ಎಲ್ಲವೂ ಗಿಳಿಗೋಸ್ಕರ!

Team Udayavani, Feb 15, 2018, 12:15 PM IST

ರಾಜು, ಶಂಕರ, ನಾರಾಯಣ ಮೂವರೂ ಗೆಳೆಯರು. ಅವರಿಗೆ ಪಕ್ಷಿಗಳೆಂದರೆ ಪ್ರಾಣ. ಒಂದು ದಿನ ರಾಜುಗೆ ಎರಡು ಗಿಳಿಮರಿ ಸಿಕ್ಕವು. ಅದನ್ನು ಮನೆಗೆ ತಂದು ಅವನು ಸಾಕತೊಡಗಿದನು. ಮುದ್ದಾಗಿದ್ದ ಗಿಳಿ ಮರಿಗಳನ್ನು ಕಂಡು ನಾರಾಯಣನಿಗೆ ತನ್ನ ಬಳಿ ಇಲ್ಲವಲ್ಲ ಎಂದು ಬೇಸರವಾಯಿತು. 

ಅದೇ ದಿನ ಸಂಜೆ ನಾರಾಯಣ ಪಕ್ಷಿಯನ್ನು ಹಿಡಿಯಲು ಬಲೆಯೊಂದಿಗೆ ಕಾಡಿಗೆ ಹೋದ. ಇವನು ಹಾಕಿದ್ದ ಬಲೆಗೆ ಮರಿಗುಬ್ಬಿಯೊಂದು ಸೆರೆಯಾಗಿತ್ತು. ಆ ಗುಬ್ಬಿಮರಿಯನ್ನು ನಾರಾಯಣ ಜೋಪಾನವಾಗಿ ಮನೆಗೆ ಕರೆತಂದ. ಮರುದಿನ ತನ್ನ ಗೆಳೆಯರ ಮುಂದೆ ಗುಬ್ಬಚ್ಚಿಯನ್ನು ತೋರಿಸೋಣ ಎಂದು ಅದಕ್ಕೆ ಅಲಂಕಾರ ಮಾಡಿದ. ಮರುದಿನ ಗುಬ್ಬಚ್ಚಿಯನ್ನು ಕಂಡು ಗೆಳೆಯರೆಲ್ಲಾ ಬಿದ್ದೂ ಬಿದ್ದು ನಕ್ಕರು. ನಾರಾಯಣನಿಗೆ ಅವಮಾನವಾದಂತಾಯಿತು. 

ಕಡೆಗೆ ನಾರಾಯಣ ಏನಾದರೂ ಮಾಡಿ ತಾನೂ ಗಿಳಿ ಮರಿಯೊಂದನ್ನು ಹಿಡಿಯಬೇಕೆಂದುಕೊಂಡ. ಆದರೆ ಅದು ಬಹಳ ಕಷ್ಟ ಎನ್ನುವುದು ಅವನ ಅನುಭವಕ್ಕೆ ಬಂತು. ಕಡೆಗೆ ತನ್ನ ಬಳಿಯಿದ್ದ ಗುಬ್ಬಚ್ಚಿಗೇ ಹಸಿರು ಬಣ್ಣ ಹಚ್ಚಿ ಇದು ಹೊಸ ಪ್ರಭೇದದ ಪಕ್ಷಿಯೆಂದು ಸ್ನೇಹಿತರಿಗೆ ಪರಿಚಯಿಸುವ ಉಪಾಯ ಮಾಡಿದ.

ಮರುದಿನ ಗಿಳಿಯಂತಹ ಗುಬ್ಬಿ ಮರಿಯನ್ನು ಶಾಲೆಗೆ ತೆಗೆದುಕೊಂಡು ಹೋದ. ಸಹಪಾಠಿಗಳೆಲ್ಲಾ ಅದನ್ನೇ ಆಷcರ್ಯದಿಂದ ನೋಡುತಿರಲು ನಾರಾಯಣ ತನ್ನ ಉಪಾಯ ಫ‌ಲಿಸಿತೆಂದು ಜಂಭದಿಂದ ನಡೆದ. ಅದೇ ಸಮಯಕ್ಕೆ ಗುಬ್ಬಿಯೊಂದು ಹಾರಿ ಬಂತು. ಅದು ಚೀಂವ್‌ ಚೀಂವ್‌ ಎಂದು ಚಿಲಿಪಿಲಿಗುಟ್ಟಿದಾಗ ನಾರಾಯಣನ ಗುಬ್ಬಿಯೂ ಚೀಂವ್‌ಗುಟ್ಟಿತು. ಅದನ್ನು ಕಂಡು ಎಲ್ಲರೂ ನಕ್ಕರು. ನಾರಾಯಣನಿಗೆ ಮತ್ತೆ ಅವಮಾನವಾದಂತಾಗಿ ಅತ್ತುಬಿಟ್ಟನು. 

ಗೆಳೆಯರೆಲ್ಲಾ ಅವನನ್ನು ಸಮಾಧಾನಿಸಿದರು. ರಾಜು ತನ್ನ ಬಳಿಯಿದ್ದ ಎರಡು ಗಿಳಿಗಳಲ್ಲಿ ಒಂದನ್ನು ನಾರಾಯಣನಿಗೆ ನೀಡಿದ. ಇದರಿಂದ ನಾರಾಯಣನಿಗಾದ ಸಂತಸ ಅಷ್ಟಿಷ್ಟಲ್ಲ. ಅವನು ಗಿಳಿಯನ್ನು ಇಡೀ ಶಾಲೆಗೇ ತೋರಿಸಿ ಖುಷಿಪಟ್ಟನು.

– ಅಶೋಕ ವಿ. ಬಳ್ಳಾ