Sanju Weds Geetha 2: ಅವನು ಸಂಜು ಅವಳು ಗೀತಾ!; ಹಾಡಿನಲ್ಲಿ ಪ್ರೇಮ ಕಥನ

Team Udayavani, Nov 15, 2024, 12:29 PM IST

ಹದಿಮೂರು ವರ್ಷಗಳ ಹಿಂದೆ ತೆರೆಕಂಡಿದ್ದ ಸಂಜು ವೆಡ್ಸ್‌ ಗೀತಾ ಸಿನಿಮಾ ಹಿಟ್‌ ಆಗಿದ್ದು ಗೊತ್ತೇ ಇದೆ. ಈಗ ಸಂಜು ವೆಡ್ಸ್‌ ಗೀತಾ 2 ಚಿತ್ರ ತೆರೆ ಕಾಣಲು ಸಜ್ಜಾಗುತ್ತಿದೆ. ಪವಿತ್ರ ಇಂಟರ್‌ನ್ಯಾಷನಲ್‌ ಮೂವಿ ಮೇಕರ್ಸ್‌ ಲಾಂಛನದಡಿ ಚಲವಾದಿ ಕುಮಾರ್‌ ನಿರ್ಮಾಣ ಹಾಗೂ ನಾಗಶೇಖರ್‌ ನಿರ್ದೇಶನದಲ್ಲಿ ಈ ಚಿತ್ರ ಮೂಡಿಬರುತ್ತಿದೆ.

ಇತ್ತೀಚೆಗೆ ನಾಗಶೇಖರ್‌ ಜನ್ಮದಿನ ಪ್ರಯುಕ್ತ ಚಿತ್ರದ “ಅವನು ಸಂಜು ಅವಳು ಗೀತಾ ಅವರಿಬ್ಬರು ಸೇರಲು ಸಂಗೀತ’ ಎಂಬ ಹಾಡು ಬಿಡುಗಡೆಗೊಂಡಿತು. ಕವಿರಾಜ್‌ ಅವರ ಸಾಹಿತ್ಯ ಹಾಗೂ ಶ್ರೀಧರ್‌ ವಿ. ಸಂಭ್ರಮ್‌ ಸಂಗೀತ ಸಂಯೋಜನೆ ಈ ಚಿತ್ರಕ್ಕಿದೆ. ಕಾರ್ಯಕ್ರಮದಲ್ಲಿ ನಟ ಉಪೇಂದ್ರ ಹಾಡು ಬಿಡುಗಡೆಗೊಳಿಸಿ ಮಾತನಾಡಿದರು.

“ಈ ಚಿತ್ರದ ಕ್ಲೈಮ್ಯಾಕ್ಸ್‌ ನೋಡಿದೆ, ಬಹಳ ಚೆನ್ನಾಗಿದೆ. ಈ ಹಾಡನ್ನು ನೋಡಿದಾಗ, ಸಿನಿಮಾ ಖಂಡಿತ ಗೆಲ್ಲುತ್ತದೆ ಎಂಬ ವಿಶ್ವಾಸ ಇದೆ’ ಎಂದರು. ನಿರ್ಮಾಪಕ ಛಲವಾದಿ ಕುಮಾರ್‌, “ಮುಂದಿನ ತಿಂಗಳು ಚಿತ್ರ ತೆರೆಗೆ ಬರಲಿದೆ’ ಎಂದು ತಿಳಿಸಿದರು.

ನಿರ್ದೇಶಕ ನಾಗಶೇಖರ್‌, “ಚಿತ್ರದಲ್ಲಿ ಆರು ಸುಂದರ ಹಾಡುಗಳು ಚಿತ್ರದಲ್ಲಿವೆ. “ಅವನು ಸಂಜು ಅವಳು ಗೀತಾ’ ಹಾಡಿನಲ್ಲಿ ಒಬ್ಬ ಸೈನಿಕನ ಪ್ರೇಮಕಥೆ ಹೇಳಿದ್ದೇನೆ. ಸ್ವಿಟ್ಜರ್‌ಲ್ಯಾಂಡ್‌ನ‌ ಸೈನಿಕನೊಬ್ಬ, ರಾಣಿ ಸೆಲ್ವಿಕ್‌ಳನ್ನು ಪ್ರೀತಿಸುತ್ತಿರುತ್ತಾನೆ. ಆದರೆ, ಪ್ರೀತಿ ವ್ಯಕ್ತಪಡಿಸಲು ಆಗುವುದಿಲ್ಲ, ಕಾರಣ ಆಕೆ ಮಹಾರಾಣಿ. ಆತನದ್ದು ಒನ್‌ ವೇ ಲವ್‌. ಜರ್ಮನ್‌ ಸೈನಿಕರು ಸ್ವಿಟ್ಜರ್‌ಲ್ಯಾಂಡ್‌ ಮೇಲೆ ದಾಳಿ ಮಾಡುತ್ತಾರೆ. ಆಗ ವೀರಾವೇಶದಿಂದ ಹೋರಾಡಿ, ಯುದ್ಧದಲ್ಲಿ ವೀರಮರಣ ಹೊಂದುತ್ತಾನೆ. ಯುದ್ಧ ಗೆದ್ದು ರಾಣಿಗೆ ಆಕೆಯ ಕಿರೀಟಿ ಮರಳಿಸಿ, ಸಾಯುವ ಸಮಯದಲ್ಲಿ ರಕ್ತದ್ಲಲಿ “ಐ ಲವ್‌ ಯು ಫಾರೆವರ್‌’ ಎಂದು ಪತ್ರ ಬರೆಯುತ್ತಾನೆ. ಇದು ಈ ಹಾಡಿನ ಕಥೆ. ಮೊದಲ ಬಾರಿ ಹಾಡೊಂದರಲ್ಲಿ ಆ್ಯಕ್ಷನ್‌ ಇಟ್ಟಿದ್ದೇವೆ’ ಎಂದರು.

ಚಿತ್ರದಲ್ಲಿ ರೇಶ್ಮೆ ರೈತನಾಗಿ ಶ್ರೀನಗರ ಕಿಟ್ಟಿ ನಟಿಸಿದ್ದಾರೆ. ರಚಿತಾ ರಾಮ್‌ ಚಿತ್ರದ ನಾಯಕಿ. ಉಳಿದಂತೆ ತಾರಾ ಬಳಗದಲ್ಲಿ ರಂಗಾಯಣ ರಘು, ಸಾಧುಕೋಕಿಲ, ತಬಲಾ ನಾಣಿ ಮುಂತಾದ ಕಲಾವಿದರಿದ್ದಾರೆ. ವಿಶೇಷ ಪಾತ್ರದಲ್ಲಿ ನಟ ಚೇತನ್‌ ಚಂದ್ರ, ರಾಗಿಣಿ ದ್ವಿವೇದಿ ಕಾಣಿಸಿಕೊಂಡಿದ್ದಾರೆ.