ಹೋಗೋಣ ಟ್ರಾಕ್ಟರ್‌ ಸವಾರಿ!

Team Udayavani, Feb 2, 2019, 2:48 AM IST

ನಗರದ ದೈನಂದಿನ ಜಂಜಾಟದಿಂದ ಹೊರಬಂದು ಪುಟ್ಟ ವಿರಾಮ ತೆಗೆದುಕೊಳ್ಳಲು ಬಯಸುವಿರಾದರೆ ಇಲ್ಲಿದೆ ಅದಕ್ಕೊಂದು ಅವಕಾಶ. ಕೋಲಾರದಿಂದ ಒಂದು ಗಂಟೆ ಪ್ರಯಾಣಿಸಿದರೆ ಸಿಗುವ ‘ಸವಿ ಗರುಡ ಫಾಮ್ಸ್‌ರ್’, ಫಾರ್ಮ್ ಟೂರ್‌ಅನ್ನು ಆಯೋಜಿಸಿದೆ. ಇಲ್ಲಿನ ಪ್ರಶಾಂತ ತೋಟದಲ್ಲಿ ಕುಟುಂಬದೊಂದಿಗೆ ಸಮಯ ಕಳೆಯ ಬಹುದು. ಇಲ್ಲಿ ತರಹೇವಾರಿ ಹಣ್ಣು ಹಂಪಲು ಮತ್ತು ತರಕಾರಿಗಳಿವೆ, ನಡೆದಷ್ಟೂ ಸಾಗುವ ದಾರಿಯಿದೆ. ಟ್ರಾಕ್ಟರ್‌ನಲ್ಲಿ ಮೊದಲಿಗೆ ತೋಟಕ್ಕೆ ಕರೆದೊಯ್ಯುತ್ತಾರೆ. ಅಲ್ಲಿ ಹಣ್ಣು ತರಕಾರಿಗಳ ತೋಪಿನ ನಡುವೆ ಕಾಲ ಕಳೆಯಬಹುದು. ಅಲ್ಲದೆ ತೋಟದ ಹಣ್ಣುಗಳನ್ನು ಆರಿಸಬಹುದು. ಅದೃಷ್ಟವಿದ್ದರೆ ತೋಟದ ಬಳಿಯೇ ಚಿಂಕೆ, ನವಿಲು ಮೊದಲಾದ ಕಾಡು ಪ್ರಾಣಿಗಳ ದರ್ಶನವೂ ಆಗುವುದುಂಟು.

ಮನೆಯೂಟ

ತೋಟದಲ್ಲಿ ಹಣ್ಣು ತರಕಾರಿ ಆರಿಸಿ, ನಡೆದು ವಾಪಸ್‌ ಹಿಂದಿರುಗುವಷ್ಟರಲ್ಲಿ ದಣಿವಾಗಿರುತ್ತದೆ. ಇದೇ ಸಮಯಕ್ಕೆ ಮನೆಯಲ್ಲೇ ತಯಾರಿಸಲಾದ ಹಳ್ಳಿ ಸೊಗಡಿನ ಭೋಜನ ಸಿದ್ಧವಾಗಿರುತ್ತದೆ. ಬಾಳೆ ಎಲೆ ಊಟ, ಮುದ್ದೆ, ನ್ಪೊಪಿನ ಸಾರು, ಕಾಯಿ ಪಲ್ಯ, ಹಪ್ಪಳ, ಕಾಯಿ ಹೋಳಿಗೆ, ಚಿತ್ರಾನ್ನ, ಕೋಸಂಬರಿ, ಮೊಸರನ್ನ, ಅವರೆಕಾಳು ಸಾರು, ವಡೆ ಇವಿಷ್ಟನ್ನೂ ಒಳಗೊಂಡಿರುತ್ತದೆ.