ರೋಲ್ಸ್‌ರಾಯ್ಸ್ ನಾಯಕ ಮತ್ತು ವಾಕಿಂಗ್‌ ಕ್ವೀನ್‌

Team Udayavani, Apr 13, 2019, 3:00 AM IST

ಅದೊಂದು ಸುಂದರ ಕಲಾಕ್ಷೇತ್ರ, ಅದರ ಒಡತಿ ನಾಟ್ಯವಿಶಾರದೆ ಮೀನಾಕ್ಷಿ, ಅವರಿಗೆ ಮೂವರು ಹೆಣ್ಣುಮಕ್ಕಳು. ಮೊದಲನೇ ಮಗಳು ಕಾವ್ಯ, ತನ್ನ ಸಮಾಜ ಮತ್ತು ಕುಟುಂಬದ ನ್ಯಾಯಕ್ಕಾಗಿ ಹೋರಾಡುವ ವಕೀಲೆ. ಜೀವ, ಕನ್ನಡ ಚಲನಚಿತ್ರಗಳ ಯಶಸ್ವಿ ನಿರ್ಮಾಪಕ.

ಇವರಿಬ್ಬರೂ ಸಂದರ್ಭಗಳ ಕೈಸೆರೆಯಾಗಿ ಬಯಸದೆ ಬಳಿ ಬಂದಾಗ, ಜೀವನದಲ್ಲಿ ಉಂಟಾಗುವ ತಿರುವುಗಳೇ ಹೊಚ್ಚ ಹೊಸ ಧಾರಾವಾಹಿ “ಬಯಸದೆ ಬಳಿ ಬಂದೆ’ ಕತೆ. ಇನ್ನೂ ಸರಳವಾಗಿ, ಸ್ವಾರಸ್ಯಕರವಾಗಿ ಹೇಳಬೇಕೆಂದರೆ ರೋಲ್ಸ್‌ ರಾಯ್ಸ್ ಕಾರಿನಲ್ಲಿ ಓಡಾಡುವ ನಾಯಕನಿಗೆ ಕಾಲ್ನಡಿಗೆಯಲ್ಲೇ ಓಡಾಡುವ ನಾಯಕಿ ಜೊತೆಯಾದರೆ ಹೇಗಿರುತ್ತದೆಯೋ ಅದೇ ಧಾರಾವಾಹಿಯ ಕಥಾಹೂರಣ.

ಶ್ರೀಮಹತಿ ಕಂಬೈನ್ಸ್‌ ನಿರ್ಮಿಸುತ್ತಿರುವ ಧಾರಾವಾಹಿಯ ನಿರ್ದೇಶಕರು ದೇವಾನಂದ್‌. ಶೀರ್ಷಿಕೆ ಗೀತೆಗೆ “ರಾಮಾ ರಾಮಾ ರೇ’ ಖ್ಯಾತಿಯ ವಾಸುಕಿ ವೈಭವ್‌ ಸಂಗೀತ ನೀಡಿದ್ದಾರೆ. ಹರಹರ ಮಹಾದೇವ ಧಾರಾವಾಹಿ ಖ್ಯಾತಿಯ ವಿನಯ್‌ ಗೌಡ, ಮುಖ್ಯ ಪಾತ್ರದಲ್ಲಿ ನಟಿಸುತ್ತಿದ್ದಾರೆ.

ವಿನಯ್‌ಗೆ ಜೊತೆಯಾಗಿ ನಟಿ ರಕ್ಷಾ ಹೊಳ್ಳ ನಟಿಸುತ್ತಿದ್ದಾರೆ. ಶ್ವೇತಾ ರಾವ್‌, ಮೈಸೂರು ಮಾಲತಿ, ಭಾಗ್ಯ, ಅನಿರುದ್ಧ್, ಸುನೀಲ್‌ ಸಾಗರ್‌, ವಿಕಾಸ್‌ ಮತ್ತು ಶೋಭಿತಾ ಪ್ರಮುಖ ಪಾತ್ರಗಳಲ್ಲಿ ನಟಿಸುತ್ತಿದ್ದಾರೆ.

ಚಾನೆಲ್‌: ಸ್ಟಾರ್‌ ಸುವರ್ಣ
ಯಾವಾಗ?: ಏಪ್ರಿಲ್‌ 15ರಿಂದ, ಸೋಮ - ಶನಿ, ರಾತ್ರಿ 9.30