ್ಕ್‌, ಮಲ್ಲೇಶ್ವರಂ
ಸಮಯ: ಬೆಳಗ್ಗೆ 11.30- ಮಧ್ಯಾಹ್ನ 3, ಸಂಜೆ 7- ರಾತ್ರಿ 9
ಸಂಪರ್ಕ: ಮೊ. 9886078290

2. ಮುದ್ದೆ ಮಾದಪ್ಪ ಮೆಸ್‌: ಈ ಮೆಸ್‌ “ಮುದ್ದೆ ಮೆಸ್‌’ ಎಂದೇ ಪ್ರಖ್ಯಾತಿ ಪಡೆದಿದೆ. ಗಾಂಧಿನಗರದಲ್ಲೇ ಇರುವುದರಿಂದ ಸಿನಿಮಾ ಮಂದಿಯ ಅಚ್ಚುಮೆಚ್ಚಿನ ಮೆಸ್‌ ಕೂಡಾ ಹೌದು. ಮುದ್ದೆ, ಸಾರು, ಮಜ್ಜಿಗೆ ಇಲ್ಲಿನ ವೈಶಿಷ್ಟತೆ.

ಎಲ್ಲಿ?: ಸಾಗರ್‌ ಕಾಂಪ್ಲೆಕ್ಸ್‌, ಟಾಟಾ ಕನ್ಸಲ್ಟೆನ್ಸಿ ಬಳಿ, 5ನೇ ಮುಖ್ಯರಸ್ತೆ, ಗಾಂಧಿನಗರ
ಸಮಯ: ಬೆಳಗ್ಗೆ 8- 10, ಮಧ್ಯಾಹ್ನ 12.30- 3.30, ಸಂಜೆ 7.30- ರಾತ್ರಿ 9.30
ಸಂಪರ್ಕ: ಮೊ. 9845252113

3. ಮಂಗಳೂರು ಲಂಚ್‌ ಹೋಂ: ಮೀನೂಟವನ್ನು ಇಷ್ಟಪಡುವವರಿಗೆ ಈ ಮೆಸ್‌ ಇಷ್ಟವಾಗುತ್ತೆ. ಕರಾವಳಿ ಶೈಲಿಯ ಅಡುಗೆ ಅಲ್ಲಿನ ವಿಶೇಷ. ಬಂಗುಡೆ, ಪಾಂಫ್ರೆಟ್‌, ಅಂಜಲ್‌ ಮೀನುಗಳ ಬಗೆ ಬಗೆಯ ಖಾದ್ಯಗಳನ್ನು ನೀವೊಮ್ಮೆ ಇಲ್ಲಿ ಸವಿಯಬೇಕು.

ಎಲ್ಲಿ?: ಮರಿಯಪ್ಪ ಬಿಲ್ಡಿಂಗ್‌, ಐಇಟಿಇ ಎದುರು, ಬಳ್ಳಾರಿ ಮುಖ್ಯರಸ್ತೆ, ಆರ್‌.ಟಿ. ನಗರ
ಸಮಯ: ಮ. 12- ರಾ. 11
ಫೋ: 080- 23633436

4. ನೆಲ್ಲೂರ್‌ ಮೆಸ್‌: ಆಂಧ್ರ ಶೈಲಿಯ ವೆಜ್‌ ಮತ್ತು ನಾನ್‌ವೆಜ್‌ ಆಹಾರ ಇಲ್ಲಿ ಸಿಗುತ್ತೆ. ಚಿಕನ್‌ ಬಿರಿಯಾನಿ ಮತ್ತು ಎಗ್‌ ಬುರ್ಜಿ ಈ ಮೆಸ್‌ನ ವಿಶೇಷತೆ. ತುಸು ಸ್ಪೈಸಿಯೇ ಆದರೂ ಚಪ್ಪರಿಸುವಂಥ ಖಾದ್ಯಕ್ಕೆ ಈ ಮೆಸ್‌ ಹೆಸರುವಾಸಿ.

ಎಲ್ಲಿ?: ಹೊಂಡಾ ಶೋರೂಂ ಪಕ್ಕ, ಹೊರಮಾವು ಸಿಗ್ನಲ್‌, ಬಾಣಸವಾಡಿ
ಸಮಯ: ಮಧ್ಯಾಹ್ನ 1- ಸಂಜೆ 4. ಸಂಜೆ 7- ರಾತ್ರಿ 10
ಫೋ: 9243119927

5. ಸಂಗಂ ಮೆಸ್‌: ಕೇರಳ ಶೈಲಿಯ ಆಹಾರಕ್ಕಾಗಿ ಈ ಮೆಸ್‌ಗೆ ಭೇಟಿ ನೀಡಬಹುದು. ಅಪ್ಪಂ, ಕಲ್ಲುಮಕ್ಕ, ಕಪ್ಪ ಬಿರಿಯಾನಿ ಈ ಮೆಸ್‌ನ ಸ್ಪೆಷಾಲಿಟಿ. ತೆಂಗಿನಕಾಯಿಯಿಂದಲೇ ಮಾಡಿದಂಥ ಖಾದ್ಯಗಳನ್ನು ಇಲ್ಲಿ ಸವಿಯಬಹುದು.

ಎಲ್ಲಿದೆ?: 3ನೇ ಕ್ರಾಸ್‌, ಚಿನ್ನಪ್ಪ ಲೇಔಟ್‌, ಕಮ್ಮನಹಳ್ಳಿ ಮುಖ್ಯರಸ್ತೆ
ಸಮಯ: ಬೆಳಗ್ಗೆ 8- ರಾತ್ರಿ 10.30
ಫೋ: 080- 65651651

6. ಅನ್ನಪೂರ್ಣ ಮೆಸ್‌: ಉತ್ತರ ಭಾರತೀಯರು ಹೆಚ್ಚು ಇಷ್ಟಪಡುವ ಜಾಗವಿದು. ಪುಲಾವ್‌, ಪಾವ್‌ ಭಾಜಿ, ಪರಾಠಾ ಎಲ್ಲದರಲ್ಲೂ ಉತ್ತರ ಭಾರತೀಯ ಅಡುಗೆ ಮನೆಯ ರುಚಿಯಿದೆ. ಜೊತೆಗೆ ಚೈನೀಸ್‌ ಖಾದ್ಯಗಳೂ ಇಲ್ಲಿ ಸಿಗುತ್ತವೆ.

ಎಲ್ಲಿದೆ?: 1ನೇ ಕ್ರಾಸ್‌, 5ನೇ ಬ್ಲಾಕ್‌, ಕೆ.ಎಚ್‌.ಬಿ. ಕಾಲೊನಿ, ಕೋರಮಂಗಲ
ಸಮಯ: ಬೆಳಗ್ಗೆ 10.30- ಸಂ. 4, ರಾ. 7- ರಾತ್ರಿ 11

7. ಬೆಂಗಾಲಿ ಮೆಸ್‌: ಹೆಸರೇ ಹೇಳುವಂತೆ ಈ ಮೆಸ್‌ ಬಂಗಾಳಿ ಸ್ವಾದದ ಖಾದ್ಯಗಳಿಗೆ ಹೆಸರುವಾಸಿ. ಗ್ರಾಹಕರ ಜೇಬಿಗೂ ಹೊರೆಯಾಗದಂತೆ ಬೆಲೆ ನಿಗದಿ ಪಡಿಸಲಾಗಿದೆ. ರಸಮುಲಾಯಿಯಂಥ ಬಂಗಾಳಿ ಸಿಹಿಯನ್ನೂ ಇಲ್ಲಿ ಸವಿಯಬಹುದು.

ಎಲ್ಲಿ?: 5ನೇ ಕ್ರಾಸ್‌, 5ನೇ ಬ್ಲಾಕ್‌, ಕೆ.ಎಚ್‌.ಬಿ ಕಾಲನಿ, ಕೋರಮಂಗಲ
ಸಮಯ: ಬೆಳಿಗ್ಗೆ 11.30- ಮಧ್ಯಾಹ್ನ 3.30, ಸಂಜೆ 6.30- ರಾತ್ರಿ 10.30
ಮೊ.: 8971812966

8. ಶ್ರೀವೆಂಕಟೇಶ್ವರ ಮೆಸ್‌: ಉಡುಪಿ ಮೆಸ್‌ ಎಂದೂ ಕರೆಯಲ್ಪಡುವ ಶ್ರೀ ವೆಂಕಟೇಶ್ವರ ಮೆಸ್‌ ಶ್ರೀನಗರದ ಸುತ್ತಮುತ್ತಲೆಲ್ಲಾ ಹೆಸರುವಾಸಿ. ಚಪಾತಿ ಊಟಕ್ಕೆ 50 ರೂ. ಅನ್ನ ಸಾಂಬಾರ್‌ಗೆ 25ರೂ. ಇಲ್ಲಿನ ಮೆನು ತುಂಬಾ ಸಿಂಪಲ್‌, ಆದರೆ ಸ್ವಾದಿಷ್ಟಕರ ಮತ್ತು ಆರೋಗ್ಯಕರ. ಆ ದಾರಿಯಲ್ಲಿ ಕಾರ್ಯಾಚರಿಸುವ ಬಿ.ಎಂ.ಟಿ.ಸಿ ಬಸ್‌ ಸಿಬ್ಬಂದಿಗಳು ಬಸ್‌ ನಿಲ್ಲಿಸಿಕೊಂಡು ಇಲ್ಲಿಂದ ಊಟವನ್ನು ಪಾರ್ಸೆಲ್‌ ಮಾಡಿಸಿ ಕೊಂಡೊಯ್ಯುತ್ತಾರೆ ಎನ್ನುವುದು ಈ ಮೆಸ್‌ನ ಹೆಗ್ಗಳಿಕೆ.

ಎಲ್ಲಿ?: ಪಿ..ಇ.ಎಸ್‌ ಕಾಲೇಜು ಬಳಿ, ಆವಲಹಳ್ಳಿ 50 ಅಡಿ ರಸ್ತೆ, ಶ್ರೀನಗರ
ಸಮಯ: ಸಂಜೆ 7- ರಾತ್ರಿ 11.30