ನಿಧಿಗಾಗಿ ಹುಡುಕಾಟ

Team Udayavani, Nov 21, 2017, 5:57 PM IST

ಇದು ಮೈಸೂರಿನ ಮಾನಸ ಗಂಗೋತ್ರಿ ವಿವಿಯ ವಿದ್ಯಾರ್ಥಿಗಳು ಪ್ರತಿವರ್ಷ ಏರ್ಪಡಿಸುವ ಆಟವೊಂದರ ಕತೆ. ಅದರ ಹೆಸರು “ನಿಧಿಗಾಗಿ ಶೋಧ’. ಹಿಂದೆಲ್ಲ ನಿಧಿಗಾಗಿ ಯುದ್ಧಗಳೇ ನಡೆಯುತ್ತಿದ್ದವಂತೆ. ಹಾಗೆ ಈ ವಿದ್ಯಾರ್ಥಿಗಳ ನಡುವೆಯೂ ಒಂದು ಮನರಂಜನಾತ್ಮಕ ಯುದ್ಧ ನಡೆಯುತ್ತದೆ. ಅದು ಹೇಗಂತೀರ?

ಓಡು… ಓಡು… ಓಡು…! ಏನಿದು ಉಸೇನ್‌ ಬೋಲ್ಟ್ ಜತೆ ಮೈಸೂರಿನ ಹುಡುಗರೆಲ್ಲ ಓಡ್ತಿದ್ದಾರೆ ಅಂದೊRಂಡ್ರಾ? ಹಾಗೇನೂ ಇಲ್ಲ. ಈಗತಾನೇ ಸ್ನಾತಕೋತ್ತರ ಪದವಿಗೆ ಕಾಲಿಟ್ಟವರಿಗೆ ಇದೊಂದು ಒಲಿಂಪಿಕ್‌! ಎಂ.ಎ. ತರಗತಿಗಳು ಆರಂಭವಾದ ಹಿನ್ನೆಲೆಯಲ್ಲಿ ಮನರಂಜನೆಗಾಗಿ, ದ್ವಿತೀಯ ವರ್ಷದ ವಿದ್ಯಾರ್ಥಿಗಳು ಪ್ರಥಮ ವರ್ಷದ ವಿದ್ಯಾರ್ಥಿಗಳಿಗಾಗಿ ವಿಶೇಷ ಸ್ಪರ್ಧೆ ಏರ್ಪಡಿಸಿದ್ದಾರೆ. ಅದೇ ನಿಧಿಗಾಗಿ ಶೋಧ! ಮೈಸೂರು ವಿವಿಯ ಮಾನಸ ಗಂಗೋತ್ರಿಯ ಪ್ರತಿ ವಿಭಾಗದಲ್ಲೂ, ಪ್ರತಿ ವರ್ಷ ಈ ಆಟ ನಡೆಯುತ್ತದೆ.

ಹಿಂದೆಲ್ಲ ನಿಧಿಗಾಗಿ ಯುದ್ಧಗಳೇ ನಡೆಯುತ್ತಿದ್ದವಂತೆ. ಹಾಗೆ ಈ ವಿದ್ಯಾರ್ಥಿಗಳ ನಡುವೆಯೂ ಒಂದು ಮನರಂಜನಾತ್ಮಕ ಯುದ್ಧ ನಡೆಯುತ್ತದೆ. ಯಾವ ತಂಡವು ಮೊದಲು ನಿಧಿಯನ್ನು ಶೋಧಿಸುತ್ತದೋ, ಅವರು ಇಲ್ಲಿ ವಿಜಯಶಾಲಿಗಳಾಗುತ್ತಾರೆ. ಕಾಲಿಗೆ ಸ್ಕೇಟಿಂಗ್‌ ಕಟ್ಟಿಕೊಂಡವರಂತೆ, ಕ್ಯಾಂಪಸ್‌ ಸುತ್ತಾ ಓಡಾಡುತ್ತಾ ಒಂದೊಂದು ತಂಡವು ವಿಭಿನ್ನ ರೀತಿಯಲ್ಲಿ ನಿಧಿಗಾಗಿ ಶೋಧ ನಡೆಸುತ್ತಾರೆ.

ಏನಿದು ನಿಧಿಗಾಗಿ ಶೋಧ?: ಇದು ಸ್ನಾತಕೋತ್ತರ ಪದವಿಯ ಪತ್ರಿಕೋದ್ಯಮ ವಿದ್ಯಾರ್ಥಿಗಳ ಸೃಷ್ಟಿ. ಪ್ರಥಮ ವರ್ಷದ ವಿದ್ಯಾರ್ಥಿಗಳನ್ನು ಒಟ್ಟುಗೂಡಿಸಿ, ಹುಡುಗ- ಹುಡುಗಿಯರ ಮಿಶ್ರ ಸಹಭಾಗಿತ್ವದಲ್ಲಿ 4 ರಿಂದ 5 ಗುಂಪುಗಳನ್ನು ಮಾಡುತ್ತಾರೆ. ಅವುಗಳಲ್ಲಿ ಕೆಲವು ನಿರ್ದಿಷ್ಟ ಸ್ಥಳಗಳನ್ನು ಗುರುತಿಸಿ, ಆ ಸ್ಥಳಗಳಲ್ಲಿ ದ್ವಿತೀಯ ವರ್ಷದ ವಿದ್ಯಾರ್ಥಿಗಳನ್ನು ಗೌಪ್ಯವಾಗಿ ಅಡಗಿಕೊಳ್ಳುವಂತೆ ಸಲಹೆ ನೀಡಿರುತ್ತಾರೆ.

ಅದರಂತೆ, 12- 15 ಸ್ಥಳಗಳನ್ನು ಗುರುತಿಸಿ, ಆ ಸ್ಥಳಗಳ ಹೆಸರನ್ನು ವಿಭಿನ್ನವಾಗಿ ಅಂದರೆ, ಗಡಿಯಾರದ ಸ್ಥಳವನ್ನು ಗುರುತಿಸಲು ಅದಕ್ಕೆ ವಿಶೇಷವಾಗಿ ಬರೆದಿರುತ್ತಾರೆ. ಅದೆಂದರೆ, “ಎಲ್ಲರ ಕಾಲನ್ನೂ ಎಳೆಯುತ್ತೆ ಕಾಲ’ ಅಂತ ಒಂದು ಚೀಟಿಯಲ್ಲಿ ಬರೆದು ಪ್ರತಿ ಗುಂಪುಗಳಿಗೂ ನೀಡಲಾಗುತ್ತದೆ. ಅದನ್ನು ಯಾವ ಸ್ಥಳವೆಂದು ಗುರುತಿಸಿ, ಆ ಸ್ಥಳದಲ್ಲಿ ಯಾರಿರುತ್ತಾರೆಂಬುದನ್ನು ಗುರುತಿಸಿ ಚೀಟಿ ಪಡೆಯಬೇಕಿರುತ್ತದೆ. ಹಾಗೆ ಚೀಟಿ ಪಡೆಯುವುದಕ್ಕೂ ಮೊದಲು ಸೀನಿಯರ್‌ ಕೊಟ್ಟ ಟಾಸ್ಕ್ ಅನ್ನು ಪೂರ್ಣಗೊಳಿಸಿ, ನಂತರ ಮುಂದಿನ ಸ್ಥಳಕ್ಕೆ ಹೋಗುವ ಅವಕಾಶ ಇರುತ್ತದೆ.

ಟಾಸ್ಕ್ನಲ್ಲಿ ಏನೇನಿರುತ್ತೆ?: ಮೊದಲಿಗೆ ಇಷ್ಟವಾದ ಹಾಡನ್ನು ಹೇಳಿಸುವುದು, ಸಿನಿಮಾ ನಟರ ಹಾಗೆ ಆ್ಯಕ್ಟ್ ಮಾಡಿಸುವುದು, ಕಪ್ಪೆ ನೆಗೆತ, ಕೋತಿ, ನಾಯಿಯ ರೀತಿಯಲ್ಲಿ ಅಭಿನಯಿಸುವುದು… ಮುಂದುವರಿಯುತ್ತಾ ತುಂಬಾ ಕಷ್ಟದ ಟಾಸ್ಕ್ಗಳನ್ನು ಕೊಡಲಾಗುತ್ತದೆ. ಪರಿಚಯವಿಲ್ಲದ ವ್ಯಕ್ತಿಗಳ ಹತ್ತಿರ ಸೆಲ್ಫಿ ತೆಗೆದುಕೊಳ್ಳುವುದು, ಲವ್‌ ಪ್ರಪೋಸ್‌ ಮಾಡುವುದು, ಯಾರಾದರೂ ಗೊತ್ತಿಲ್ಲದವರ ನಂಬರ್‌ ಕೇಳಿ ತೆಗೆದುಕೊಂಡು ಬರುವುದು… ಹೀಗೆ ಅನೇಕ ರೀತಿಯ ಟಾಸ್ಕ್ಗಳನ್ನು ನೀಡಿ ಅವರಿಗೆ ಕಾಟವನ್ನು ಕೊಟ್ಟು ಮುಂದಿನ ಸ್ಥಳಕ್ಕೆ ಕಳುಹಿಸಲಾಗುತ್ತದೆ.

ಅಂತಿಮ ಹಂತದ ಅವಾಂತರ!: ಎಲ್ಲ ಸ್ಥಳಗಳನ್ನೂ ಸುತ್ತಿದ ನಂತರ ಕೊನೆಯಲ್ಲಿ ಎಲ್ಲಾ ತಂಡಗಳು ಒಗ್ಗೂಡಿಸಿ, ಕೊನೆಯ ಟಾಸ್ಕ್ ನೀಡುತ್ತಾರೆ; ಅದೇ ನಿಧಿಗಾಗಿ ಹುಡುಕಾಟ. ಮೊದಲಿಗೆ ಒಂದು ಡಮ್ಮಿ ನಿಧಿಯನ್ನು ಇಡಲಾಗಿರುತ್ತದೆ. ಅದನ್ನು ಎಲ್ಲ ಗುಂಪಿನ ವಿದ್ಯಾರ್ಥಿಗಳು ಸೇರಿ ಹುಡುಕುತ್ತಾರೆ. ಅದು ಸಿಕ್ಕ ತಕ್ಷಣ ಹುಡುಕಿದ ಗುಂಪಿನ ಹರುಷಕ್ಕೆ ಪಾರವೇ ಇರುವುದಿಲ್ಲ. ಹುಚ್ಚೆದ್ದು ಕುಣಿದು ಕುಪ್ಪಳಿಸುತ್ತಾ, ಅದರ ಮುಂದೆ ಸೆಲ್ಫಿ ತೆಗೆದುಕೊಂಡು ಸಂಭ್ರಮಿಸುತ್ತಾರೆ.

ಅದನ್ನು ಓಪನ್‌ ಮಾಡಿದಾಕ್ಷಣ, ಅವರಿಗೆ ಸಿಗೋದೇ ಕಲ್ಲು, ಮಣ್ಣು! ಅದನ್ನು ನೋಡಿ ಎಲ್ಲರೂ ಬಿದ್ದೂಬಿದ್ದು ನಗುತ್ತಾರೆ. ಆಗ ಮತ್ತೂಂದು ಕೊನೆಯ ಟಾಸ್ಕ್, ಅದೇ ನಿಜವಾದ ನಿಧಿಯನ್ನು ಹುಡುಕುವ ಚಾಲೆಂಜ್‌. ಆ ನಿಧಿಯನ್ನು ಯಾವುದಾದರು ಒಂದು ರಹಸ್ಯವಾದ ಸ್ಥಳದಲ್ಲಿ ಇಟ್ಟು, ಅದಕ್ಕಾಗಿ ಶೋಧವನ್ನು ನಡೆಸಿ ಅಂತಿಮವಾಗಿ ಹುಡುಕಿದ ಗುಂಪು ಜಯಶಾಲಿ ಆಗುತ್ತೆ. ಆ ಬಾಕ್ಸ್‌ನಲ್ಲಿ ಸಿಹಿತಿನಿಸುಗಳು ಇರುತ್ತವೆ. ಎಲ್ಲರೂ ತಿಂದು ಹರ್ಷಿಸುತ್ತಾರೆ.

* ವಿನೋದ್‌ ಕುಮಾರ್‌ ಎಸ್‌.ವಿ., ಮೈಸೂರು