ಕಂಪ್ಯೂಟರ್‌ ಸೆಕ್ಯುರಿಟಿ ಗಾರ್ಡ್‌!

Team Udayavani, Apr 27, 2020, 12:17 PM IST

ಸಾಂದರ್ಭಿಕ ಚಿತ್ರ

ಕೋವಿಡ್‌-19ನಿಂದಾಗಿ ಎಲ್ಲರೂ ಮನೆಯಲ್ಲೇ ಉಳಿದಿರುವ ಸಂದರ್ಭವಿದು. ಮಕ್ಕಳು ಈಗ ಹೆಚ್ಚಾಗಿ ಕಂಪ್ಯೂಟರ್‌, ಲ್ಯಾಪ್‌ಟಾಪ್‌ ಬಳಸುತ್ತಿರುತ್ತಾರೆ. ಆನ್‌ಲೈನ್‌ನಲ್ಲಿ ಅವರಿಗೆ ಗೊತ್ತಿದ್ದೋ, ಗೊತ್ತಿಲ್ಲದೆಯೋ ಕೆಲವು ಅನಗತ್ಯ, ಅಸಭ್ಯ ವೆಬ್‌ಸೈಟುಗಳನ್ನು ನೋಡಬಹುದು. ಇದರ ಬಗ್ಗೆ ಪೋಷಕರಿಗೂ ಆತಂಕವಿರುತ್ತದೆ. ಎಲ್ಲ ಸಮಯದಲ್ಲೂ ಅವರ ಮೇಲೆ ನಿಗಾ ಇರಿಸಲು ಸಾಧ್ಯವಿಲ್ಲ, ಏನು ಮಾಡುವುದು? ಎಂಬ ಅಸಹಾಯಕತೆಯೂ ಇರುತ್ತದೆ. ಇದರ ಮೇಲೆ ನಿಗಾ ಇಡುವ ಸೆಕ್ಯೂರಿಟಿ ಅಪ್ಲಿಕೇಷನ್‌ಗಳನ್ನು ಇನ್‌ಸ್ಟಾಲ್‌ ಮಾಡಿಕೊಂಡರೆ, ಈ ಸಮಸ್ಯೆ
ನಿವಾರಿಸಿಕೊಳ್ಳಬಹುದು. ಆದರೆ, ಇಂಥ ಅಪ್ಲಿಕೇಷನ್‌ಗಳ ದರ ದುಬಾರಿಯಾಗಿರುತ್ತದೆ.

ಪ್ರಮುಖ ಗ್ರಾಹಕ ಸೈಬರ್‌ ಸೆಕ್ಯೂರಿಟಿ ಬ್ರ್ಯಾಡ್‌ ಆಗಿರುವ ನೊರ್ಟನ್‌ ಲೈಫ್ ಲಾಕ್‌, ಇದೀಗ ನೊರ್ಟನ್‌ ಫ್ಯಾಮಿಲಿ ಸಾಫ್ಟ್ವೇರ್‌ಗೆ ಆರು ತಿಂಗಳ ಉಚಿತ ಚಂದಾದಾರಿಕೆಯ ಕೊಡುಗೆಯನ್ನು ಪ್ರಕಟಿಸಿದೆ. ಈ ಲಾಕ್‌ಡೌನ್‌ ಸಂದರ್ಭದಲ್ಲಿ, ಮಕ್ಕಳ ಆನ್‌ಲೈನ್‌ ಚಟುವಟಿಕೆಗಳ ಮೇಲೆ ನಿಗಾ ಇಡಲು ಇದರಿಂದ ಸಹಾಯವಾಗಲಿದೆ. ಗ್ರಾಹಕರು, family.norton.com ನಲ್ಲಿ ನೋಂದಣಿ ಮಾಡಿಕೊಂಡು ನೊರ್ಟನ್‌ ಫ್ಯಾಮಿಲಿಯನ್ನು ಡೌನ್‌ಲೋಡ್‌ ಮಾಡಿಕೊಳ್ಳಬಹುದಾಗಿದೆ. ಈ ಆಫ‌ರ್‌ ಮೇ 31, 2020 ರವರೆಗೆ ದೊರಕುತ್ತದೆ. ಅಂದರೆ, ಮೇ 31ರೊಳಗೆ
ಚಂದಾದಾರರಾದರೆ, ಅಲ್ಲಿಂದ 6 ತಿಂಗಳವರೆಗೂ ನಿಮಗೆ ಉಚಿತವಾಗಿ ಬಳಕೆಗೆ ದೊರಕಲಿದೆ.

ಈ ಅಪ್ಲಿಕೇಷನ್‌ ಡೌನ್ಲೋಡ್ ಮಾಡಿಕೊಂಡಾಗ, ಇದು ನಿಮ್ಮ ಮಕ್ಕಳು ಕಂಪ್ಯೂಟರ್‌, ಲ್ಯಾಪ್‌ಟಾಪ್‌ನಲ್ಲಿ ಆನ್‌ ಲೈನ್‌ ಬಳಸಿದಾಗ ಅವರಿಗೆ ತಕ್ಕುದಲ್ಲದ ವೆಬ್‌ಸೈಟ್‌ ತೆರೆಯುವುದನ್ನು ಬ್ಲಾಕ್‌ ಮಾಡುತ್ತದೆ.

ನಿಮ್ಮ ಮಕ್ಕಳು ಎಷ್ಟು ಸಮಯ ಕಂಪ್ಯೂಟರ್‌ ಬಳಸಿದ್ದಾರೆ? ಅವರು ಯಾವ ವಿಷಯವನ್ನು ಸರ್ಚ್‌ ಮಾಡುತ್ತಿದ್ದರು ಎಂಬುದರ ಮಾಹಿತಿಗಳನ್ನು ಒದಗಿಸುತ್ತದೆ.

ಮಕ್ಕಳು ಏನೇನು ನೋಡಿದರು ಎಂಬ ಬಗ್ಗೆ ನಿಮ್ಮ ಇನ್‌ಬಾಕ್ಸ್ ಗೆ ಮಾಹಿತಿಗಳನ್ನು ರವಾನಿಸುತ್ತದೆ. ಕೊವಿಡ್‌-19 ಲಾಕ್‌ಡೌನ್‌ ಕಾರಣಕ್ಕೆ, ಮಕ್ಕಳು ಹೆಚ್ಚು ಹೆಚ್ಚು ಇಂಟರ್ನೆಟ್‌ ಆಧಾರಿತ ಸಾಧನಗಳಲ್ಲಿ ಕಾಲ ಕಳೆಯುತ್ತಿದ್ದಾರೆ. ಆಟ, ಮನರಂಜನೆ ಮತ್ತು ಅಧ್ಯಯನಕ್ಕೆ ಆನ್‌ಲೈನ್‌ ಮೊರೆ ಹೋಗಿದ್ದಾರೆ. ಅತಿಯಾಗಿ ಬಳಕೆ ಮಾಡುತ್ತಿರುವುದರಿಂದ, ಸೈಬರ್‌ ದಾಳಿಗಳು ಮತ್ತು ಇತರೆ ಆನ್‌ಲೈನ್‌ ಬೆದರಿಕೆಗಳಿಗೆ ಕಾರಣವಾಗುತ್ತದೆ. ಇತ್ತೀಚಿಗೆ ಬಿಡುಗಡೆಯಾದ NortonLifeLock Cyber Safety Insights Report ಪ್ರಕಾರ, ಭಾರತದಲ್ಲಿ ಪ್ರತಿಕ್ರಿಯೆ
ನೀಡಿರುವ ಪ್ರತಿ 10 ಜನರಲ್ಲಿ ನಾಲ್ವರು ಐಡೆಂಟಿಟಿ ಬೆದರಿಕೆಯ ಅನುಭವ ಹೊಂದಿದ್ದಾರೆ. ಸಂದರ್ಭ ಹೀಗಿರುವಾಗ, ಆನ್‌ಲೈನ್‌ ಜಗತ್ತಿನಲ್ಲಿ ಆನ್‌ ಲೈನ್‌ ಐಡೆಂಟಿಟಿಯ ರಕ್ಷಣೆ ಮಾಡುವುದು ತಕ್ಷಣದ ಅಗತ್ಯವಾಗಿದೆ. ಈ ಹಿನ್ನೆಲೆಯಲ್ಲಿ ನಾವು ಗ್ರಾಹಕರಿಗೆ ರಕ್ಷಣೆ ಒದಗಿಸಲೆಂದು ಉಚಿತ ಚಂದಾದಾರಿಕೆ ನೀಡುವ ಯೋಜನೆಯನ್ನು ಆರಂಭಿಸಿದ್ದೇವೆ ಎಂದು ನೊರ್ಟನ್‌ ಲೈಫ್ ಲಾಕ್‌,
ಇಂಡಿಯಾದ ಸ್ಥಳೀಯ ನಿರ್ದೇಶಕ ರಿತೇಶ್‌ ಚೋಪ್ರಾ ತಿಳಿಸಿದ್ದಾರೆ.
ಅಪ್ಲಿಕೇಷನ್‌ ಡೌನ್‌ಲೋಡ್‌ ಲಿಂಕ್‌: nr.tn/2VIZHMT

ಕೆ.ಎಸ್‌. ಬನಶಂಕರ ಆರಾಧ್ಯ