ಗ್ರ್ಯಾಂಡ್‌ ಲಾಂಚ್‌ಗೆ ಧೀರೇನ್‌ ರೆಡಿ : ಡಾ.ರಾಜ್‌ ಮೊಮ್ಮಗ ಹೇಳಿದ ಶಿವ ಕಥೆ

Team Udayavani, Oct 30, 2020, 12:57 PM IST

ವರನಟ ಡಾ. ರಾಜಕುಮಾರ್‌ ಮೊಮ್ಮಗ, ನಟ ರಾಮಕುಮಾರ್‌ ಪುತ್ರ ಧೀರೇನ್‌ ರಾಮಕುಮಾರ್‌ ನಾಯಕ ನಟನಾಗಿ ಚಿತ್ರರಂಗಕ್ಕೆ ಪರಿಚಯವಾಗುತ್ತಿದ್ದಾರೆ ಎಂಬ ಸುದ್ದಿಯನ್ನು ನೀವು ವರ್ಷದ ಹಿಂದೆಯೇ ಕೇಳಿರುತ್ತೀರಿ. ಆರಂಭದಲ್ಲಿ ಚಿತ್ರಕ್ಕೆ “ದಾರಿ ತಪ್ಪಿದ ಮಗ’ ಎಂದು ಹೆಸರಿಟ್ಟಿದ್ದ ಚಿತ್ರತಂಡ, ಆ ನಂತರ ಚಿತ್ರದ ಟೈಟಲ್‌ ಅನ್ನು “ಶಿವ 143′ ಅಂಥ ಬದಲಾಯಿಸಿಕೊಂಡಿತ್ತು. ಅದಾಗಿ ವರ್ಷ ಕಳೆದರೂ, ಆ ಚಿತ್ರದ ಬಗ್ಗೆ ಸಿನಿಪ್ರಿಯರಿಗೆ ಹೆಚ್ಚೇನೂ ಮಾಹಿತಿ ಸಿಕ್ಕಿರಲಿಲ್ಲ. ಆದರೆ ಇದೇ ವೇಳೆ “ಉದಯವಾಣಿ’ ಜೊತೆ ಮಾತಿಗೆ ಸಿಕ್ಕ ಧೀರೇನ್‌ ರಾಮಕುಮಾರ್‌ ತಮ್ಮ ಚೊಚ್ಚಲ ಚಿತ್ರದ ಬಗ್ಗೆ ಒಂದಷ್ಟು ಅಪ್ಡೇಟ್  ಮಾಹಿತಿಯನ್ನು ನೀಡಿದ್ದಾರೆ.

“ಆರಂಭದಲ್ಲೇ ಈ ಸಿನಿಮಾದ ಬಗ್ಗೆ ಹೆಚ್ಚೇನು ಮಾತನಾಡುವಂಥದ್ದು ಇಲ್ಲ ಅನಿಸಿತು. ಹಾಗಾಗಿ, ಮೀಡಿಯಾ ಮುಂದೆಯಾಗಲಿ, ಬೇರೆ ಕಡೆಯಾಗಲಿ ಸಿನಿಮಾದ ಬಗ್ಗೆ ಹೆಚ್ಚೇನು ಮಾತನಾಡಿಲ್ಲ. ಸಿನಿಮಾ ಮುಗಿಸಿದ ಮೇಲೆ, ಪ್ರೇಕ್ಷಕರ ಮುಂದೆ ಬಂದ ಮೇಲೆ ಸಾಕಷ್ಟು ಮಾತನಾಡುವುದು ಇದ್ದೇ ಇರುತ್ತದೆ…’ ಇದು ನಟ ಧೀರೇನ್‌ ರಾಮಕುಮಾರ್‌ ಅವರ ಮಾತು. ತಮ್ಮ ಚೊಚ್ಚಲ ಸಿನಿಮಾ ಸೆಟ್ಟೇರಿ ವರ್ಷವಾದರೂ ಆಸಿನಿಮಾದ ಬಗ್ಗೆ ಎಲ್ಲಿಯೂ ಹೆಚ್ಚಾಗಿ ಮಾತನಾಡಿಲ್ಲವಲ್ಲ ಎಂಬ ಪ್ರಶ್ನೆಗೆ ಧೀರೇನ್‌ ಅವರಿಂದ ಬಂದ ಉತ್ತರವಿದು.

“ನನಗೂ ಇದು ಮೊದಲ ಸಿನಿಮಾವಾಗಿದ್ದರಿಂದ, ಎಲ್ಲವೂ ಹೊಸ ಅನುಭವ. ಸಿನಿಮಾ ಚೆನ್ನಾಗಿ ಬರಬೇಕು ಅದಕ್ಕೇನು ತಯಾರಿ ಮಾಡಿಕೊಳ್ಳಬೇಕು ಎನ್ನುವುದರ ಕಡೆಗೆ ನನ್ನ ಗಮನ ಹೆಚ್ಚಾಗಿತ್ತು.ಹೀಗಾಗಿ ಬೇರೆ ಕಡೆಗೆ ಗಮನ ಕೊಡಲಾಗಲಿಲ್ಲ’ ಎನ್ನುವ ಧೀರೇನ್‌, ಸದ್ಯ ಸಿನಿಮಾದ ಪ್ರೊಡಕ್ಷನ್‌ ಕೆಲಸಗಳು ಜೋರಾಗಿ ನಡೆಯುತ್ತಿದ್ದು, ಸಿನಿಮಾ ಪ್ರೇಕ್ಷಕರ ಮುಂದೆ ಬಂದ ನಂತರ ಅದರ ಬಗ್ಗೆ ಮಾತನಾಡುವುದು ಇದ್ದೇ ಇರುತ್ತದೆ. ಅಲ್ಲಿಯವರೆಗೆ ಮಾತಿಗಿಂತ, ಕೃತಿ ಮುಖ್ಯ ಎಂಬ ಅಭಿಪ್ರಾಯ ವ್ಯಕ್ತಪಡಿಸುತ್ತಾರೆ.

ಈ ಚಿತ್ರದಲ್ಲಿ ಧೀರೇನ್‌ ಗೆಟಪ್‌ ಗಮನ ಸೆಳೆಯುವಂತಿದೆ ಯಂತೆ. ತಮ್ಮ ಗೆಟಪ್‌ ಬಗ್ಗೆ ಮಾತನಾಡುವ ಧೀರೇನ್‌, “ಇದೊಂದು ಪಕ್ಕಾ ರಾ ಲವ್‌ ಸ್ಟೋರಿ ಸಿನಿಮಾ. ಇದರಲ್ಲಿ ಎರಡು ಡಿಫ‌ರೆಂಟ್‌ ಗೆಟಪ್‌ನಲ್ಲಿ ನನ್ನನ್ನು ನೋಡಬಹುದು. ಮೊದಲ ಸಿನಿಮಾದಲ್ಲೇ ರೆಗ್ಯುಲರ್‌ ಅಲ್ಲದಂಥ ಪಾತ್ರ ಮಾಡುತ್ತಿದ್ದೇನೆ. ಇದಕ್ಕಾಗಿ ಸಾಕಷ್ಟು ತಯಾರಿ ನಡೆಸಿದ್ದೇನೆ. ಪ್ರೇಕ್ಷಕರಿಗೂ ನನ್ನ ಗೆಟಪ್‌ಇಷ್ಟವಾಗ ಬಹುದು’ಎನ್ನುತ್ತಾರೆ. ಇನ್ನು ಈಗಾಗಲೆ ನಡೆದಿರುವ ಚಿತ್ರೀಕರಣದ ಬಗ್ಗೆ ಒಂದಷ್ಟು ಮಾಹಿತಿ ನೀಡಿರುವ ಧೀರೇನ್‌, “ಈಗಾಗಲೇ 54 ದಿನ ಶೂಟಿಂಗ್‌ ನಡೆಸಲಾಗಿದ್ದು, ಇನ್ನು ಕೇವಲ 4 ದಿನಗಳ ಶೂಟಿಂಗ್‌ ಬಾಕಿಯಿದೆ.

ಮೋಹನ್‌ ಬಿ. ಕೆರೆಸ್ಟುಡಿಯೋದಲ್ಲಿ ಸಿನಿಮಾದ ಬಹುಭಾಗ ಶೂಟಿಂಗ್‌ ಮಾಡಲಾಗಿದೆ ಚಿತ್ರದಲ್ಲಿ ಐದು ಭರ್ಜರಿ ಫೈಟ್ಸ್‌ ಇದ್ದು ರವಿವರ್ಮ ಸಾಹಸ ಸಂಯೋಜಿಸಿದ್ದಾರೆ. ಮಾನ್ವಿತಾ ಹರೀಶ್‌ ನನಗೆ ಹೀರೋಯಿನ್‌ ಆಗಿ ಅಭಿನಯಿಸುತ್ತಿದ್ದಾರೆ. ಚಿತ್ರದಲ್ಲಿ ನಾಲ್ಕು ಹಾಡುಗಳಿದ್ದು, ಅರ್ಜುನ್‌ ಜನ್ಯಾ ಸಂಗೀತವಿದೆ. ಮೊದಲಿದ್ದ ನಮ್ಮ ಪ್ಲಾನ್‌ ಪ್ರಕಾರ ಈ ವರ್ಷವೇ ಸಿನಿಮಾ ಪ್ರೇಕ್ಷಕರ ಮುಂದೆ ಬರಬೇಕಿತ್ತು. ಆದರೆ ಅನಿರೀಕ್ಷಿತವಾಗಿ ಬಂದ ಕೋವಿಡ್ ದಿಂದಾಗಿ ಶೂಟಿಂಗ್‌, ಪೋಸ್ಟ್‌ ಪ್ರೊಡಕ್ಷನ್‌ ಹೀಗೆ ಎಲ್ಲ ಕೆಲಸಗಳೂ ತಡವಾಯ್ತು. ಮುಂದಿನ ವರ್ಷಖಂಡಿತ ನೋಡಬಹುದು’ ಎನ್ನುತ್ತಾರೆ. “ಜಯಣ್ಣ ಫಿಲಂಸ್‌’ ಬ್ಯಾನರ್‌ನಲ್ಲಿ ನಿರ್ಮಾಣವಾಗುತ್ತಿರುವ “ಶಿವ 143′ ಚಿತ್ರಕ್ಕೆ ಅನಿಲ್‌ ಆ್ಯಕ್ಷನ್‌-ಕಟ್‌ ಹೇಳುತ್ತಿದ್ದಾರೆ.

-ಜಿ.ಎಸ್‌.ಕಾರ್ತಿಕ ಸುಧನ್‌