Kannada cinema; ಇನ್‌ಫ್ಲುಯೆನ್ಸರ್‌ ಬದುಕಿನ ಚಿತ್ರಣ; ‘ಬೆಂಬಿಡದ ನಾವಿಕ’ ಇಂದು ತೆರೆಗೆ

Team Udayavani, Nov 17, 2023, 11:44 AM IST

ಬಹುತೇಕ ಯುವ ಪ್ರತಿಭೆಗಳೇ ಸೇರಿಕೊಂಡು ನಿರ್ಮಿಸಿರುವ “ಬೆಂಬಿಡದ ನಾವಿಕ’ ಸಿನಿಮಾ ಇಂದು ತೆರೆಕಾಣುತ್ತಿದೆ. “ಶ್ರೀಅಂಬಲವಾಡಿ ಮಹಾಕಾಳಿ ಕಂಬೈನ್ಸ್‌’ ಬ್ಯಾನರ್‌ ಅಡಿಯಲ್ಲಿ ಜಿ. ಮಹೇಶ್‌ ಬಂಡವಾಳ ಹೂಡಿ ನಿರ್ಮಿಸಿರುವ “ಬೆಂಬಿಡದ ನಾವಿಕ’ ಸಿನಿಮಾವನ್ನು ಶ್ರೀಯಾನ್‌ ಕಥೆ, ಚಿತ್ರಕಥೆ ಬರೆದು ನಿರ್ದೇಶಿಸಿರುವುದರ ಜೊತೆಗೆ ನಾಯಕ ನಟನಾಗಿಯೂ ಅಭಿನಯಿಸಿದ್ದಾರೆ.

“ಇತ್ತೀಚಿನ ದಿನಗಳಲ್ಲಿ ಸಾಮಾಜಿಕ ಜಾಲತಾಣಗಳನ್ನು ಬಳಸುವವರ ಸಂಖ್ಯೆಯಲ್ಲಿ ಗಣನೀಯ ಏರಿಕೆಯಾಗುತ್ತಿದೆ. ಇದರಿಂದ ಸಾಕಷ್ಟು ಮಂದಿ “ಇನ್‌ಫ್ಲುಯೆನ್ಸರ್‌’ ಕೂಡ ಹುಟ್ಟಿಕೊಳ್ಳುತ್ತಿದ್ದಾರೆ. ಮಹತ್ವಕಾಂಕ್ಷಿಯುಳ್ಳ ಇಂಥ “ಇನ್‌ಫ್ಲುಯೆನ್ಸರ್‌’ ಯುವಕನಿಗೆ ಇಂಟರ್ನೆಟ್‌ ಮೂಲಕ ಬರುವ ಒಂದಷ್ಟು ಸಂಕಷ್ಟಗಳು ಎದುರಾಗುತ್ತವೆ. ನೋಡುತ್ತಿದ್ದಂತೆ ಅದರಿಂದ ಆತನ ಜೀವನ ಬದಲಾಗುತ್ತದೆ. ಎಲ್ಲರಿಗೂ ಗುರಿ ಇರುವಂತೆ ಈತನಿಗೂ ಒಂದಷ್ಟು ಚಾಲೆಂಜ್‌ಗಳು ಇರುತ್ತದೆ. ಪ್ರತಿ ಕ್ಷಣ ತುಂಬ ಮುಖ್ಯವಾಗಿರುತ್ತದೆ. ಅದು ನಮ್ಮನ್ನು ಯಾವ ರೀತಿಯಾದರೂ ಬದಲಾಯಿಸಬಹುದು ಎಂಬುದನ್ನು ಈ ಸಿನಿಮಾದ ಮೂಲಕ ಹೇಳಿದ್ದೇವೆ’ ಎಂಬುದು “ಬೆಂಬಿಡದ ನಾವಿಕ’ ಸಿನಿಮಾದ ಕಥಾಹಂದರದ ಬಗ್ಗೆ ಚಿತ್ರತಂಡ ನೀಡುವ ವಿವರಣೆ.

“ಬೆಂಬಿಡದ ನಾವಿಕ’ ಸಿನಿಮಾದ ಬಹುತೇಕ ಚಿತ್ರೀಕರಣವನ್ನು ಮಂಗಳೂರು, ಉಡುಪಿ, ಕಾಪು, ಮೈಸೂರು ಸುತ್ತಮುತ್ತ ನಡೆಸಲಾಗಿದೆ. ಸಿನಿಮಾದಲ್ಲಿ ನಾಯಕ ಶ್ರೀಯಾನ್‌ ಅವರಿಗೆ ಪ್ರಿಯದರ್ಶಿನಿ, ಐಶ್ವರ್ಯಾ ನಾಯಕಿಯರಾಗಿ ಜೋಡಿಯಾಗಿದ್ದಾರೆ.