ಸಂಕಷ್ಟದ ಟಾಪ್‌ ಗೇರು ; ಗೇರು ಕಾಪಾಡೋರು ಯಾರು?

Team Udayavani, Apr 22, 2019, 6:00 AM IST

ಗೋಡಂಬಿಯನ್ನು ನೋಡುತ್ತಲೇ, ತಿನ್ನಬೇಕು ಅನಿಸುತ್ತದೆ. ಗೋಡಂಬಿ ರುಚಿ ಯಾವತ್ತೂ ಹೆಚ್ಚು. ಆದರೆ, ಅದನ್ನು ನಂಬಿರುವವರಿಗೆ ಏಕೋ ಅದು ವಾಕರಿಕೆ ತರಿಸುತ್ತಿದೆ. ಹೌದು, ಗೋಡಂಬಿ ಬೆಲೆಯಲ್ಲಿ ಆಗುತ್ತಿರುವ ಏರುಪೇರು ಇವತ್ತು ಗೇರು ಉದ್ಯಮವನ್ನೇ ಅಲ್ಲಾಡಿಸುತ್ತಿದೆ. ಇತ್ತ ಬೆಳೆಗಾರರಿಗೂ ಅತ್ತ ಉದ್ಯಮದವರಿಗೂ ಗೋಡಂಬಿ ನಂಬಿಕೆಯ ಪ್ರಾಡಕ್ಟ್ ಆಗಿಲ್ಲ.

ಪಾಯಸದಲ್ಲಿ ಅಲ್ಲಲ್ಲಿ ಗೋಡಂಬಿ ತುಂಡು, ಕೇಸರಿಬಾತ್‌ನ ಮೇಲೆ ಒಂದಷ್ಟು ಗೋಡಂಬಿ ಚೂರುಗಳು, ಲಡ್ಡುವಿನ ಹೊರಮೈಯಲ್ಲಿ ಅಂಟಿದ ಗೋಡಂಬಿ. ಹೀಗೆ, ಕಾಣುವಾಗಲೇ ತಿನ್ನಬೇಕೆಂಬ ಆಕರ್ಷಣೆ ಹೊಂದಿರುವ ಗೋಡಂಬಿ ಬಾಯಲ್ಲಿ ನೀರು ತರಿಸುವ ಬದಲು, ಈಗ ಕಣ್ಣಲ್ಲಿ ನೀರು ತರಿಸುತ್ತಿದೆ. ಬೆಳೆದವನಿಗೂ, ಅದರ ಉತ್ಪನ್ನ ತಯಾರಿಸುತ್ತಿರುವವರಿಗೂ ಗೋಡಂಬಿ ನಂಬಿದರೆ ಕಷ್ಟ ಎಂಬ ಸ್ಥಿತಿ ಇದೆ. ಗೋಡಂಬಿ ಕಾರ್ಖಾನೆಗಳು ಒಂದೊಂದೇ ಬಾಗಿಲು ಹಾಕುತ್ತಾ ಕರಾವಳಿಯ ಉದ್ಯಮದಲ್ಲಿ ಕರಾಳ ಅಕ್ಷರದ ಇತಿಹಾಸ ಬರೆಯಲು ಹೊರಟಿವೆ.

ಕೆಲವು ಕಾರ್ಖಾನೆ ಮಾಲೀಕರು ಗೇರನ್ನು ನಂಬಿ ಮಾಡಿದ ಸಾಲವನ್ನು ಕಟ್ಟಲಾಗದೆ, ಅಸಹಾಯಕ ಪರಿಸ್ಥಿತಿಯಲ್ಲಿದ್ದಾರೆ. ಕರಾವಳಿಯ ಪ್ರಮುಖ ಬೆಳೆ ಗೇರು ಈ ಬಾರಿ ಬೆಳೆಗಾರನ ಮೊಗದಲ್ಲೂ ಮಂದಹಾಸ ಮೂಡಿಸಿಲ್ಲ. ಆಮದು ಆಗುತ್ತಿಲ್ಲ, ತಯಾರಿಸಿಟ್ಟ ಉತ್ಪನ್ನವೂ ಮಾರಾಟವಾಗುತ್ತಿಲ್ಲ ಎನ್ನುವ ಬೇಸರ ಉದ್ಯಮಿಗಳದ್ದಾದರೆ, ಬೆಳೆಗೆ ಸರಿಯಾದ ಬೆಲೆ ದೊರೆಯುತ್ತಿಲ್ಲ ಎಂಬ ಅಳಲು ಬೆಳೆಗಾರರದ್ದು.

ಇಷ್ಟಕ್ಕೂ ಕಳೆದ ಕೆಲವು ವರ್ಷಗಳಿಂದ ಗೇರುಬೆಲೆ ಇಳಿಮುಖದಲ್ಲಿದೆ. 2017ರಲ್ಲಿ 170ರೂ.ರವರೆಗೆ ಧಾರಣೆ ಇದ್ದರೆ ಕಳೆದ ವರ್ಷ 150ರೂ, ಈ ವರ್ಷ ಬೆಳೆ ಇದ್ದರೂ ಬೆಲೆ 120 ರೂ. ದಾಟಲಿಲ್ಲ. ಹಾಗಂತ, ಬೆಳೆಗಾರರ ಸಂಖ್ಯೆ ಇಳಿಮುಖವಾಗಿಲ್ಲ.

ಏನಿದು ಸಂಕಷ್ಟ ?
ಪ್ರಸ್ತುತ ನಮಗೆ ಅಗತ್ಯವಿರುವ ಪೈಕಿ ಶೇ.40ರಷ್ಟು ಗೇರು ಮಾತ್ರ ಇಲ್ಲಿ ಬೆಳೆಯುತ್ತಿದ್ದೇವೆ. ಉಳಿಕೆ 60 ಶೇ. ರಷ್ಟನ್ನು ವಿದೇಶದಿಂದಲೇ ತರಿಸಿಕೊಳ್ಳುತ್ತಿದ್ದೇವೆ. ದೀಪಾವಳಿ ಬಳಿಕ ಗೇರು ಮಾರುಕಟ್ಟೆ ಚೇತರಿಸಿಕೊಂಡೇ ಇಲ್ಲ.

ಸಾಮಾನ್ಯವಾಗಿ ರಫ್ತಾಗುವ 1 ಟಿನ್‌ (10ಕೆಜಿ) ಉತ್ಕೃಷ್ಟ ಗುಣಮಟ್ಟದ ಗೋಡಂಬಿಗೆ 10 ಸಾವಿರ ರೂ.ಇದ್ದದ್ದು ಈಗ 8 ಸಾವಿರ ರೂ.ಗೆ ಇಳಿದಿದೆ. ಸಂಸ್ಕರಿತ ಉತ್ಪನ್ನವನ್ನು 8ಕ್ಕಿಂತ ಹೆಚ್ಚು ವಿಧದಲ್ಲಿ ವಿಂಗಡಿಸಲಾಗುತ್ತದೆ. ರಫ್ತಾಗದ ಕಾರಣ ಬಹುತೇಕ ಕಾರ್ಖಾನೆಗಳಲ್ಲಿ ಈಗಾಗಲೇ ಹೆಚ್ಚಿನ ಸಂಗ್ರಹವಿದೆ. ಕೆ.ಜಿಗೆ 100 ರೂ.ನಂತೆ ಗೇರುಬೀಜ ಖರೀದಿಸಿ, 40 ರೂ. ಕಾರ್ಮಿಕರಿಗೆ ಹಂಚಿದ ಮೇಲೆ, ಶೇ.24ರಷ್ಟು ಲಾಭ ಕಾರ್ಖಾನೆಯವರಿಗೆ ಬರಬೇಕೆನ್ನುವ ಲೆಕ್ಕಾಚಾರವಿದೆ. ಆದರೆ ಆರೀತಿ ನಡೆಯುತ್ತಿಲ್ಲ. ಪ್ರಸ್ತುತ ಮಾರಾಟ ಮಾಡಿದರೆ 1 ಲೋಡಿಗೆ 7 ಲಕ್ಷ ರೂ.ಗಳಂತೆ ನಷ್ಟ ಅನುಭವಿಸಬೇಕಾದ ಪರಿಸ್ಥಿತಿ ಇದೆ. ಕೆಲವು ಕಾರ್ಖಾನೆಯವರು ಹೆಚ್ಚಿನ ದರ ನೀಡಿ ಈಗಾಗಲೇ ಗೇರುಬೀಜ ಖರೀದಿಸಿರುವುದು ಸಾಧಾರಣ ಕಾರ್ಖಾನೆಯವರನ್ನು ಸಂಕಷ್ಟಕ್ಕೆ ದೂಡಿದೆ.

“ಗೇರುಬೀಜದ ಆಮದು, ರಫ್ತಿಗೆ ತೊಂದರೆಯಾಗಿಲ್ಲ. ಆದರೆ, ಫ‌ಸಲಿನ ಪ್ರಮಾಣ ಕಡಿಮೆಯಾಗಿದೆ. ಹೀಗಾಗಿ ದರದಲ್ಲಿ ವ್ಯತ್ಯಾಸವಾಗಿದೆ. ಗೇರು ಷೇರು ಮಾರುಕಟ್ಟೆಯಂತಾದರೆ ಲಾಭದಾಯಕವಾಗದು. ವಿದೇಶಿ ಮಾರುಕಟ್ಟೆಯ ಪ್ರಭಾವವೂ ನಮ್ಮ ಮೇಲಾಗಿದೆ’ ಎನ್ನುತ್ತಾರೆ ಉಡುಪಿಯ ಕೈಗಾರಿಕಾ ಮತ್ತು ವಾಣಿಜ್ಯ ಇಲಾಖೆಯ ಜಂಟಿ ನಿರ್ದೇಶಕ ರಮಾನಂದ ನಾಯಕ್‌.

ಆದರೆ, ರೈತರು ಹೇಳುವುದೇ ಬೇರೆ. “ಗೇರು ಉದ್ಯಮವೇ ಸಂಕಷ್ಟದಲ್ಲಿದೆ. ಮಾರುಕಟ್ಟೆ ಚೇತರಿಕೆಗೆ ಸರಕಾರ, ಬ್ಯಾಂಕ್‌ಗಳ ಸ್ಪಂದನೆ ಕಡಿಮೆಯಿದೆ. ಇನ್ನಷ್ಟು ಮಂದಿ ಗೇರು ಬೆಳೆಯಲು ಪ್ರೋತ್ಸಾಹ ನೀಡಿದರೆ ಪರಿಸ್ಥಿತಿ ಸ್ವಲ್ಪಮಟ್ಟಿಗೆ ಸುಧಾರಿಸೀತು ಎನ್ನುತ್ತಾರೆ ಸಿದ್ಧಾಪುರದ ಗೇರುಬೀಜ ಕಾರ್ಖಾನೆ ಮಾಲೀಕ ಬಿ. ರಾಘವೇಂದ್ರ ಹೆಮ್ಮಣ್ಣ.

ಎಲ್ಲೆಲ್ಲಿ ಹೇಗೇಗೆ?
ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ 33 ಸಾವಿರ ಹೆಕ್ಟೇರ್‌ ಹಾಗೂ ಉಡುಪಿ ಜಿಲ್ಲೆಯಲ್ಲಿ 19,541 ಹೆಕ್ಟೇರ್‌, ಕರಾವಳಿ ಭಾಗದಲ್ಲಿ ಒಟ್ಟು 50 ಸಾವಿರಕ್ಕೂ ಹೆಚ್ಚು ಹೆಕ್ಟೇರ್‌ ಪ್ರದೇಶದಲ್ಲಿ ಗೇರು ಕೃಷಿಯಿದೆ. ಉಡುಪಿ, ದ.ಕ, ಉ.ಕ.ಗಳಲ್ಲಿ 280 ಗೇರು ಸಂಸ್ಕರಣ ಘಟಕಗಳಿವೆ.

ಮಲೇಶಿಯಾ ಹಾಗೂ ಆಫ್ರಿಕಾದ ತಾಂಜಾನಿಯಾದಿಂದ ಭಾರತಕ್ಕೆ ಪ್ರಮುಖವಾಗಿ ಗೇರು ಆಮದಾಗುತ್ತದೆ. ನಂತರ ಅದನ್ನು ಸಂಸ್ಕರಿಸಿ ಅರಬ್‌ ರಾಷ್ಟ್ರಗಳು ಹಾಗೂ ಅಮೇರಿಕಾಕ್ಕೆ ರಫ್ತು ಮಾಡಲಾಗುತ್ತದೆ. ಸಂಸ್ಕರಿಸಿದ ಗೇರುಬೀಜವನ್ನು 6 ತಿಂಗಳು ಕೆಡದಂತೆ ಇಡಬಹುದು. ಕಚ್ಛಾಗೇರುಬೀಜವನ್ನು 1 ವರ್ಷದ ತನಕ ಸಂಗ್ರಹಿಸಿ ಇಡಬಹುದು. ಇನ್ನು ಒಂದೆರಡು ತಿಂಗಳಲ್ಲಿ ಸಮಸ್ಯೆ ಪರಿಹಾರವಾದರೆ ಗೇರು ಉದ್ಯಮ ಚೇತರಿಸಿಕೊಳ್ಳಬಹುದು ಅನ್ನೋ ಆಶಯ ಕೂಡ ಇದೆ.

ಇಂದು ಸ್ಥಳೀಯ ಮಾರುಕಟ್ಟೆಗೆ ಬರುತ್ತಿರುವ ಗೇರುಬೀಜ ಬಹಳ ಕಡಿಮೆಯಾಗಿದೆ. ಜೊತೆಗೆ ಹಾಲಿ ದರವೂ ಕಡಿಮೆಯಿದೆ. ಹೈಬ್ರಿಡ್‌ ಗೇರು ವರ್ಷವಿಡೀ ಖರೀದಿಯಾಗುತ್ತದೆ. ಆದರೆ, ಸ್ಥಳೀಯ ಬೆಳೆ ಸೀಸನ್‌ನಲ್ಲಿ ಮಾತ್ರ ಖರೀದಿಯಾಗುವುದರಿಂದ ಉತ್ತಮ ದರವಿರಬೇಕಿತ್ತು ಅನ್ನೋದು ರೈತರ ಆಶಯ. ಮಾರ್ಚ್‌ ಆರ್ಥಿಕ ವರ್ಷಾಂತ್ಯವಾಗಿರುವುದರಿಂದ ಫ್ಯಾಕ್ಟರಿಗಳಿಗೆ ಆರ್ಥಿಕ ಸಮಸ್ಯೆಯಾಗಿರಬಹುದು. ಅನಂತರ ದರ ಏರಿಕೆಯಾಗುವ ನಿರೀಕ್ಷೆ ಇದೆ ಎನ್ನುವುದು ವ್ಯಾಪಾರಿಗಳು ನಿರೀಕ್ಷೆ.

ಗೇರು ಕೃಷಿ, ಚಳಿಗಾಲ-ಮಳೆಗಾಲದ ಮಧ್ಯೆ ಫಲ ನೀಡುತ್ತದೆ. ಇದರ ಲಾಭ-ನಷ್ಟ ನಿರ್ಧಾರ ಮಾಡುವುದು ಮಳೆ. ಮಾರ್ಚ್‌- ಏಪ್ರಿಲ್‌ ತಿಂಗಳಲ್ಲಿ ಮಳೆ ಬಿರುಸಾಗದಿದ್ದರೆ ಒಳ್ಳೆ ಫಸಲು ಸಿಗುವ, ಉತ್ತಮ ದರವೂ ಲಭಿಸುವ ನಿರೀಕ್ಷೆ ಇದೆ. ಸೊಳ್ಳೆ ಕಾಟವೂ ನಿಯಂತ್ರಕ್ಕೆ ಬಂದಿದೆ. ಕರಾವಳಿ ಭಾಗದಲ್ಲಿ ನಾಟಿ ತಳಿಗಳ ಜತೆಗೆ ಉಳ್ಳಾಲ -3, ಭಾಸ್ಕರ, ವಿಆರ್‌ಐ 3 ತಳಿಗಳಿವೆ. ಭಾಸ್ಕರ ತಳಿಯಲ್ಲಿ ಈ ಬಾರಿ ಫಸಲು ಹೆಚ್ಚಾಗಿದೆ. ಉಳ್ಳಾಲ-3 ತಳಿಯಲ್ಲಿ ಫಸಲು ಹಿಡಿಯುತ್ತಿದೆ. ಕೇರಳದಲ್ಲಿ ಗೇರು ಸಂಸ್ಕರಣ ಘಟಕಗಳು ಹೆಚ್ಚಿದ್ದು, ಗಡಿ ಭಾಗದ ಮಾರುಕಟ್ಟೆಗಳಲ್ಲಿ ಹೆಚ್ಚಿನ ದರ ಸಿಗಬಹುದು ಎನ್ನುವ ಆಶಾಭಾವನೆ ಇದೆ.

ಉಪ ಉತ್ಪನ್ನ ಕಡಿಮೆ
ಗೇರು ನಂಬಿರುವುದು ಬೇಕರಿ ಉತ್ಪನ್ನ­ಗಳನ್ನು. ಇದನ್ನು ಬರ್ಫಿ, ಚಾಕೊಲೇಟ್‌, ಹಲ್ವದಂಥ ಸಿಹಿ ತಿನಿಸುಗಳ ತಯಾರಿಕೆಯಲ್ಲಿ ಹೆಚ್ಚಾಗಿ ಬಳಸುತ್ತಾರೆ. ಇವೆಲ್ಲ ಐಷಾರಾಮಿ ಕ್ಯಾಟಗರಿಗೆ ಬರುವುದ­ರಿಂದ ತಿಂದೇ ಬದುಕಬೇಕು ಎನ್ನುವ ಅನಿವಾರ್ಯ ಇಲ್ಲ. ಇನ್ನು, ಗೇರು ಹಣ್ಣನ್ನು ಕೂಡ ತಿನ್ನಬಹುದಾದರೂ ಇದನ್ನು ಸೇಬಿನಂತೆ ತಿನ್ನಲು ಆಗದು. ಗೇರು ಬೀಜದ ಹೊರಮೈಯ ಹೊಟ್ಟನ್ನು ಬಳಸಿ ಎಣ್ಣೆ ತೆಗೆಯಲಾಗುತ್ತದೆ.

ಇದೇನೂ ತೀರ ಲಾಭದಾಯಕ ಅಂತ ಹೇಳಲು ಆಗದು. ಹೀಗಾಗಿ, ಗೇರುಬೀಜದ ಉಪ ಉತ್ಪನ್ನದ ಅಥವಾ ಮೌಲ್ಯವರ್ಧಿತ ಉತ್ಪನ್ನದ ಕುರಿತು ಇಲ್ಲಿನ ಕಾರ್ಖಾನೆಗಳು, ಆಹಾರ ತಯಾರಿಕಾ ಸಂಸ್ಥೆಗಳು ಹೇಳಿಕೊಳ್ಳುವಂಥ ಆಸಕ್ತಿ ತೋರಿಸಿಲ್ಲ. ಗೇರುಬೀಜ ಸಂಸ್ಕರಣೆಯ ಕಾರ್ಖಾನೆಗಳು ಇದ್ದಂತೆ ಅದರ ಉಪ ಉತ್ಪನ್ನ ತಯಾರಿಕೆಗೆ, ಮೌಲ್ಯವರ್ಧಿತ ಉತ್ಪನ್ನಗಳ ಕಾರ್ಖಾನೆಗಳು ಇದ್ದರೆ ಮಾರುಕಟ್ಟೆಗೆ ಪರದಾಡಬೇಕಾದ ಸ್ಥಿತಿ ಬರುತ್ತಿರಲಿಲ್ಲ.

ಇವಕ್ಕೆಲ್ಲಾ ಈಗ ಬಹುತೇಕ ವಿದೇಶವನ್ನೇ ಅವಲಂಬಿಸಬೇಕಿದೆ. ನಮ್ಮಲ್ಲಿ ಬೆಳೆಯೂ ಕಡಿಮೆಯಾದ ಕಾರಣ ಬೆಳೆಗಾರರಿಗೆ ಪ್ರೋತ್ಸಾಹ ನೀಡಿ ಗೇರನ್ನು ಉಪಬೆಳೆ, ಮುಖ್ಯಬೆಳೆಯಾಗಿ ಬೆಳೆಯುವಲ್ಲಿ ಇನ್ನಷ್ಟು ಪ್ರೋತ್ಸಾಹದ ಅಗತ್ಯವಿದೆ. ಸರಕಾರಿ ಜಾಗದಲ್ಲಿ ಗೇರು ಬೆಳೆಯುವುದು ಇತ್ತೀಚಿನ ದಿನಗಳಲ್ಲಿ ಕಡಿಮೆಯಾಗಿದೆ. ಈ ಮೊದಲು ಗೇರು ಸಂಶೋಧನಾ ಕೇಂದ್ರ ಸೇರಿದಂತೆ ಅರಣ್ಯ ಇಲಾಖೆ ಜಾಗದಲ್ಲೂ ಗೇರು ಬೆಳೆಯಲಾಗುತ್ತಿತ್ತು. ಈಗ ಅದರ ಕೊರತೆಯನ್ನು ನೇರವಾಗಿ ಉದ್ಯಮ ಕ್ಷೇತ್ರದಲ್ಲಿ ಅನುಭವಿಸುವಂತಾಗಿದೆ.

— ಲಕ್ಷ್ಮೀ ಮಚ್ಚಿನ