ಇದೇ ಆ ಕಾರ್ಡ್‌!

Team Udayavani, May 30, 2019, 6:00 AM IST

ಜಾದೂಗಾರ ಇಸ್ಪೀಟ್‌ ಕಾರ್ಡ್‌ಗಳನ್ನು ಪ್ಯಾಕಿನಿಂದ ಹೊರ ತೆಗೆದು ಕಾರ್ಡುಗಳ ಬೆನ್ನು ಮೇಲಿರುವಂತೆ ಹರಡಿ ಯಾವುದಾದರೂ ಒಂದು ಕಾರ್ಡನ್ನು ಆರಿಸಿಕೊಳ್ಳಲು ಪ್ರೇಕ್ಷಕರಲ್ಲೊಬ್ಬನಿಗೆ ಹೇಳುತ್ತಾನೆ. ಆ ಕಾರ್ಡನ್ನು ಜಾದೂಗಾರನಿಗೆ ತೋರಿಸದೆ ಉಳಿದ ಪ್ರೇಕ್ಷಕರಿಗೆ ತೋರಿಸಿ ಉಳಿದ ಕಾರ್ಡ್‌ಗಳ ನಡುವೆ ಎಲ್ಲೋ ಇಡುತ್ತಾನೆ. ಜಾದೂಗಾರ ತಕ್ಷಣ ಆ ಕಾರ್ಡನ್ನು ತೆಗೆದು ತೋರಿಸಿದಾಗ ಪ್ರೇಕ್ಷಕರು ದಂಗಾಗುತ್ತಾರೆ.

ರಹಸ್ಯ:
ಇಸ್ಪೀಟ್‌ ಪ್ಯಾಕಿನಲ್ಲಿ 26 ಕಪ್ಪು ಕಾರ್ಡುಗಳು ಮತ್ತು 26 ಕೆಂಪು ಕಾರ್ಡುಗಳಿರುತ್ತವೆ. ಕಪ್ಪು ಕಾರ್ಡುಗಳ ಮೇಲೆ ಕೆಂಪು ಕಾರ್ಡುಗಳನ್ನು ಇಟ್ಟು ಮೊದಲೇ ಪ್ಯಾಕನ್ನು ಸಿದ್ಧಪಡಿಸಿಟ್ಟುಕೊಳ್ಳಿ. ಪ್ರೇಕ್ಷಕರಲ್ಲಿ ಒಬ್ಬನನ್ನು ವೇದಿಕೆಗೆ ಕರೆಯಿರಿ. ಪ್ಯಾಕಿನಿಂದ ಕಾರ್ಡುಗಳನ್ನು ತೆಗೆದು ಬೆನ್ನು ಮೇಲೆ ಕಾಣಿಸುವಂತೆ ಹಿಡಿಯಿರಿ. ಈಗ ಮೇಲಿನ ಇಪ್ಪತ್ತಾರು ಕಾರ್ಡುಗಳು ಕಪ್ಪು ಕಾರ್ಡುಗಳಾಗಿದ್ದು ಕೆಳಗಿನ ಇಪ್ಪತ್ತಾರು ಕಾರ್ಡುಗಳು ಕೆಂಪು ಕಾರ್ಡ್‌ಗಳಾಗಿರುತ್ತವೆ. ಅವುಗಳನ್ನು ಕೈಯಲ್ಲಿ ಹರಡಿ ಆತನಿಗೆ ಯಾವುದಾದರೂ ಒಂದು ಕಾರ್ಡನ್ನು ತೆಗೆದುಕೊಳ್ಳಲು ಹೇಳಿ. ಈಗ ಆತ ಮೇಲಿನ ಇಪ್ಪತ್ತಾರು ಕಾರ್ಡುಗಳಲ್ಲಿ ಒಂದನ್ನು ಮಾತ್ರ ಆರಿಸುವಂತೆ ಜಾಗ್ರತೆ ವಹಿಸಿ. ಕಾರ್ಡನ್ನು ಪ್ರೇಕ್ಷಕರಿಗೆ ತೋರಿಸಿದ ನಂತರ ಅದನ್ನು ನಿಮ್ಮ ಕೈಯಲ್ಲಿರುವ ಕಾರ್ಡ್‌ಗಳ ನಡುವೆ ತನಗೆ ತೋಚಿದಲ್ಲಿ ಇಡಲು ಹೇಳಿ. ಈಗ ಆತ ಕೆಳಗಿನ ಇಪ್ಪತ್ತಾರು ಕಾರ್ಡುಗಳ ನಡುವೆ ಅದನ್ನು ಇಡುವಂತೆ ಜಾಗ್ರತೆ ವಹಿಸಬೇಕು. ಕಾರ್ಡುಗಳು ಕಾಣುವಂತೆ ಹಿಡಿದುಕೊಳ್ಳಿ. ಈಗ ಹುಡುಕುವವನಂತೆ ನಟಿಸುತ್ತಾ ಆತನ ಕಾರ್ಡನ್ನು ತೆಗೆದು ತೋರಿಸಿ. ಇಪ್ಪತ್ತಾರು ಕಾರ್ಡುಗಳ ಪೈಕಿ ಒಂದು ಬೇರೆ ಬಣ್ಣದ ಕಾರ್ಡು ಸೇರಿಕೊಂಡಿರುತ್ತದಲ್ಲಾ ಅದುವೇ ಆತ ಆರಿಸಿದ ಕಾರ್ಡಲ್ಲವೇ?

-ಉದಯ್‌ ಜಾದೂಗಾರ್‌