ತುಪ್ಪದ ಶಿರಾ ತಿನ್ಬೇಕಾ?

Team Udayavani, May 28, 2018, 6:00 AM IST

ಈ ಹೋಟೆಲ್‌ನಲ್ಲಿ ಉಪ್ಪಿಟ್ಟು, ಇಡ್ಲಿ, ವಡೆ, ಒಂದಕ್ಕಿಂತ ಮತ್ತೂಂದು ಉತ್ಕೃಷ್ಟ ಖಾದ್ಯಗಳು ದೊರೆತರೂ ತುಪ್ಪದ ಶಿರಾ (ಕೇಸರಿಬಾತ್‌) ಇಲ್ಲಿನ ಬ್ರಾಂಡೆಡ್‌ ಐಟಮ್‌.  ಶಿರಾ ಸವಿಯುವುದಕ್ಕಾಗಿಯೇ ಗ್ರಾಹಕರು ದೂರದ ಊರುಗಳಿಂದ ಈ ಹೋಟೆಲ್‌ಗೆ ಬರುತ್ತಾರೆ. ಒಮ್ಮೆ ಬಂದವರು ಮತ್ತೂಮ್ಮೆ ಬರುವುದು ಗ್ಯಾರಂಟಿ. 

ಶಿರಾ ಹೊಟೇಲ್‌ ಎಂದೇ ಹುಬ್ಬಳ್ಳಿಯಲ್ಲಿ ಖ್ಯಾತಿ ಪಡೆದಿರುವುದು ರೈಲು ನಿಲ್ದಾಣ ರಸ್ತೆಯ ಪೂರ್ಣಿಮಾ ಬ್ರಾಹ್ಮಣರ ರೆಸ್ಟೋರೆಂಟ್‌. ಮಂಗಳೂರು ತಾಲೂಕಿನ ಅಶ್ವತ್ಥಪುರದ ನಾರಾಯಣರಾವ ನೂಜಿ 54 ವರ್ಷಗಳ ಹಿಂದೆ ಆರಂಭಿಸಿದ ಈ ಹೋಟೆಲನ್ನು ಪ್ರಸ್ತುತ ಅವರ ಮಕ್ಕಳು ಮುನ್ನಡೆಸುತ್ತಿದ್ದಾರೆ. 

ಈ ಹೋಟೆಲ್‌ನಲ್ಲಿ ಉಪ್ಪಿಟ್ಟು, ಇಡ್ಲಿ, ವಡೆ, ಒಂದಕ್ಕಿಂತ ಮತ್ತೂಂದು ಉತ್ಕೃಷ್ಟ ಖಾದ್ಯಗಳು ದೊರೆತರೂ ತುಪ್ಪದ ಶಿರಾ (ಕೇಸರಿಬಾತ್‌) ಇಲ್ಲಿನ ಬ್ರಾಂಡೆಡ್‌ ಐಟಮ್‌. ಶಿರಾ ಸವಿಯುವುದಕ್ಕಾಗಿಯೇ ಗ್ರಾಹಕರು ದೂರದ ಪ್ರದೇಶಗಳಿಂದ ಈ ಹೋಟೆಲ್‌ಗೆ ಬರುತ್ತಾರೆ. ಒಮ್ಮೆ ಬಂದವರು ಮತ್ತೂಮ್ಮೆ ಬರುವುದು ಗ್ಯಾರಂಟಿ. ಬೆಳಗ್ಗೆ 8ರಿಂದ ಮಧ್ಯಾಹ್ನ 12 ಗಂಟೆವರೆಗೆ ಮಾತ್ರ ಶಿರಾ ಸಿಗುತ್ತದೆ.

ಉತ್ತಮ ಗುಣಮಟ್ಟದ ತುಪ್ಪ ಬಳಕೆ ಮಾಡುವುದರಿಂದ ಶಿರಾ ತಿಂದ ನಂತರ ಬಹಳ ಹೊತ್ತಿನವರೆಗೆ ತುಪ್ಪದ ರುಚಿ ಬಾಯಿಯಲ್ಲಿ ಉಳಿಯುತ್ತದೆ. ಧಾರವಾಡದ ಪ್ರಸಿದ್ಧ ಬಾಂಬೆ ರೆಸ್ಟೋರೆಂಟ್‌ ನಲ್ಲಿ ಕೆಲಸ ಮಾಡುತಿದ್ದ ನಾರಾಯಣರಾವ ನೂಜಿ, ನಂತರ ಹುಬ್ಬಳ್ಳಿಯ ಗಣೇಶ ಪೇಟೆಯಲ್ಲಿ 1935ರಲ್ಲಿ ಲಕ್ಕಿ ರೆಸ್ಟೋರೆಂಟ್‌ ಆರಂಭಿಸಿದರು.

ಮುಂದೆ ಬಾನಿ ಓಣಿಯಲ್ಲಿ ಗೋಪಾಳಪ್ಪನ ಖಾನಾವಳಿ, ಘಂಟಿಕೇರಿಯಲ್ಲಿ ವಸಂತಕೆಫೆ ಆರಂಭಿಸಿದರು. ಅಲ್ಲದೇ ನಾಟಕ ಕಂಪನಿಗಳ ಕ್ಯಾಂಟೀನ್‌ಗಳನ್ನು ನಿರ್ವಹಿಸುತ್ತಿದ್ದರು. ಎಲ್ಲವುಗಳ ಮಧ್ಯೆ ಈ ಪೂರ್ಣಿಮಾ ರೆಸ್ಟೋರೆಂಟ್‌ ಅನ್ನು ಹಾಗೇ ಉಳಿಸಿಕೊಂಡರು. ನಾರಾಯಣರಾವ್‌ ತಮ್ಮ 4 ಮಕ್ಕಳಿಗೆ ಉತ್ತಮ ಶಿಕ್ಷಣ ಕೊಡಿಸಿದರು. ಮಕ್ಕಳು ಹೋಟೆಲ್‌ನಲ್ಲಿ ಕೆಲಸ ಮಾಡುತ್ತಲೇ ವಿದ್ಯಾಭ್ಯಾಸ ಪೂರೈಸಿದರು.

ತಂದೆಯ ನಿಧನದ ನಂತರ ಮೂವರು ಪುತ್ರರು ಹೋಟೆಲ್‌ ನಿರ್ವಹಣೆ ಮಾಡುತ್ತಿದ್ದಾರೆ. ಹೋಟೆಲ್‌ನಲ್ಲಿ ಜನಸಂದಣಿ ಹೆಚ್ಚಾದರೆ ಯಾವುದೇ ಹಿಂಜರಿಕೆ ಇಲ್ಲದೆ  ಮನೆಯ ಸದಸ್ಯರೆಲ್ಲ ಬಂದು ಕೆಲಸಮಾಡುತ್ತಾರೆ. ತಂದೆ ಆರಂಭಿಸಿದ, ತಮ್ಮ ಶ್ರೇಯಸ್ಸಿಗೆ ಕಾರಣವಾದ ಹೋಟೆಲ್‌ ಉಳಿಸಿಕೊಂಡು ಹೋಗಬೇಕೆಂಬುದು ಕುಟುಂಬದ ಸದಸ್ಯರ ಅಭಿಲಾಷೆ. ಈಗ ಹಿರಿಯ ಸೋದರ ಜಯಕೃಷ್ಣ ನೂಜಿ ಅವರ ನೇತೃತ್ವದಲ್ಲಿ ಹೋಟೆಲ್‌ ನಡೆಯುತ್ತಿದೆ. 

ಇಲ್ಲಿ ಶಿರಾ ಅಲ್ಲದೇ ಮಿಕ್ಸಚರ್‌ ಖಾರಾ (ಅವಲಕ್ಕಿ ಚೂಡಾ ಮಿಶ್ರಣ), ಪೂರಿ-ಪಾತಾಳಭಾಜಿ ಕೂಡ ಫೇಮಸ್ಸು. ಹಿರಿಯ ರಾಜಕಾರಣಿ ಎಚ್‌.ಕೆ.ಪಾಟೀಲರು ಶಿಕ್ಷಣ ಪಡೆಯುವ ಸಂದರ್ಭದಲ್ಲಿ ಇದೇ ಹೊಟೇಲ್‌ಗೆ ಬರುತ್ತಿದ್ದರು. ಈಗಲೂ ಅವರು ಹುಬ್ಬಳ್ಳಿಗೆ ಬಂದಾಗ ಇಲ್ಲಿಗೆ ಬಂದು, ತಿಂದು ಹೋಗುತ್ತಾರೆ. ಮಾಜಿ ಮುಖ್ಯಮಂತ್ರಿ ಎಸ್‌.ಆರ್‌.ಬೊಮ್ಮಾಯಿ ಹಲವು ಬಾರಿ ಇಲ್ಲಿನ  ಭೋಜನ ಸವಿದಿದ್ದಾರೆ. 

ಒಂದು ಕಾಲದಲ್ಲಿ ಪೂರ್ಣಿಮಾ ರೆಸ್ಟೋರೆಂಟ್‌ನಲ್ಲಿ ಪೇಡ ಕೂಡ ತಯಾರಾಗುತ್ತಿತ್ತು. ಆದರೆ ಗುಣಮಟ್ಟದ ಹಾಲಿನ ಕೊರತೆಯಿಂದಾಗಿ ನಿಲ್ಲಿಸಲಾಯಿತು.  ಮಂದ ಮಸಾಲೆಯ ಸಾಂಬಾರ್‌ಗಾಗಿಯೇ ಇಲ್ಲಿ ಊಟಕ್ಕೆ ಬರುವವರಿದ್ದಾರೆ. ರೊಟ್ಟಿ-ಚಪಾತಿ ಊಟ ಕೂಡ ಲಭ್ಯ. ಬೇಸಿಗೆಯಲ್ಲಿ ಪುದಿನಾ ಮಜ್ಜಿಗೆ ಮಾಡಲಾಗುತ್ತದೆ.

ರೈಲ್ವೆ ನಿಲ್ದಾಣದ ಸಮೀಪ ಇರುವುದರಿಂದ ಪ್ರಯಾಣಿಕರೂ ಹೆಚ್ಚಿನ ಸಂಖ್ಯೆಯಲ್ಲಿ ಇಲ್ಲಿಗೆ ಬರುತ್ತಾರೆ. ರೈಲ್ವೆ ಸಿಬ್ಬಂದಿ, ಮಹಾನಗರ ಪಾಲಿಕೆ ಅಧಿಕಾರಿಗಳು, ಎಲ್‌ಐಸಿ ಸಿಬ್ಬಂದಿ, ಸಮೀಪದ ಕಚೇರಿಗಳ ನೌಕರರು ಇಲ್ಲಿನ ಖಾಯಂ ಗ್ರಾಹಕರು. ಗುಣಮಟ್ಟದಲ್ಲಿ ರಾಜಿ ಮಾಡಿಕೊಳ್ಳದೇ ಗ್ರಾಹಕರಿಗೆ ಉತ್ತಮ ಖಾದ್ಯಗಳನ್ನು ನೀಡಬೇಕೆಂಬುದು ನೂಜಿ ಸೋದರರ ಉದ್ದೇಶ. ಪ್ರತಿ ಪ್ಲೇಟ್‌ ಶಿರಾಕ್ಕೆ 20 ರೂ. ನಿಗದಿಪಡಿಸಿದ್ದರೆ, ರೊಟ್ಟಿ ಊಟಕ್ಕೆ 75 ರೂ. ಇದೆ.  

* ವಿಶ್ವನಾಥ ಕೋಟಿ