ನಗಿಸದ 60 ವರ್ಷ

Team Udayavani, Mar 16, 2019, 12:30 AM IST

  ಹೋಳಿ ಹಬ್ಬ ಬಂತೆಂದರೆ ರಾಣಿಬೆನ್ನೂರ ಜ್ಞಾಪಕಕ್ಕೆ ಬರಲೇಬೇಕು. ಇಲ್ಲಿನ ದೊಡ್ಡಪೇಟೆಯ ರಾಮಲಿಂಗೇಶ್ವರ ದೇವಸ್ಥಾನದ ಸಮಿತಿ, ಶ್ರೀ ಶಕ್ತಿ ಯುವಕ ಸಂಘ, ವೀರೆಂದ್ರ ಡ್ರೆಸ್‌ಲ್ಯಾಂಡ್‌, ವಿವಿಧ ಸಂಘ ಸಂಸ್ಥೆಗಳುಸೇರಿ ರತಿ-ಕಾಮಣ್ಣರನ್ನು ಕೂಡಿಸುವ ಪದ್ಧತಿ ಜಾರಿಯಲ್ಲಿದೆ. ಈ ಆಚರಣೆಗೆ ಈಗ 60ವರ್ಷ. ಈತನಕ ಯಾರೂ ಕೂಡ ಈ ಜೋಡಿಯನ್ನು ನಗಿಸಿ ಬಹುಮಾನ ಗಿಟ್ಟಿಸಿಲ್ಲ. ಕಡಿಮೆ ಏನಿಲ್ಲ, ರತಿ-ಕಾಮಣ್ಣರ ಮುಖದಲ್ಲಿ ನಗು ಚಿಮ್ಮಿಸಿದರೆ ಎರಡು ಲಕ್ಷ ರೂ ಭಾರೀ ಬಹುಮಾನ. 

      ಕಳೆದ 20 ವರ್ಷಗಳಿಂದ ಕಾಮನ ವೇಷವನ್ನು 40ರ ಹರೆಯದ ಗದಿಗೆಪ್ಪ ರೊಡ್ಡನವರ ಹಾಗೂ ರತಿ ವೇಷದಲ್ಲಿ 31ರ ಹರೆಯದ ಕುಮಾರ, ಹಡಪದ ಯಶಸ್ವಿಯಾಗಿ ನಿರ್ವಹಿಸುತ್ತಾ ಬಂದಿರುತ್ತಾರೆ. ಗದಿಗೆಪ್ಪ ಕಿರಾಣಿ ಅಂಗಡಿ ಇಟ್ಟುಕೊಂಡಿದ್ದಾರೆ. ಕುಮಾರ ûೌರಿಕನ ಕೆಲಸ ಮಾಡುತ್ತಿದ್ದಾರೆ.  ಇಬ್ಬರೂ ಸಾಮಾನ್ಯರಂತೆ ಬದುಕು ಕಟ್ಟಿಕೊಂಡವರು. ಆದರೆ, ಈ ವೇದಿಕೆ ಹತ್ತುತ್ತಿದ್ದಂತೆ ನಗು ಎನ್ನುವುದನ್ನು ಕಿತ್ತೂಗೆದು ಗಂಭೀರವದನರಾಗುತ್ತಾರೆ. ಇದರ, ನಿಗೂಢತೆ ರಹಸ್ಯವಾಗಿಯೇ ಉಳಿದಿದ್ದು, ಜನರನ್ನು ಯಕ್ಷಪ್ರಶ್ನೆಯಾಗಿ ಕಾಡುತ್ತಿದೆ. 
 ಇವರನ್ನು ನಗಿಸಲು ಸಾರ್ವಜನಿಕರು ದ್ವಂದ್ವಾರ್ಥದ ಸಂಭಾಷಣೆಗಳು, ಅಂಗ ಚೇಷ್ಟೆಗಳು, ಪೋಲಿ ಮಾತುಗಳು, ಬೈಗುಳಗಳು ಹಾಗೂ ಹಾಸ್ಯ ಚಟಾಕಿಗಳ ಮೂಲಕ ಪ್ರಯತ್ನಿಸಿದರೂ ಯಾರಿಗೂ ಇಲ್ಲಿಯವರೆಗೆ ಯಶಸ್ಸು ದೊರೆತಿಲ್ಲ. 

ನಿಜಕ್ಕೂ ಇದೊಂದು ದಾಖಲೆಯಾಗಿ ಮುಂದುವರೆದಿದೆ. ಇದರ ಮರ್ಮವನ್ನು ಅರಿಯಲು ಸ್ಥಳೀಯ ಶಾಸಕ ಹಾಗೂ ವಿಧಾನಸಭಾ ಅಧ್ಯಕ್ಷ ಕೆ.ಬಿ.ಕೋಳಿವಾಡ ಮತ್ತು ಸ್ಥಳೀಯ  ಜನತೆ ಮಾತ್ರವಲ್ಲದೆ ರಾಜ್ಯದ ವಿವಿಧ ಮೂಲೆಗಳಿಂದ ಸಾಕಷ್ಟು ಜನ ಪ್ರಯತ್ನಿಸಿದ್ದಾರೆ. ಆದರೆ ಯಾರಿಗೂ ಯಶಶುÕ ಸಿಕ್ಕಿಲ್ಲ. ಹಾಗಾಗಿಅವರೆಲ್ಲ  ಬರಿಗೈಯಲ್ಲಿ ಹಿಂದಿರುಗುವಂತಾಗಿದೆ. 

 ಸಾಮಾನ್ಯವಾಗಿ ಹೋಳಿ ಹಬ್ಬದ ಆಚರಣೆಯ ವೇಳೆ ಗೊಂಬೆಯ ಇಲ್ಲವೇ ಮಣ್ಣಿನ ರತಿ-ಮನ್ಮಥರನ್ನು ಕೂಡಿಸುವುದನ್ನು ಕಾಣುತ್ತೇವೆ. ಆದರೆ ಪಟ್ಟಣದಲ್ಲಿ ಜೀವಂತ ರತಿ ಮನ್ಮಥರನ್ನು ಕೂಡಿಸಲಾಗುತ್ತಿದೆ.  ಹೋಳಿ ಹಬ್ಬದ ದಿನದಂದು ಸಂಜೆ 7 ಗಂಟೆಗೆ ಕುಳಿತವರು ರಾತ್ರಿ 1ಗಂಟೆಯವರೆಗೂ ಹಾಗೇ ಕುಳಿತಿರುತ್ತಾರೆ. ನಂತರ, “ನಗದೆ’ ದಾಖಲೆ ನಿರ್ಮಿಸಿದ ಖುಷಿಯಲ್ಲಿ ಮನೆಗೆ ತೆರಳುತ್ತಾರೆ. 

ಮಂಜುನಾಥ್‌ ಹನುಮಂತಪ್ಪ ಕುಂಬಳೂರು