ಸ್ವಾರಸ್ಯ; ಜನರ ಸೇವೆಯೇ ದೇವರ ಸೇವೆ

Team Udayavani, Jul 21, 2020, 12:00 PM IST

ಅದೊಮ್ಮೆ ಸ್ವಾಮಿ ರಾಮತೀರ್ಥರು ಹಡಗಿನಲ್ಲಿ ಜಪಾನ್‌ ದೇಶಕ್ಕೆ ಪ್ರವಾಸ ಹೊರಟಿದ್ದರು. ಹಡಗಿನಲ್ಲಿ, ಅಮೆರಿಕಾದ ವೃದ್ಧ ಪ್ರೊಫೆಸರ್‌ ಒಬ್ಬರು ಅವರ ಗೆಳೆಯರಾದರು. ಆತ ರಷಿಯನ್‌ ಭಾಷೆಯನ್ನು ಕಲಿಯುತ್ತಿದ್ದರು. ಕುತೂಹಲಕ್ಕೆಂದು ವಿಚಾರಿಸಿದಾಗ, ಅವರಿಗೆ ಒಟ್ಟು 11 ಭಾಷೆಗಳು ಬರುತ್ತವೆ ಎಂದು ತಿಳಿಯಿತು.

“ಈ ವಯಸ್ಸಿನಲ್ಲಿ ಹೊಸ ಭಾಷೆಯನ್ನೂ ಏಕೆ ಕಲಿಯುತ್ತೀರಿ?’- ರಾಮತೀರ್ಥರು ಕೇಳಿದರು. “ನಾನು ಭೂಗರ್ಭ ಶಾಸ್ತ್ರದ ಪೊ›ಫೆಸರ್‌. ರಷಿಯನ್‌ ಭಾಷೆಯಲ್ಲಿ ಈ ಶಾಸ್ತ್ರದ ಅತ್ಯುತ್ತಮ ಗ್ರಂಥವೊಂದು ಹೊರಬಿದ್ದಿದೆ. ಅದನ್ನು ಅನುವಾದಿ ಸಿದರೆ, ಅದರಿಂದ ನಮ್ಮ ದೇಶದ ಜನರಿಗೆ ತುಂಬಾ ಪ್ರಯೋಜನವಾದೀತು. ಅದಕ್ಕಾಗಿಯೇ ರಷಿಯನ್‌ ಭಾಷೆ ಕಲಿಯುತ್ತಿದ್ದೇನೆ’-ಎಂಬ ಉತ್ತರ ಬಂತು. “ನೀವು ಈಗ ಸಾವಿನ ದಂಡೆಯಲ್ಲಿ ನಿಂತಿದ್ದೀರಿ ಅನ್ನಬಹುದು. ಅಷ್ಟು
ವಯಸ್ಸಾಗಿದೆ ನಿಮಗೆ. ಈಗ ಹೊಸ ಭಾಷೆ ಕಲಿತು ಏನು ಫ‌ಲ? ಅದರ ಬದಲು ಪರಮಾತ್ಮನನ್ನು ಧ್ಯಾನಿಸಿರಿ. ಬರೀ ಶಾಸ್ತ್ರಾಭ್ಯಾಸದಿಂದ ಏನು ಪ್ರಯೋಜನ?’- ರಾಮತೀರ್ಥರು ಹೀಗೊಂದು ಸಲಹೆ ಕೊಟ್ಟರು. ಅದಕ್ಕೆ ಅಮೆರಿಕದ ಆ ವೃದ್ಧ ಪ್ರೊಫೆಸರ್‌ ಕೊಟ್ಟ ಉತ್ತರ ಹೀಗಿತ್ತು- “ಜನತೆಯ ಸೇವೆಯೇ ದೇವರ ಸೇವೆ. ನನ್ನ ಬಂಧುಗಳಿಗೆ ಅನುಕೂಲ ಆಗುವಂತಿದ್ದರೆ, ಅದಕ್ಕಾಗಿ ಎಂಥಾ ರಿಸ್ಕ್ ತಗೊಳ್ಳಲೂ ನಾನು ಸಿದ್ಧ. ಸಾವಿನ ಭಯದಿಂದ ನಾನು ಪರರ ಸೇವೆ ಮಾಡುವ ಹಕ್ಕನ್ನು ಬಿಟ್ಟು ಕೊಡಲಾರೆ… ‘